Armagedõ na n yɩɩ wakat bʋgo?

“Mam gesame, la haya, kʋʋng n be be tɩ ned ka tõe n sõd n sɛ ye, sẽn yi soolem fãa, la buud fãa, la neb sẽn gomd goam toɛy-toɛyã fãa. . . . Bãmb yaa neb sẽn yi to-kãsengã pʋgẽ.”—WILGRI 7:9, 14.

YƐLÃ wilgdame tɩ Armagedõ ta n saame. Bõe yĩng tɩ d yet woto?

Bala masã menga, dũniyã gill zugu, neb milyõ rãmb n naag taab n maand a Zeova raabã, tɩ b yel-manesmã zemsd ne Biiblã noyã. Ne Wẽnnaam sõngre, nin-kãensã sẽn yit tẽns toor-toore, la b gomd buud-goam toor-toorã naaga taab n tũud-a, tɩ b sõorã tar paasgo. B lebga saam-biisi, tɩ nonglem hakɩk be b sʋka. Nin-kãensã yaa a Zeova Kaset rãmbã, la yaa bãmb sʋk la d yãt nonglem woto.—Zã 13:35.

Ka la bilfu, a Sʋɩtãan na n tigma a poorẽ dãmbã tɩ b wa zab ne a Zeova nin-buiidã sẽn nong laafɩ wã, n bao n na n menes-b fasɩ, sẽn wõnd b ka tar sõngdã yĩnga. (Ezekɩɛll 38:8-12; Wilgri 16:13, 14, 16) Bõe n kɩt tɩ d mi rẽ? Bala Biiblã wilgda yɛl kẽer sẽn na n zĩndi. Rẽ sõngda tõnd tɩ d bãng Armagedõ zabrã sẽn na n yɩ wakat ninga. Yel-kãensã wʋsg zoe n beeme.

Yɛl sẽn zoe n maandẽ

A Zezi karen-biisã ra sok-a lame n na n bãng bũmb nins sẽn na n wilg tɩ “dũniyã sɛɛb wakat” kolgame. (Matɩe 24:3) A Zezi yeel-b lame tɩ “buud a yembr na n yika zabr ne buud a to, la soolem ne soolem a to, la kom la tẽn-digimdug na n zĩnda zĩig-zĩiga.” Rẽ poore, a paasame tɩ “bõn-kãens fãa yaa tood sɩngr bala.” (Matɩe 24:7, 8) Tʋm-tʋmd a Poll boola wakat kãng tɩ “yaoolem wakate,” la a yeel me tɩ “tood na n zĩndame.” (2 Tɩmote 3:1) Yãmb pa ne tɩ yel-kãensã zoe n bee rũndã-rũndã sɩda?

Bõe yĩng tɩ tood na n zĩnd yaoolem wakatã? Tʋm-tʋmd a Zã leokame. A pĩnd  n togsame t’a Sʋɩtãan ne zĩn-dãmbã ra na n wa tʋmda b tʋʋmã dũniyã zug bala, la tɩ na n yɩɩ ‘wakat bilf’ pʋgẽ. A wilgame tɩ wakat kãnga, a Sʋɩtãan ‘sũ-puugrã na n yɩɩ kãsenga.’ (Wilgri 12:7-12) Yãmb pa ne tɩ zĩig zãnga, nebã yaa sũ-to-neba, la tɩ b pa zoet taab nimbãaneg sɩda?

A Zezi me wilgame tɩ yaoolem wakatã, tʋʋm-kãseng la b na n tʋme. A yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) A Zeova Kaset rãmbã moonda Wẽnnaam Rĩungã koe-noogã sẽn yɩɩd tẽns 235 pʋgẽ, ne buud-goam sẽn yɩɩd 500. Gũusg Gasgã ne Réveillez-vous ! wã sẽn yaa sɛb sẽn tik Biiblã zugã yaa bãmb n yiisdi. Dũniyã gill zugu, zʋrnall kae b sẽn pʋɩt zĩig fãa n ta seb-kãensã ye. A Zeova Kaset rãmbã lebga Biiblã ne sẽn ta buud-goam 100. B tʋmda tʋʋm-kãensã fãa ne yamleoogo. B ned baa a ye pa reegd yaood ye. Ligdã b sẽn paamd n tʋmd b tʋʋmã yaa nebã n kõt ne yamleoogo. Yãmb pa tagsd t’a Zeova Kaset rãmbã tʋʋmdã pidsda a Zezi gomdã sɩda?

