MASIRIB kadi nga agturay ni Jehova? Ti maysa a napateg a pamay-an tapno masungbatan dayta ket babaen ti panangusig iti balakadna. Epektibo kadi dayta? Ti kadi panangyaplikar iti dayta pagbalinenna a nasaysayaat ken naragragsak ti biag? Ginasut a proverbio ti pinutar ni masirib nga Ari Solomon. Saklawen dagita ti dandani amin nga aspeto ti biag. Usigentayo ti sumagmamano a pagarigan.

Nasken nga agtalektayo iti Dios. Nasken ti panagtalek tapno maaddaantayo iti nasayaat a relasion ken Jehova. Insurat ni Solomon: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Proverbio 3:5, 6) Ti panagtalek iti Dios babaen ti panagpaiwanwan ken panagtulnog kenkuana mangyeg iti makagunggona unay a biag. Dayta ti tumulong iti maysa tapno maparagsakna ti Dios ken maipaayanna ni Jehova iti sungbat kadagiti isyu a pinataud ni Satanas a kabusor ti Dios.—Proverbio 27:11.

Nainsiriban a panangtrato iti sabsabali. Ad-adda itan a naintiempuan ti balakad ti Dios kadagiti assawa a lallaki, assawa a babbai, ken annak. “Agrag-oka iti asawa ti kinaagtutubom,” imbalakad ti Dios iti asawa a lalaki, a kaipapananna nga agtalinaed a matalek iti asawana. (Proverbio 5:18-20) Iti libro a Proverbio, makita dagiti assawa a babbai ti nalawag a pannakadeskribir ti makabael nga asawa a babai a raraemen ti asawa ken annakna. (Proverbio, kapitulo 31) Mabasa met dagiti annak a masapul nga agtulnogda kadagiti dadakkelda. (Proverbio 6:20) Ipakita pay daytoy a libro a napateg ti pannakigayyem, gapu ta ti panagputputong ti mamagbalin iti maysa a managimbubukodan. (Proverbio 18:1) Ti impluensia dagiti gagayyem ket mabalin a pagimbagan wenno pagdaksantayo, isu a masapul a nainsiriban a pilientayo ti pakigayyemantayo.—Proverbio 13:20; 17:17.

Nainsiriban a panangasikaso iti bagi. Naglaon ti libro a Proverbio iti agkakapateg a balakad maipapan iti panangliklik iti nalabes a panaginum iti arak, panangpatanor iti makapasalun-at a rikna, panangdaer iti makadangran a rikna, ken panagbalin a nagaget. (Proverbio 6:6; 14:30; 20:1) Mamakdaar a pakaisagmakantayo ti panagpannuray iti kapanunotan ti tao a naiduma iti balakad ti Dios. (Proverbio 14:12) Iparegtana a salaknibantayo ti pusotayo iti makadadael nga impluensia, yantangay ipalagipna kadatayo a ti pusotayo ti ‘gubuayan dagiti ubbog ti biag.’—Proverbio 4:23.

Naammuan ti minilion a tattao iti intero a lubong a mangpasayaat iti biagda ti panangannurot kadagita a balakad. Kas resultana, addaanda iti umdas a rason nga agpaiwanwan ken Jehova kas Agturay kadakuada.

—Naibasar iti libro a Proverbio.