Danjel 10:1-21
10 Fit-tielet sena tat-tmexxija tar-Re Ċiru tal-Persja, Danjel li kienu semmewh Beltesassar irċieva messaġġ, u dan kien veru u kien dwar ġlieda kbira. Danjel fehem il-messaġġ u ġie megħjun jifhem dak li kien ra.
2 F’dak iż-żmien, jien, Danjel, kont ilni tliet ġimgħat sħaħ bil-vistu.
3 Ma kiltx ikel mill-aqwa, ma doqtx laħam jew inbid, u lanqas ma ndlikt biż-żejt għal tliet ġimgħat sħaħ.
4 Fl-24 jum tal-ewwel xahar, waqt li kont ħdejn ix-xatt tax-xmara l-kbira, it-Tigri,*
5 ħarist u rajt raġel liebes ħwejjeġ tal-għażel, u madwar qaddu kellu ċinturin tad-deheb minn Ufaż.
6 Ġismu kien qisu ħaġar tal-krisolitu, wiċċu kien ileqq bħall-beraq, għajnejh kienu bħal torċi tan-nar, idejh u saqajh kienu qishom ram ileqq, u l-ħoss taʼ leħnu kien bħall-ħoss taʼ ħafna nies.
7 Jien biss rajt il-viżjoni; l-irġiel li kienu miegħi ma rawhiex. Imma bdew jitriegħdu bil-biżaʼ, u ħarbu u marru jistaħbew.
8 Għalhekk, jien bqajt waħdi, u meta rajt din il-viżjoni impressjonanti, spiċċajt bla saħħa, wiċċi bjad, u ma kienx baqagħli enerġija.
9 Imbagħad smajt lil dak li kien qed ikellimni; imma meta smajtu, jien irqadt fil-fond b’wiċċi mal-art.
10 Wara messitni id, u din qajmitni fuq idejja u rkopptejja.
11 Imbagħad qalli:
“Danjel, int raġel prezzjuż* ħafna, agħti kas dak li se ngħidlek. Issa qum bilwieqfa fejn kont, għax jien intbgħatt għandek.”
Meta qalli hekk, jien qomt u kont qed nitriegħed.
12 Imbagħad qalli: “Danjel tibżax. It-talb tiegħek instemaʼ minn dakinhar li int kont determinat li tifhem u umiljajt ruħek quddiem l-Alla tiegħek, u jien ġejt għandek għal din ir-raġuni.
13 Imma l-prinċep tat-territorju rjali tal-Persja ħadha kontrija għal 21 ġurnata. Imma mbagħad Mikiel,* wieħed mill-prinċpijiet taʼ pożizzjoni għolja, ġie jgħinni; u jien bqajt maġenb ir-re tal-Persja.
14 Jien ġejt infiehmek x’se jiġri lill-poplu tiegħek fl-aħħar parti tal-jiem, għax din hi viżjoni li trid tiġri fil-futur.”
15 Wara li qalli dan, ħarist ’l isfel lejn l-art u ma flaħtx nitkellem.
16 Imbagħad il-wieħed li kien bħal raġel messli xofftejja, u jien għedt lil dak li kien hemm quddiemi: “Sidi, qed nitriegħed minħabba l-viżjoni, u m’għadx għandi saħħa.
17 Allura jien, il-qaddej tiegħek, kif nistaʼ nitkellem miegħek, sidi? Għax jien m’għadx għandi saħħa u bilkemm nistaʼ nieħu nifs.”
18 Dak li kien jidher bħal raġel reġaʼ messni u saħħaħni.
19 Imbagħad qalli: “Tibżax, raġel prezzjuż* ħafna. Jalla jkollok il-paċi! Agħmel kuraġġ, iva, agħmel kuraġġ!” Hekk kif beda jkellimni ssaħħaħt u għedt: “Tkellem sidi, għax int saħħaħtni.”
20 Imbagħad qal: “Taf għala ġejt għandek? Issa sejjer lura biex niġġieled mal-prinċep tal-Persja. Meta nitlaq, se jiġi l-prinċep tal-Greċja.
21 Imma se ngħidlek l-affarijiet li huma mniżżlin fil-ktieb tal-verità. M’hemm ħadd li qed jappoġġani sew f’dawn l-affarijiet ħlief Mikiel, il-prinċep tagħkom.
Noti taʼ taħt
^ Letteralment “il-Ħiddekel.”
^ Jew “maħbub; stmat.”
^ Ifisser “Min Hu bħal Alla?”
^ Jew “maħbub; stmat.”
