Pẽgr maand sẽn tat a Zeova yam
Pẽgr maand sẽn tat a Zeova yam
“Kõ[-y] y yĩnsa tɩ yɩ maan-vɩɩs sẽn yaa sõma la sẽn zems Wẽnnaam yam.”—ROM DÃMBA 12:1.
1. Bõe la Biiblã yet maand nins b sẽn da maand a Moiiz Tõogã sasa wã yõod sẽn da tar koakã wɛɛngẽ?
“TƖ BÕE, tõog yaa bõn-neeba sẽn wat maasem la a ka bãmb meng ye. A ka tõe n kɩt tɩ maand nins neb sẽn maand yʋʋmd-yʋʋmde n ka basdẽ wã maan bãmb tɩ b zems zãng abada.” (Hebre dãmba 10:1) Beenẽ, togs-kãseng a yembr pʋgẽ, tʋm-tʋmd a Poll sɩd wilgdame tɩ maand nins fãa b sẽn da kõt a Moiiz Tõogã sasa wã yõod ra pa kaoosd wakat fãa, sã n yaa ne ninsaal fãagrã ye.—Kolos rãmba 2:16, 17.
2. Bõe yĩng tɩ pa zaalem yĩng tɩ d modg n wʋm bãngrã yel-bõones nins sẽn be Biiblã pʋgẽ sẽn tɩ loe ne Tõogã kũunã la a maandã võore?
2 Woto rat n yeelame tɩ bãngr ning sẽn be Pãntatekã pʋgẽ sẽn tɩ loe ne kũunã la maandã pa tar yõod ne kiris-nebã rũndã-rũndã bɩ? Sɩda, sẽn yɩɩd yʋʋmd pʋgẽ bilfu, neb nins sẽn kẽes b toog Teokaratik Ministɛɛr Lekollã pʋgẽ a Zeova Kaset rãmbã tigimsẽ dũniyã gill zug karma Biiblã pipi sɛb a nu wã sẽn pa kaoose. Kẽer modga neer n karem la b wʋm a yel-bõonesa fãa võore. B modgrã fãa yɩɩ zaalem bɩ? Sɩd-sɩda pa tõe n yɩ woto ye, bala “bũmb fãa sẽn gʋls pĩnda gʋlsa tõnd zãmsg yĩnga, tɩ tõnd tõe n gũ tõnd tẽeb pidsg ne sũ-mare la ne Gʋlsg Sõamyã belsgo.” (Rom dãmba 15:4) Rẽnd sʋkrã la woto: ‘Zãmsg’ la ‘belsg’ bʋg la d tõe n paam ne bãngr wʋsgã sẽn yit Tõogã yɛl sẽn tɩ loe ne kũunã la maandã pʋsẽ?
Tõnd zãmsg la d belsg yĩnga
3. Ratem kãseng bʋg la d tara?
3 Baa ne b sẽn pa baood tɩ d kõ maand sɩd-sɩd wa Tõogã sẽn da togs to-to wã, d ket n data bũmb ning maandã sẽn da maand n kõt Israɛll nebã sõma-sõma, sẽn dat n yeel tɩ n paam d yel-wẽnã sugr la d paam Wẽnnaam lohorem. Tõnd sẽn ye pa kõt maand sɩd-sɩdã yĩnga, wãn-wãn la d tõe n paam nafa kãense? A Poll sẽn wilg rũmsã maand pãng tɛkã poore, a yeelame: “Kirist sẽn wa dũniyã zugã, bãmb yeelame yaa: ‘Yãmb ka rat maoong bɩ kũun ye. Yãmb segla yĩng n kõ maam. Maand sẽn yõogd bugum wala yel-wẽna maand ka noom yãmb ye. Dẽ, mam yeelame yaa: ‘Gese, Wẽnnaam, mam waame n na n maan yãmb daabo. Yõ wã gʋlsa sebr pʋgẽ mam yĩnga.’ ”—Hebre dãmba 10:5-7.
