Bibele ibulela kuli Mulimu ubata kulufa “bupilo bobunde kwapili, ni sepo.” a (Jeremia 29:11) Libaka leliñwi Mulimu halufile Bibele kikuli “ka kuomba-ombiwa ki Mañolo lukone kuba ni sepo.” (Maroma 15:4) Sina moluka nyakisiseza, kelezo yende ye mwa Bibele yakona kulutusa kuba ni mubonelo oswanela ka za miinelo yetaata yelukopana ni yona zazi ni zazi, mi lisepiso zayona lilutusa kuba ni sepo ya bupilo bobunde kwapili.

Litaba zefa likepe le

•  Bibele ilutusa cwañi kuba ni sepo kusina taba ni miinelo yetaata yelukopana ni yona?

•  Bibele ifa sepo mañi kwa batu kaufela?

•  Mañolo a mwa Bibele abulela za sepo

 Bibele ilutusa kuziba molukona kutatululela miinelo yetaata yelukopana ni yona, ili nto yelutusa kuba ni sepo. Munyakisise mitala yelatelela yelutusa kuutwisisa taba ye.

•   Muitinge fa ketelelo yende ya mwa Bibele. Samu 119:105 ibulela kuli: “Linzwi lahao ki lambi yemonyehela mahutu aka, ni liseli la mwa nzila yaka.” Liseli lelituna likona kulutusa mwa linzila zepeli. Likona kulutusa kubona lika ze fakaufi fapilaa luna, mi hape likona kulutusa kubona lika ze kwahule. Sina feela liseli lelituna, likuka za mwa Bibele zakona kulutusa kutatulula hande miinelo yetaata yelukopana ni yona zazi ni zazi, ili kulutusa kuba ni sepo. Lituto za mwa Bibele zakona kulutusa kukutelwa ki maata mi “litabisa pilu.” (Samu 19:7, 8) Bibele hape ilutusa kuutwisisa mulelo wanani ona Mulimu ka za batu ni lifasi kwapili. Sepo yeo ikona kulutusa kuba ni tabo ni kukolwa ka lika zelunani zona.

•   Muamuhele tuso yeba mifa babañwi. Muta muinelo olutalimana ni ona ubonahala kusacinca, lukona kukalisa kuikauhanya kwa lubasi kamba balikani baluna. Bibele ilubulelela kuli kueza cwalo haki kokubutali kakuli kukona kutahisa kuli lueze likatulo zefosahalile ni kueza lika zesika luka. (Liproverbia 18:1) Ba lubasi ni balikani baluna bakona kulutusa kuba ni mubonelo oswanela. Hape bakona kulufa liakalezo zekona kulutusa kutiyela butata boluli kubona. (Liproverbia 11:14) Mane nto yeñwi yebakona kueza ki kuluomba-omba ni kulutiisa, ili kulutusa kuba ni maata a kuitiisa kufitela muinelo oluli ku ona uba hande.—Liproverbia 12:25.

•   Mulapele ku Mulimu. Bibele ibulela kuli: “Unepele mushimbo wahao ku Jehova, mi uka kutiisa. Haana kulumeleza yalukile kuli awe.” b (Samu 55:22) Jehova ubizwa kuli ki “Mulimu yafa sepo” mi kwaswanela hataluswa cwalo. (Maroma 15:13) Mwakona kulapela ku yena kumutaluseza “lipilaelo zamina kaufela,” inze munani buikolwiso bwa kuli wamiisa pilu. (1 Pitrosi 5:7) Mane Bibele ibulela kuli Mulimu: “Uka mifa maata, uka mitiisa.”—1 Pitrosi 5:10.

•   Mutuhelele miliko kutiisa sepo yamina. Bibele isepisa kuli: “[Yautwa Mulimu] ukapila mwa buiketo mi hana kunyanganyiswa ki sabo ya kusaba ziyezi.” (Liproverbia 1:33) Liñungwa hane lisinyize ndu ya musali yomuñwi wa kwa Australia wa libizo la Margaret, buñata bwa maluwo ahae naasinyehile. Bo Margaret nebasika bilaezwa hahulu ki taba yeo kono nebaitutile tuto ya butokwa hahulu ya kuli lukona kusinyehelwa ki maluwo elunani ona ka nako ifi kamba ifi. Mane hasamulaho, baikatulela kuisa pilu kwa lika za butokwa hahulu, ili lubasi ni balikani babona, silikani sabona ni Mulimu ni lika zende zasepisize kuluezeza Mulimu kwapili zeñozwi mwa Bibele.—Samu 37:34; Jakobo 4:8

 Bibele isepisa kuli batu bakaikola bupilo bobunde fa lifasi. Mi sepiso yeo ikatalelezwa hona cwale-cwale fa. Miinelo yetaata yebakopana ni yona batu mwa lifasi kacenu ibonisa kuli lupila mwa “mazazi a mafelelezo” a lifasi le. (2 Timotea 3:1-5) Mulimu atuha akalisa kuzamaisa lika kaufela zeezahala mwa lifasi ni kufelisa kusaluka ni manyando. Ukaeza cwalo ka kuitusisa mubuso okabusa lifasi kaufela ona Mubuso wa Mulimu. (Daniele 2:44; Sinulo 11:15) Jesu naaama kwa mubuso o kwa lihalimu hanaabulezi manzwi a mwa tapelo yahae yeli mutala, ali: “Mubuso wahao utahe. Tato yahao iezwe fa lifasi.”—Mateu 6:9, 10.

 Mulelo wa Mulimu ka za batu utalusizwe hande mwa Bibele. Mulemuhe butata bobuñwi bouaka felisa Mubuso wa Mulimu:

•   Hakusana kuba ni tala. “Lifasi likamelisa siselo salona.”—Lisamu 67:6.

•   Hakusana kuba ni matuku. “Hakuna yayahile mwa naha yakali: ‘Nakula.’”—Isaya 33:24.

•   Lifu halisana kubateñi. Mulimu “ukatakula miyoko kaufela kwa meeto [a batu], mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”—Sinulo 21:3, 4.