Ne Jo-Rumi 7:1-25
7 Owetena, be nyalo bedo ni ok ung’eyo wachni, (nimar awuoyo gi jo mong’eyo chik) ni Chik bedo ruoth e wi ng’ato kuom kinde duto ma ng’atno ngima?
2 Kuom ranyisi, chik otueyo dhako ndalo ma chwore pod ngima; to ka chwore otho, ogonye kuom chik mar chwore.+
3 Omiyo, e ndalo ma chwore pod ngima, ibiro luonge ni jachode ka dichwo machielo okawe.+ To ka chwore otho, koro ogonye e chik mar chwore, kendo koro ok bi luonge ni jachode ka dichwo machielo okende.+
4 Kuom mano, owetena, kokalo kuom ringre Kristo, un bende ne utho kuom Chik, mondo ubed mag ng’at machielo,+ jal ma ne ochier oa kuom jo motho,+ eka mondo wanyag olemo ma moro Nyasaye.+
5 Nimar e kinde ma ne wadak kaluwore gi ringruok, ne waowore gi gombo mag richo ma Chik nomiyo onenore ayanga, kendo ne gitiyo e ringrewa mondo wanyag olemo ma kelo tho.+
6 To koro osegonywa kuom Chik,+ nikech wasetho kuom wach ma ne otueyowano, mondo wabed wasumbni e yo manyien kokalo kuom roho maler,+ to ok e yo machon kokalo kuom chik ma ne ondiki.+
7 Kare wawach ang’o? Be Chik en richo? Ooyo ngang’! Kuom adier, dine bed ni Chik onge dine ok ang’eyo richo.+ Kuom ranyisi, dine ok ang’eyo ni gombo gir ng’ato en richo ka dine bed ni Chik ok owacho niya: “Kik igomb gir ng’ato.”+
8 Chik nomiyo richo oyudo thuolo mar nyago kuoma gombo maricho duto nimar ka ne chik onge, richo ne otho.+
9 Kuom adier, nitie kinde ma ne angima ka chik onge. To ka chik nobiro, richo nobedo mangima kendo, an to ne atho.+
10 Kendo ne ayudo ni chik ma nonego otera e ngima,+ ne tera mana e tho.
11 Nimar chik nomiyo richo oyudo thuolo mar lomba kendo nega.
12 Omiyo, Chik owuon to ler, kendo weche manie iye ler, gin makare, kendo chik ber.+
13 Kuom mano, be gima ber nokelona tho? Ooyo ngang’! To richo e ma notimo kamano, mondo onenre ni richo kelona tho kokalo kuom gima ber,+ kendo kokalo kuom chik richo obed gima rach ahinya.+
14 Nimar wang’eyo ni Chik oa kuom Nyasaye; an to an mar ringruok, kendo an jal ma richo oseng’iewo.+
15 Nimar ok ang’eyo gimomiyo atimo gik ma atimo. Nikech ok atim gik ma daher timo, to gik ma asin-go e ma atimo.
16 Kata kamano, ka gik ma ok daher e ma atimo, ayie ni Chik long’o.
17 To koro an ok e ma atimgi, to richo modak e iya e ma timogi.+
18 Nimar ang’eyo ni kuoma, tiende ni, e ringrena, onge gima ber modakie; nikech agombo timo gima long’o, to nyalo mar time e ma aongego.+
19 Nimar gima ber ma daher timo, ok atim, to gima rach ma ok ahero e ma asiko ka atimo.
20 Ka koro atimo gik ma ok ahero, kare an ok e ma atimgi, to richo modak e iya e ma timogi.
21 Kuom mano, anwang’o ni nitiere chik moro ma chika: Ni ka adwaro timo gima kare, to gima rach e ma ni koda.+
22 Kuom adier, e chunya ma iye, amor ahinya gi chik Nyasaye,+
23 to e ringrena, nitiere chik moro ma kedo kod chik manie pacha,+ kendo otera mondo abed e tuech mar chik+ mar richo manie ringrena.
24 Yaye, an ng’at ma chandore! En ng’ano ma biro resa kuom ringruok ma tera e tho ma kama?
25 Agoyo erokamano ne Nyasaye kokalo kuom Yesu Kristo Ruodhwa! Kuom mano, e pacha an misumba chik Nyasaye, to gi e ringrena an misumba mar richo.+