4. Wãn-wãn la a Poll wilgd tɩ Yɩɩl Sõamyã 40:7-9 goamã pidsa a Zezi zugu?
4 A Poll lebs n dɩka goam nins sẽn yit Yɩɩl Sõamyã 40:7-9 pʋgẽ, n wilg t’a Zezi pa wa n na n yɩlem “maoong bɩ kũun[i],” “maand sẽn yõogd bugum wala yel-wẽna maand” ye. Bõn-kãens fãa ra pa leb n tat Wẽnnaam yam a Poll sẽn da wa n gʋlsd sasa ningã ye. Sẽn yaa lebende, a Zezi waa ne yĩng a yĩngr Ba wã sẽn segle, yĩng sẽn zems bũmb fãa wɛɛngẽ ne a soab ning Wẽnnaam sẽn segle, A sẽn da wa n naan a Ãdmã. (Sɩngre 2:7; Luk 1:35; 1 Korẽnt dãmba 15:22, 45, NW ) A sẽn yaa Wẽnnaam Biribl sẽn zems zãnga, a Zezi ra yaa paga “yageng” b sẽn da reng n togs a waoong Sɩngre 3:15 pʋgẽ wã. A ra na n wa ‘bedsa a Sʋɩtãan zugã,’ ba a Zezi mengã sã n da na n paama ‘poglg a nao-kãsengkãarẽ wã.’ Woto, a Zezi lebga bõn-tũnugdg ning a Zeova sẽn kõ ãdem-biisã fãagr yĩngã, tɩ tẽeb nebã ra sɩng n gẽegdẽ, sẽn sɩng ne a Abɛll wakatã.
5, 6. Manesem bʋg sẽn yaa kãseng n yɩɩd la kiris-nebã tõe n tũnug ne n kolg Wẽnnaam?
5 A Poll goma a Zezi tʋʋmdã sẽn pa wõnd a taabã yell n yeele: “Bãmb kɩtame tɩ sẽn ka mi-a yel-wẽna lebg yel-wẽna tõnd yĩnga; tɩ tõnd tõe n lebg Wẽnnaam tɩrlem bãmb maasem yĩnga.” (2 Korẽnt dãmba 5:21) Gomd ning sẽn yaa “kɩtame tɩ . . . lebg yel-wẽna” b tõe n lebg-a lame me tɩ ‘kɩtame tɩ lebg kongr maoongo.’ Tʋm-tʋmd a Zã yeelame: “Bãmb menga yɩɩ maoong tõnd yel-wẽna yĩnga, ka tõnd yel-wẽna yĩng bal ye, la dũniyã neba fãa yel-wẽna yĩng me.” (1 Zã 2:2) Woto yĩnga, Israɛll nebã ra tara bõn-tũnugdg sẽn yaa wakat bilf rẽnd n na n kolg Wẽnnaam ne b maandã, la kiris-nebã tara yẽbgr sẽn yaa kãseng n yɩɩd n na n pẽneg Wẽnnaam: ya a Zezi Kirist maoongã. (Zã 14:6; 1 Pɩɛɛr 3:18) D sã n tar tẽeb ne yao-n-dɛɛk maoong ning Wẽnnaam sẽn kõ wã la d sak A noorã, tõnd me tõe n paama d yel-wẽnã sugr la d paam Wẽnnaam lohorem la a barka. (Zã 3:17, 18) Woto pa bũmb sẽn kõt belsg sɩda? La wãn-wãn la d tõe n wilg tɩ d tara tẽeb ne yao-n-dɛɛk maoongã?
