KOƐƐGÃ tõnd sẽn moondã tara yõod wʋsgo. La pa neb nins fãa sẽn kelgd tõndã n mi rẽ ye. Baa ned sã n kelg koɛɛgã tɩ yɩ-a noogo, a tõeeme n pa neẽ tɩ tara yõod t’a sak tɩ d zãms-a Biiblã ye.

Yɩɩ woto ne a Gavin. A ra kẽnda tigissã, n yaool n tõdg tɩ b kõn zãms-a Biiblã ye. Ad a sẽn yeele: “Mam da pa mi bũmb wʋsg Biiblã pʋgẽ, n da zoet b na n wa bãnge. Mam leb n da yɛɛsda b na n wa belg-ma, wall b wa rat tɩ m kẽ b tũudmã.” Bõe n da na n sõng a Gavin t’a toeem yam? Yaa a sã n bãng Biiblã zãmsg sẽn tõe n naf-a to-to wã. Pĩnd wẽndẽ, a Zeova yeela a nin-buiidã woto: “Bɩ m goamã rʋʋg wa meenem, wa sa-luk sẽn madgd moogo.” (Tõo. 31:19, 30; 32:2) Sõs-kãngã pʋgẽ, d na n goma meenem yelle, la d ges bũmb ning sẽn kɩt tɩ d tõe n mak koɛɛgã d sẽn moondã ne meenemã. Rẽ, d bãngda d sẽn tõe n maan to-to t’a naf neb buud fãa.—1 Tɩm. 2:3, 4.

Meenem tosda bilf-bilfu. Meenem pa rʋʋgd vugr ye. Yaa bilf-bilfu. A Zeova goamã yaa ‘wa meenem’ sẽn dʋʋgde, bala, a sã n gomd ne a nin-buiidã, a gomda ne bʋgsem, la ne waoogre. Ned sã n togsd tõnd a tagsgo, tɩ d maag d yĩng n kelg-a tɩ wilg tɩ d waoog-a lame, d rɩka a Zeova togs-n-taare. Koe-moonegã sasa, d sõngda d kɛlgdbã tɩ b tags neere, n tõog n wʋm d sẽn yet-bã võore. D sã n sɩd maand woto, d goamã kẽeda b sũuri, tɩ d koe-moonegã womd biisi.

Meenem bʋkda zĩiga. D sã n bao n bãng d sẽn na n taas nebã koɛɛgã to-to tɩ yɩ-b noog hal tɩ b rat n bãng n paase, koɛɛgã na n bʋka b sũyã wa meenem sẽn bʋkd zĩiga. A Gavin sẽn tõdg t’a kõn zãms Biiblã, a Chris sẽn yaa saam-biig ning sẽn da tʋlg n na n zãms-a Biiblã pa modg-a ye. A baoa a sẽn tõe n maan to-to tɩ Biiblã zãmsg yamleoog kẽ-a. A Chris wilga a Gavin tɩ koɛɛg n be Biiblã pʋgẽ n tar yõod wʋsgo, la t’a sã n bãng rẽ, a na n wʋma sõssã a sẽn kelgd tigissã sasa wã võor sõma. Rẽ poore, a yeela a Gavin tɩ yaa yẽ sẽn wa n bãng tɩ Biiblã bãngr-goam sɩd pidsdame wã la a sẽn sak n deeg tɩ Biiblã goam yaa sɩdã. Woto kɩtame t’a Gavin sak tɩ b seg taab naoor wʋsg n sõs Biiblã bãngr-goam zugu. Sõs-kãens yɩ-a-la noogo, t’a yãk yam n sɩng Biiblã zãmsgo.

Meenem sõngdame tɩ tɩɩsã la moodã ra ki ye. Israyɛll soolmẽ wã, sɩpaolgo, saagã tõe n maana kiis n pa ni ye. Wakat kãnga, meenemã sõngdame tɩ tɩɩsã la moodã pa kiidẽ ye. A Zeova ra yeelame tɩ tõnd wakatã, war buud n na n zĩndi, rat n yeel tɩ yẽ goamã kelgr “ko-yũud” na n yõka nebã. (Amoos 8:11) La a pʋlmame tɩ sẽn paam-b vʋʋsem sõng zaeebã na n yɩɩ wa “meenem” sẽn yit yẽ nengẽ, bala, bãmb ne neb nins a Zeezi sẽn bool t’a ‘piis a taabã’ na n naaga taab n moon Rĩungã koe-noogã. (Mii. 5:6; Zã 10:16) Yaa a Zeova n kɩt tɩ tõnd moond koɛɛgã, tɩ sõngd neb nins sẽn dat ne b sũur fãa n bãng a raabã tɩ b na n wa paam n põse. Rẽ yĩnga, tõnd me tẽegdame tɩ koɛɛgã d sẽn moondã yaa yõor yell bɩ?

Meenem yaa bark sẽn yit a Zeova nengẽ. (Tõo. 33:13) Koɛɛgã tõnd sẽn moondã me tõe n nafa d kɛlgdbã, tɩ b bãng tɩ yaa bark sẽn yit a Zeova nengẽ. Sɩd yɩɩ woto ne a Gavin. Biiblã zãmsg sõng-a lame t’a paam a sogsgã fãa leoore. Pa yã n kaoos la a reeg lisgu, tɩ yẽ ne a pag a Joyce naagd taab n moond Rĩungã koe-noog masã.

D sẽn mak koɛɛgã tõnd sẽn moondã ne meenemã tõe n sõng-d lame me tɩ d bãng tɩ modgr ning tõnd ned kam fãa sẽn maand koe-moonegã pʋgẽ wã tara yõodo. Bõe yĩnga? Bala, meenem bilf pa tõe n bʋk zĩig sõma ye. La sã n yaa wʋsgo, bʋkda zĩig sõma. Woto me, tõnd d ye sẽn maand koe-moonegã pʋgẽ wã tõe n wõnda paoodame. La d sẽn yaa milyõ-rãmb n moondẽ wã kɩtame tɩ koɛɛgã tat “dũni gill fãa.” (Mat. 24:14) Y na n tõogame tɩ koɛɛgã y sẽn moondã naf nebã, tɩ sɩd yɩ bark sẽn yit a Zeova nengẽ bɩ? Sã n yaa rẽ bɩ y modg n gomd ne bʋgsem, tɩ kẽed nebã n bʋkd b sũyã, la sõng-b tɩ b wa paam n põse.