Lisamu 67:1-7
Ku muzamaisi wa lipina; kuitusiswe zelizwa za mihala. Samu. Pina.
67 Mulimu uka lushemuba ni kulufuyola;Uka lubenyiseza pata yahae+ (Selah)
2 Kuli nzila yahao izibahale mwa lifasi kamukana,+Likezo zahao za kupilisa lizibahale mwahalaa macaba kaufela.+
3 Macaba akulumbeke, wena Mulimu;Macaba kaufela akulumbeke.
4 Macaba awabelwe mi ahuweleze ka tabo,+Kakuli ukaatula macaba ka kuluka.+
Ukaetelela macaba a lifasi. (Selah)
5 Macaba akulumbeke, wena Mulimu;Macaba kaufela akulumbeke.
6 Lifasi likamelisa siselo salona;+Mulimu, yena Mulimu waluna, uka lufuyola.+
7 Mulimu uka lufuyola,Mi batu ba mwa maneku kaufela a lifasi baka musaba.*+
Litaluso ze kwatasi
^ Kamba “baka mukuteka.”