6 A sẽn wilg tɩ kiris-nebã tara yẽbgr sẽn yaa kãseng n yɩɩd n na n pẽneg Wẽnnaamã poore, Hebre dãmba 10:22-25 pʋgẽ, tʋm-tʋmd a Poll wilgda manesem a tãab d sẽn tõe n tũnug ne n wilg d tẽeb la d naneb ne Wẽnnaam seglsã a sẽn dɩk ne nonglmã. Baa ne a Poll saglgã sẽn pak neb nins sẽn “paam lohorem tɩ kẽ zĩ-sõng n yɩɩda pʋgẽ” pipi wã, sẽn yaa kiris-neb nins sẽn zae-ba sẽn tar saasẽ boollã, sɩd-sɩda, ãdem-biisã fãa segd n kelga a Poll goamã vʋʋsem sõng sẽn vẽneg t’a gʋlsã, b sã n dat n dɩ a Zezi yao-n-dɛɛk maoongã nafa.—Hebre dãmba 10:19.
Kõ-y maand sẽn yaa yɩlem n ka rẽok ye
7. a) Wãn-wãn la Hebre dãmba 10:22 wilgd bũmb ning b sẽn da maand maoong pʋgẽ wã? b) Bõe la b ra segd n maan n kɩs sɩd tɩ maoong ra sakda reegr Wẽnnaam taoore?
7 Pipi, a Poll sagla kiris-nebã: “Bɩ tõnd kolg ne sũur sẽn yaa sɩda, sẽn pid ne tẽeb zãnga, la sũur sẽn lebg sõama tɩ kaset wẽng kaẽ ye, la yĩns sẽn paam soob ne koom sẽn yaa sõama.” (Hebre dãmba 10:22) Sãmbg sẽn ka be, goam manesem buud b sẽn tũnug ne ka wã pukda bũmb ning b sẽn da maand maoong pʋgẽ Tõogã sasa. Woto zemsame, bala sẽn na yɩl tɩ maoong sak reegre, b ra segd n kõ-a-la ne yam-sõng la a ra segd n yɩɩ bũmb sẽn yaa yɩlemd n ka tar dẽok ye. Rũng ning b sẽn kõt tɩ yɩ maoongã ra yita rũm-bãgrẽ, sẽn dat n yeel tɩ rũms sẽn yaa yɩlmẽ, la sẽn yaa “sõama zãng fasɩ” n pa tar zang ye. Maoongã sã n da yit bõn-yɩgdɩ wã sʋka, a ra segd n yɩɩ marwall bɩ wal-polle. Bõn-kãensã b sẽn baoodã sã n da pidi, “Zusoaba na reeg-a la b kõ yẽ sugri.” (Maankʋʋre 1:2-4, 10, 14; 22:19-25) Ka-bɛɛl kũunã ra pa tar dabɩlle, sẽn da makd sãoongã ye. A ra leb n pa tar sɩɩdo, tõe tɩ yaa tɩɩs biis koom, sẽn tõe n wa mikã ye. B sã n wa kõ maandã, rũmsã bɩ ka-bɛɛlã tẽn-kugrã zugu, b ra paasda yamsem sẽn yaa bõn-kogendgã.—Maankʋʋre 2:11-13.
8. a) Bõe la b ra baood tɩ ned ning sẽn maand kũun maane? b) Wãn-wãn la d tõe n kɩs sɩd tɩ d balengã sakda reegr a Zeova taoore?
8 Yaa wãn to yẽ ne ned ning sẽn da maand kũunã? Tõogã ra yetame tɩ ned ning sẽn wat a Zeova taoor da segd n yɩɩ yɩlemd n pa tall rẽok ye. Ned ning sẽn da yɩ rẽgd bʋʋm sẽn ya a soab fãa yĩng ra segd n deng n kõo kũun yel-wẽnã yĩng bɩ taal kũun n lebs n yɩ yɩlemd a Zeova taoore, sẽn na yɩl t’a maoong sẽn yõogd bugma bɩ a laafɩ maoongã tõog n sak A reegre. (Maankʋʋre 5:1-6, 15, 17) Woto yĩnga, d neeme tɩ tara yõod wakat fãa tɩ d yɩ yɩlemd a Zeova taoor bɩ? Tõnd sã n dat tɩ d baleng sak reegr Wẽnnaam taoore, d segd n yɩɩ tao-tao n dems d mens zĩis nins d sẽn kɩɩsẽ Wẽnnaam tõodã. D segd n yɩɩ tao-tao n tũnug ne soay nins Wẽnnaam sẽn tũnugd ne n kõt sõngrã: “tẽedba kãsem dãmba” la “maoong tõnd yel-wẽna yĩnga,” a Zezi Kirist.—Zak 5:14; 1 Zã 2:1, 2.