Biiblã leb n wilga yɛl sẽn na n kɩt tɩ zabr yik Wẽnnaam a Zeova ne neb nins sẽn kɩɩsd-a wã sʋka. D gom yɛl a tãab sẽn na n zĩnd ka la bilf yelle.

Yɛl kẽer sẽn na n zĩnd ka la bilfu

Pipi. Biiblã yetame tɩ nanambsã na n wa yikame n moon tɩ “laafɩ la yĩn-maasem” waame. Tõe tɩ b na n tagsame tɩ b yaa n paama ãdem-biisã zu-loe-kãsemsã tɩɩm. La yɛl nins sẽn na n pʋgl b gomdã na n wilga vẽeneg tɩ laafɩ nan kae ye.—1 Tesalonik rãmba 5:1-3.

Yiib-n-soaba. Goosneem toor-toor na n yãka yam n zab ne dũni-kãngã tũudum toɛy-toɛyã. Biiblã pʋgẽ, b maka goosneem kãens ne “we-rũnga,” la b mak tũudum nins fãa sẽn yaa ziri wã ne paga, t’a zao we-rũngã. (Wilgri 17:3, 15-18) Goosneem kãensã na n sãama tũudum nins fãa sẽn yet tɩ b maanda Wẽnnaam daabã n yaool n maand sẽn pa tat a yamã. B na n maana woto n ka bãng tɩ yaa Wẽnnaam daab la b sẽn maanã ye.

Tʋm-tʋmd a Zã bilga rẽ sẽn na n yɩ to-to wã, n yeel woto: “Yɩɩl piigã fo sẽn yã wã, n paas rũngã na n kisga pʋg-yoodrã, n dees a futã n bas-a a zaala, la b wãb a nemdã la b ning-a bugum t’a rɩ tẽma. Bala, Wẽnnaam ninga bãmb sũyã pʋs tɩ b maan Wẽnnaam daabo.”—Wilgri 17:16, 17, Kãab-paalgã Koe-noogo.

Tãab-n-soaba. B sã n sãam tũudum kãensã n sa, a Sʋɩtãan na n pirsa goosneem dãmbã ne b sodaasã tɩ b zab ne tũudum hakɩkã neb sẽn yaa Wẽnnaam a Zeova nin-buiidã.—Wilgri 7:14; Matɩe 24:21.

Y sẽn tõe n maanega

Yãmb sã n nan pa paam n zãms Biiblã sõma, tõe n yɩɩ toog ne-y tɩ y sak n deeg tɩ bũmb nins d sẽn togsã na n yɩɩ sɩda. La y tõe n kɩsa sɩd tɩ bõn-kãensã fãa na n pidsa ka la bilfu. Bala Biiblã goam wʋsg b sẽn togs pĩndã zoe n pidsame. *

Yaa sõma tɩ y modg n bao n bãng bũmb ning sẽn kɩt t’a Zeova Kaset rãmbã kɩs sɩd tɩ “Wẽnnaam Sẽn-tõe-fãa da-kãsengã zabrã” ta n saame wã, la y bao n bãng bũmb ning sẽn kɩt tɩ y pa tog n yɛɛsã. Kos-y-yã a Zeova Kaset soab t’a wa tall Biiblã n sõng-y tɩ y bãng bũmb ning y sẽn segd n maan n paam n naag a Zeova nin-buiidã. (Wilgri 16:14) Y sẽn na n bãng bũmb ningã tõe n toeema y sẽn tagsd to-to beoog daarã zugã.

[Tẽngr note]

[Foto, seb-neng a 8]

Yãmb pa tagsd t’a Zeova Kaset rãmbã tʋʋmdã pidsda Biiblã bãngr-gomd sɩda?