Wẽeneg yaa ned sẽn na n pʋlem ne Wẽnnaam yʋʋr t’a na n pidsa bũmbu. Tõe n yɩɩ gomd a sẽn togs ne noore, bɩ a sẽn gʋlse.

Neb kẽer tagsdame tɩ wẽeneg pa sõma, bala a Zeezi yeelame: “Ra wẽen-y a bada . . . Bɩ yãmb ‘N-yẽe’ yɩ n-yẽe, tɩ y ‘Ayo’ yɩ ayo. Bala, sẽn zʋʋg rẽ yita wẽng soabã nengẽ.” (Mat. 5:33-37) Yaa vẽeneg t’a Zeezi ra miime t’a Moyiiz tõogã ra kõta sor tɩ b tõe n wẽen yɛl kẽer wɛɛngẽ. Pĩnd wẽn-sakdb kẽer sɩd maana woto. (Sɩng. 14:22, 23; Yik. 22:9, 10) A ra miime me t’a Zeova mengã ra mi n wẽename. (Ebre. 6:13-17) Dẽnd a Zeezi ra pa rat n yeel tɩ d ra tol n wẽen ye. A ra rat n keooga nebã tɩ b ra wẽend bõn-yaals yĩnga, wall bũmb sẽn pa zems yĩng ye. D sã n yeel tɩ d na n maana bũmbu, d segd n sɩd pids-a lame, bala yaa woto la a Zeova rata.

La b sã n wa yeel yãmb tɩ y wẽene? Pipi, sok-y y meng n gese, y sã n sak n wẽene, y na n tõog n sɩd pidsame bɩ? Y sã n getame tɩ yaa toog tɩ y tõog n pidsi, yɩta sõma tɩ y ra wẽen ye. Wẽnnaam Gomdã yetame: “Fo sẽn ka pʋlem n são fo sẽn na n pʋlem n yaool n ka pids ye.” (Koɛ. 5:4) Yiibu, bao-y n bãng-y Biiblã sẽn yet bũmb ning y sẽn dat n wẽenã zugu, tɩ y sũur-kasetã sã n kõt-y sore, bɩ y tũ. D ges Biiblã sagls a wãn rẽ wɛɛngẽ.

Wẽeneg kẽer pa kɩɩsd Wẽnnaam raabã ye. Wala makre, a Zeova Kaset rãmbã pʋlemda taab bũmb kẽere, b kãadmã raare. Pʋleng a woto yaa wa wẽenego. Pagã ne a sɩdã pʋlemda taab Wẽnnaam la nebã taoor tɩ b na n nonga taab ne b sũur fãa, la b waoogd taab wʋsgo, la tɩ b na n kell n maana woto b “yõor tɛka.” (Yi-kãadb kẽer tõeeme n pa togs gom-kãensã kɛpɩ ye. La b maanda taab pʋleng Wẽnnaam taoore.) Rẽ poore, b yet-b lame tɩ b lebga pag ne a sɩda, la tɩ b segd n zĩnda ne taab b yõor tɛka. (Sɩng. 2:24; 1 Kor. 7:39) Pʋleng a woto zemsa ne Wẽnnaam raabã.

Wẽeneg kẽer kɩɩsda Wẽnnaam raabã. Kiris-ned hakɩɩk pa wẽend n na n zab n sõng a tẽnga, bɩ n wẽen t’a pa na n le tũ Wẽnnaam ye. A sã n maan woto, a kɩɩsda Wẽnnaam noyã. Kiris-nebã “pa dũniyã rẽnd” ye. Dẽnd d pa segd n kẽes d toog dũniyã zabã la no-koɛɛmã pʋgẽ ye.—Zã 15:19; Eza. 2:4; Zak 1:27.

Wẽeneg kẽer yaa ned fãa ne a sũur-kaseto. Wakat kẽere, yɩta sõma tɩ d tags a  Zeezi saglgã zugu, n bãng d sã n tõe n wẽename. A yeelame yaa: “Rẽnd y segd n kõo a Sezaar bũmb nins sẽn yaa a Sezaar dẽndã, la y kõ Wẽnnaam bũmb nins sẽn yaa Wẽnnaam dẽndã.”—Luk 20:25.

D rɩk makr ne kiris-ned sẽn na n dat n lebg tẽng a to tẽng-n-biiga, wall a rat n maan paspoore, n bãng tɩ yaa tɩlɛ t’a wẽen t’a na n tũu tẽngã noyã fãa. Sã n mikame tɩ tẽn-kãng noy kẽer kɩɩsda Wẽnnaam noyã, a sũur-kasetã pa na n sak t’a wẽen ye. Goosneema wã tõe n kõ-a-la sor t’a toeem wẽenegã goam kẽere, sẽn na yɩl t’a sũur-kasetã ra ning-a taal ye.

Toeem wẽenegã goam kẽer a woto tõe n zemsa ne Rom-dãmb 13:1 sẽn yet bũmb ningã. B yeta be yaa: “Bɩ ned kam fãa sak nanambsã.” Dẽnd kiris-ned tõe n gesame tɩ pa wẽng t’a wẽen t’a na n maana bũmb Wẽnnaam sẽn pa gɩdg ye.

B sã n wa yeel-d tɩ d tik bũmb n wẽene, wall d maan bũmb d sã n wa wẽendẽ, d sũur-kasetã tõe n le sõng-d lame. Pĩnd Rom nebã ne Sit buudã neb ra mi n tika b zabr sʋʋsã zut n wẽene, tɩ wilgdẽ tɩ b tẽedame tɩ zabr wẽnnaamã sõngda neb nins sẽn kɩs-a sɩdã. Gɛrk-rãmbã sã n da wẽendẽ, b zẽkda b nug n tees saasã. Woto, b ra sak n deegame tɩ pãng soab n be saasẽ n kelgd b sẽn yetã la a get b sẽn maand bũmb ninsã, la t’a na n dola ned fãa ne a tʋʋmde.

Yaa vẽeneg tɩ ned sẽn tũud a Zeova pa na n sak n tik a nugã bũmb sẽn naag ziri tũudmã yɛl zug n wẽen ye. La b sã n wa yeel yãmb tɩ y tik y nugã Biiblã zug n wẽen tɩ y na n togsa sɩd bʋʋd kaoob sasa, y manesem na n yɩɩ wãna? Y tõe n yãka yam n tik y nugã n wẽene, sẽn mik tɩ Gʋls-sõamyã gomda wẽn-sakdb sẽn tik b nus bũmb zug n wẽenã yell yĩnga. (Sɩng. 24:2, 3, 9; 47:29-31) Yɩta sõma tɩ y tẽeg tɩ y sã n wẽen a woto, yaa Wẽnnaam taoor la y wẽen tɩ y na n togsa sɩda. Y segd n segla y meng sõma, n wa tõog n leok sogsg nins b sẽn n na n sok yãmbã ne pʋ-peelem.

Sẽn mik tɩ tõnd ne a Zeova zoodã tara yõod wʋsg d nifẽ wã, b sã n wa yeel tɩ d wẽene, d segd n pʋʋsame la d tags neer n gese, d sẽn na n yeel bũmb ningã sã n pa na n kɩt tɩ d sũur-kasetã wa ningd-d taale, wall sã n pa kɩɩsd Biiblã saglsã. Y sã n yãk yam n pʋlem tɩ y na n maana bũmbu, y segd n sɩd pids-a lame.—1 Pɩy. 2:12.