9. Bõe n da welg maand nins b sẽn da maand n kõt a Zeova wã ne b rãmb nins b sẽn da kõt ziri wẽnnaam dãmbã?
9 B sẽn wilg n yɩlem tɩ rẽgeng buud ba a yembr da zĩndã, sɩd ra yaa bũmb sẽn welg maand nins b sẽn da kõt a Zeova wã ne maand nins bu-zẽms neb nins sẽn gũbg Israɛllã sẽn da kõt ziri wẽnnaam dãmbã wʋsgo. Sebr a yembr wilga maand nins b sẽn da maand a Moiiz Tõogã sasa wã yel-zẽngdg kãngã woto: “D tõe n yãame tɩ b ra pa maand bagre, beoog yɛl togsgo, tũudum yel-zũndri, meng yĩns wãabo, bɩ yoob balengã yĩnga, rogem baoob yel-maandɩ sẽn naag ne reem la yão-beed b sẽn gɩdg vẽenegã ye. B ra pa maand ninsaalb maando, la maand sẽn ki-bã yĩng ye.” Rẽ fãa kɩtdame tɩ d bãng bũmb a yembre: a Zeova yaa sõngo, la a gɩdgame bɩ a pa sakd yel-wẽng bɩ wẽng buud ba a yembr ye. (Habakuk 1:13) Baleng la maand nins b sẽn kõt-a wã segd n yɩɩ yɩlem tɩ rẽgeng yĩngã, vɩɩm manesmã la tẽebã wɛɛngẽ ka be b pʋsẽ ye.—Maankʋʋre 19:2; 1 Pɩɛɛr 1:14-16.
10. Wa sẽn tɩ zems ne a Poll saglg ning a sẽn gʋls Rom dãmba 12:1, 2 pʋgẽ wã, vaees-m-meng bʋg la d segd n maane?
10 Rẽ wã yĩnga, d segd n vaeesa d mens vɩɩmã nens fãa pʋsẽ n gese, n kɩs sɩd tɩ d sẽn sõgend a Zeova wã sakda a reegre. D pa segd n tol n tags tɩ d sẽn kẽesd d mens kiris-neb tigissẽ wã la ministɛɛrã pʋgẽ wã, tõnd sẽn maand bũmb ning fãa d mengã vɩɩmẽ wã pa yell ye. D pa segd n tags me tɩ kẽes d mens kiris-neb tʋʋmẽ wã kõt-d-la bʋʋm ne manesem buud tɩ d pa tũ Wẽnnaam noyã d vɩɩmã nens a taab pʋsẽ ye. (Rom dãmba 2:21, 22) D pa tõe n saag n paam Wẽnnaam barkã la a lohormã, d sã n bas tɩ bũmb sẽn pa yɩlemd bɩ sẽn yaa rẽgd bẽeg d tagsgã bɩ d tʋʋmã ye. Ning-y a Poll gom-kãensã y yamẽ: “M ba-biisi, mam kota yãmb ne Wẽnnaam ninbãan-zoeere, tɩ y kõ y yĩnsa tɩ yɩ maan-vɩɩs sẽn yaa sõma la sẽn zems Wẽnnaam yam. La yõ wã zemsa yãmb maanego. Bɩ y ra yɩ wa dũniyã rãmb ye, bɩ y bas tɩ Wẽnnaam tek yãmb yama n maneg y zãnga tɩ y bãng Wẽnnaam daab sẽn yaa sõama, la sẽn tat bãmb yam, la sẽn zems zãnga.”—Rom dãmba 12:1, 2.
Kõ-y pẽgr maand ne y sũyã fãa
11. Bõe me n be gomd ning sẽn yaa “togsg zãma sʋkã” sẽn be Hebre dãmba 10:23 (NW ) pʋgẽ wã pʋgẽ?
11 A Poll sẽn da gʋlsd Hebre dãmbã, a kẽnga taoor n tak b yamã n sik baleng hakɩkã nen-kãseng zug woto: “Bɩ tõnd gãd d saagrã togsg zãma sʋkã kãn-kãe n da yuus ye, bala sẽn kãab-a wã yaa sɩd soaba.” (Hebre dãmba 10:23, NW ) Gomd ning sẽn yaa “togsg zãma sʋkã” rat n yeela sɩd-sɩd tɩ “tẽeb togsgo,” la a Poll ra gomda ‘maand sẽn yaa pẽgrã’ me yelle. (Hebre dãmba 13:15) Rẽ tẽegda tõnd maoong buud ning roap wala a Abɛlle, a Nowe la a Abrahaam sẽn kõ wã yelle.
12, 13. Bõe la Israɛll ned ra sakd n deege, a sã n da kõ maoong sẽn yõogd bugum, la bõe la d tõe n maan n puk yam-kãng buudu?
12 Israɛll ned sã n kõ maoong sẽn yõogd bugum, a ra maanda rẽ “ne a meng yam yãkr a Zeova taoore.” (Maankʋʋre 1:3, NW ) Ne maoong a woto, a saka ne yamleoog n na n togs zãma sʋk bɩ n sak n deeg a Zeova bark wʋsgã la a sõmblmã ne a nin-buiidã. Tẽeg-y tɩ maoong sẽn yõogd bugmã bõn-zẽngdg ra yaa b sẽn yõogd maoongã zãng tẽn-kugrã zugã, tɩ rẽ ra yaa makr sẽn zems ne wẽn-sakr la rɩk-m-meng-n-kõ zãng-zãngã. Woto me, d wilgda d tẽeb ne yao-n-dɛɛk maoongã la d mi-beoogã segl-kãng yĩngã, d sã n sak ne yamleoog la ne d sũyã fãa n kõ a Zeova d “maand . . . sẽn yaa pẽgre, sẽn dat n togse tɩ d kɩs kaset ne noor goama.”
13 Sɩda, kiris-nebã pa kõt maand sɩd-sɩd wala rũms bɩ ka-bɛɛl ye, la b tara zɩɩb n na n kõ kaset Rĩungã koe-noog zugu, la b maan karen-biis n kõ a Zezi Kirist. (Matɩe 24:14; 28:19, 20) Yãmb tũnugda ne soay nins y sẽn paama n na n kẽes y toog n moon Wẽnnaam Rĩungã koe-noog zãma sʋka, sẽn na yɩl tɩ neb wʋsg sẽn paas wa paam n bãng bõn-kãsems nins Wẽnnaam sẽn tar ãdem-bi-sakdbã yĩngã bɩ? Yãmb rɩkda y sẽkã la y pãngã ne yamleoog n zãmsd neb nins sẽn wilgd ratmã, la y sõngd-b tɩ b lebgd a Zezi Kirist karen-biis bɩ? Tõnd sẽn kẽesd d mens ministɛɛrã pʋgẽ ne yẽesmã tata Wẽnnaam yam wala maoong sẽn yõogd bugum yũ-noogã.—1 Korẽnt dãmba 15:58.
Kɩdm-y ne y lagem-n-taarã ne Wẽnnaam la ne ninsaalbã
14. Wãn-wãn la a Poll goam nins sẽn be Hebre dãmba 10:24, 25 pʋgẽ wã wõnd laafɩ maoongã?
14 Sẽn na n baase, a Poll takda tõnd yamã n sikd tõnd zems-n-taarã ne d kiris-nin-taasã zugu, d sẽn yaa Wẽnnaam balemdbã. “Bɩ tõnd tẽeg taab yelle la d yik taab ratem tɩ maan nonglem la tʋʋm sõama. Bɩ d da bas taab tigung wa neb kẽer sẽn maanda ye. La bɩ d sagl taaba [raool taaba, NW ], la bɩ d sagl n yɩɩd tõnd sẽn yã tɩ daar kolgdame wã yĩnga.” (Hebre dãmba 10:24, 25) Goam nins sẽn yaa “yik taab ratem tɩ maan nonglem la tʋʋm sõama” wã, “taab tigung” la “raool taaba,” fãa tẽegda tõnd laafɩ kũunã sẽn da maan bũmb ning Israɛll n kõ Wẽnnaam nin-buiidã.
15. Bõe wõneg la d ne lagem-n-taar maoongã la kiris-neb tigissã sʋka?
15 Gomd ning sẽn yaa “lagem-n-taar kũunã,” (NW ) b lebg-a-la wakat ning tɩ “laafɩ kũuni.” Hebre gom-biig ning sẽn yaa “laafɩ” wã yaa yagr gom-biig ka, tɩ tõe t’a rat n yeelame tɩ lagem n dɩ maand a woto wata ne laafɩ ne Wẽnnaam la laafɩ ne balem-taasã. Lagem-n-taar maoongã wɛɛngẽ, mit a yembr wilgdame: “Sɩda, woto ra yaa tũud-n-taar sẽn be sũ-noog ne Kaoolã Wẽnnaam, tɩ pʋgẽ be bɩ A sakd n lebg Israɛll Sãan maoongã rɩɩbẽ, ba A sẽn da yaa b Sãambrɛɛgd wakat fãa wã.” Rẽ tẽegda tõnd a Zezi kãabgã: “Zĩig ninga neb a yiibu bɩ a tãab sẽn tigim taab ne mam yʋʋre, mam bee bãmb sʋka.” (Matɩe 18:20) Tõnd sã n kẽng kiris-neb tigisgẽ fãa, d paamda nafa sẽn yit lagem-n-taar sẽn kengd tẽebã, zãmsg sẽn kengd raoodã, la d sẽn mi tɩ d Soaal a Zezi Kirist bee ne-dã pʋgẽ. Rẽ kɩtdame tɩ kiris-neb tigisg sɩd kõt sũ-noog la a yaa sasa sẽn kengd tẽebo.
16. Ne laafɩ maoongã d yamẽ, sẽn yɩɩd fãa, bõe n kɩt tɩ kiris-neb tigissã tar sũ-noogo?
16 Laafɩ maoongã pʋgẽ, kaamã fãa, kaam ning sẽn gãneg yãadã, yaam-biisã, sãoorã kaam ne yiima wã kaam, n paas pesgã zʋʋr sẽn tar kaama, b ra rɩkda rẽ fãa n kõ a Zeova n yõog bugum, n yõog-a tẽn-kugrã zug t’a bug-zõosdã ruki. (Maankʋʋre 3:3-16) B ra geta kaamã wa rũngã babg ning sẽn dɩlgd yĩns la sẽn yaa sõma n yɩɩdã. B yõogrã tẽn-kugrã zugã ra yaa makr tɩ b rɩka sẽn yaa sõma n yɩɩdã n kõ a Zeova. Sẽn yɩɩd fãa, bũmb ning sẽn kɩt tɩ kiris-neb tigissã kõt sũ-noogã pa d sẽn deegd zãmsgã bal ye, la yaa d sẽn kõt a Zeova pẽgr me wã yĩnga. D maanda woto n kẽes d toog wa d sẽn tõe tɛka, baa ne a sẽn paoodã, n yɩɩl ne d sũy fãa, n kelg sõma, la d kõ leoore, sã n tõe. Yɩɩl-gʋlsdã zẽka a koɛɛg n yeel woto: “Pẽg-y Zusoabã [a Zeova, NW ]. Bɩ y yɩɩl yɩɩn-paalg Zusoaba yĩnga, yɩɩl n pẽg-y bãmb b neba tigung pʋgẽ.”—Yɩɩl Sõamyã 149:1.
Bark wʋsg sẽn yit a Zeova nengẽ n gũud tõndo
17, 18. a) Maoong sẽn yaa kãseng bʋg la a Salomo maan wẽn-doogã pakrẽ Zerizalɛm? b) Bõe bark la wẽn-doogã pakr kibs wa ne nin-buiidã zugu?
17 Zerizalɛm wẽn-doogã pakrẽ, yʋʋmd 1026 S.D.T.W. kiuug a yopoe soabã pʋgẽ, Rĩm a Salomo kõo “maand kãsems a Zeova taoore.” Maand kãens yɩɩ “maand sẽn yõogd bugum la ka-bɛɛl kũun la laafɩ maandã nem kaam.” Sẽn paas bũmb ning b sẽn da kõt ka-bɛɛl kũunã pʋgẽ wã, niig 22 000 la piis 120 000 la b kʋ n maan maand sasa kãnga.—1 Rĩm dãmba 8:62-65, NW.
18 Y tõe n mamsa laog ning b sẽn yiisi, la tʋʋm-kãseng ning b sẽn tʋm pakrã kibs kẽeng a woto sasa wã sɩda? La vẽenega, bark nins Israɛll sẽn paama yɩɩda laog ning b sẽn dɩk n kẽes a pʋgẽ wã zĩig sẽn zãre. Kibs rãmbã saabẽ, a Salomo “kɩtame tɩ neba kuili. Bãmb pʋʋsa rĩma bark n kuil ne sũ-noog bõn-sõama nins fãa Zusoaba sẽn maan n kõ b tʋm-tʋmd a Davɩɩd ne Israɛll neba yĩnga.” (1 Rĩm dãmba 8:66) Sɩd-sɩda, wa a Salomo sẽn yeelã, “a Zeova barkã n kɩtd tɩ ned yɩ arzɛk soaba, la a ka paasd toog ne rẽ ye.”—Yelbũna 10:22, NW.
19. Bõe la d tõe n maan n paam bark kãsems sẽn yit a Zeova nengẽ masã la wakat sẽn pa sate?
19 Tõnd vɩɩ wakat ning b sẽn ledg “bõn-neeba sẽn wat[ã] maasem” ne “bõn-kãens menga.” (Hebre dãmba 10:1, NW) A Zezi Kirist sẽn yaa rũndã-rũndã Maankʋʋd-Kãsmã zoe n kẽe saasẽ mengã n wilg a mengã zɩɩm yõod sẽn na yɩl n maan paasgo, neb nins fãa sẽn tar tẽeb ne a maoongã yĩnga. (Hebre dãmba 9:10, 11, 24-26) Maoong kãseng kãng yẽbgr zugu, d sã n kõt Wẽnnaam d pẽgrã maand sẽn yaa yɩlem n pa tar dẽokã ne d sũyã fãa, tõnd me tõe n kẽnga taoor ne “sũ-noog[o],” n gẽegd bark wʋsg nins sẽn yit a Zeova nengẽ wã.—Malaki 3:10.
Wãn to la y na n leokẽ?
• Zãmsg la belsg bʋg la d tõe n paam Tõogã yɛl sẽn tɩ loe ne maandã la kũunã pʋgẽ?
• Sẽn na yɩl tɩ maoong sak reegre, bõe la b baood pipi, la a võor ne tõnd yaa bõe?
• Bõe la d tõe n kõ tɩ wõneg maoong sẽn yõogd bugum b sẽn kõ ne yamleoogã?
• Wãn to la b tõe n dɩk kiris-neb tigissã n mak ne laafɩ kũuni?
[Zãmsgã sogsgã]
[Foto, seb-neng 14]
Tõnd sã n dat t’a Zeova sak d sõgenegã, d segd n yɩlga d mens ne rẽgeng buud fãa
[Foto, seb-neng 15]
D sakd n deega a Zeova sõmblmã zãma sʋka, d sã n kẽes d meng ministɛɛrã pʋgẽ
[Foto, seb-neng 16]
A Zezi yao-n-dɛɛk maoongã ya a Zeova n kõ, ãdem-biisã fãagr yĩnga