“É lín dìn ǎ bɔ, nǔɖuɖu gbigbɔ tɔn mǐtɔn lɛ mimɔ ɖò tablɛti jí ɔ, nǔ wɛ é nyí bɔ é vɛwǔ ɖɔ è na ɖó nukún.” A ka yí gbè nú xó enɛ lɛ à? Xóɖiɖɔ e dó wusyɛn lanmɛ nú mɛ, bɔ Geoffrey Jackson xwlé mɛ ɖò Gbeɖiɖó Hagbɛ̌ Alixlɛ́mɛtɔ́ ɔ Tɔn 2020 Tɔn 6gɔ́ ɔ mɛ é sín akpáxwé ɖé wɛ. É gbɛkan d’enu bo ɖɔ: “Amɔ̌ dìn ɔ, mǐ nɔ kanbyɔ ɖɔ nɛ̌ mǐ ka sixu xò jɛmɛji elɔ zlɛ́ JW Library mɛvo gbɔn à jí. Jehovah ko ɖò nǔ sɔ́ nú mǐ wɛ sín xwè ɖé lɛ ɖíe nú mǐ na ɖò gbesisɔmɛ nú ninɔmɛ lěhun lɛ.”

 Nɛ̌ Jehovah ka ko ɖò nǔ sɔ́ nú mǐ wɛ gbɔn? Etɛ lɛ tuto ɔdinatɛ́ɛ jí tɔn JW Library dídówá ka byɔ? Etɛ lɛ nukúnkpíkpé d’ewu kpo blobló bonu é ni kpɔ́n te d’eji kpo ka nɔ byɔ?

 Ðò mai 2013 ɔ, Hagbɛ̌ Alixlɛmɛtɔ́ ɔ byɔ Tuto MEPS tɔn, ee nyí hɔ̌nkan gbɛ̀ ɔ tɔn mǐtɔn sín azɔ̌xɔsa ɖé é ɖɔ é ni sɔnǔ nú tuto ɔdinatɛ́ɛ jí tɔn ɖé, bɔ é na hɛn Lẹdogbedevomẹ Aihọn Yọyọ Tọn e è vɔ́ jlaɖó é. Paul Willies, ee nɔ w’azɔ̌ xá Tuto MEPS tɔn é ɖɔ: “Kaka jɛ hwe enɛ nu ɔ, mǐ ko ɖè tuto ɔdinatɛ́ɛ jí tɔn ɖé tɔ́n dó fí è nɔ yí tuto ɔdinatɛ́ɛ jí tɔn lɛ ɖè é ɖebǔ ǎ. Amɔ̌, mǐ ɖó gbɛ̌ta ɖé ayǐ, mǐ ɖó azɔ̌ klewun ɖé lɛ te, bo w’azɔ̌ xá azɔ̌xɔsa ɖevo lɛ bo na dó bló lee tuto ɔdinatɛ́ɛ jí tɔn ɔ na cí é, lobo lɛ́ sɔnǔ nú é kpo nǔ e na nɔ mɛ lɛ é kpo. Mǐ xoɖɛ hwɛhwɛ, bɔ kpo alɔdó Jehovah tɔn kpo ɔ, è ɖè tuto ɔdinatɛ́ɛ jí tɔn ɔ tɔ́n ɖò kplé xwewu xwewu tɔn ɔ hwenu ɖò sun atɔ́ɔ́n kpowun gudo!”

 Nǔ ɖevo e kan gǎn byɔ é wɛ nyí, blobló bonu tuto ɔdinatɛ́ɛ jí tɔn ɔ ni huzu jɛ nǔsɛxwetɛn jɔ nǔsɛxwetɛn e na ɖó wema gegě, bo lɛ́ tíìn dó gbè gegě mɛ hugǎn é ɖé. Ðò janvier 2015 ɔ, ɖibla nyí wema mǐtɔn yaɖeyaɖe ee ɖò glɛnsigbe mɛ lɛ é bǐ wɛ ko ɖò JW Library mɛ, bɔ ɖò sun ayizɛ́n kpowun gudo ɔ, mɛ ɖěɖee nɔ zán lɛ é sixu yí wema enɛ lɛ dó gbè kanweko mɔ̌kpan ɖevo lɛ mɛ.

 Sín hwenɛnu ɔ, nɔví mǐtɔn lɛ ko bló bɔ JW Library ɔ kpɔ́n te d’eji ɖò ali gegě nu, ye gɔ́ video lɛ na, xò kplé agun tɔn lɛ sín wema kpo video kpo lɛ bǐ dó akpáxwé ɖokpo glɔ́, bo lɛ́ hun ali nú mɛ e nɔ zán lɛ é, bɔ ye na nɔ mɔ Anademẹwe Dodinnanu Tọn sín alɔdlɛndónǔ lɛ ɖò wemafɔ Biblu tɔn ɖé jí tlɔlɔ.

 È nɔ hun JW Library ɖò alokan alǒ nǔ mɔ̌hun ɖevo lɛ livi 8 jí ɖò gbè bǐ gbè, bo nɔ hun ɖò livi 15 jɛji jí ɖò sun lɛ bǐ mɛ! Etɛ lɛ é ka nɔ byɔ cobɔ JW Library na kpò ɖò azɔ̌ wɛ ganji ɖò nǔ enɛ lɛ jí? Nɔví Willies tinmɛ ɖɔ: “Nǔgbo ɔ, è nɔ fó tuto ɔdinatɛ́ɛ jí tɔn ɖé sín azɔ̌ gbeɖé ǎ. Mǐ nɔ ɖò azɔ̌ wà wɛ hwebǐnu bo na gɔ́ nǔ yɔyɔ̌ lɛ na, lobo lɛ́ bló bɔ zǐnzan tɔn na d’alɔ mɛ hugǎn bo lɛ́ bɔwǔ. Ðó è nɔ ɖò huzuhuzu yɔyɔ̌ lɛ bló dó tuto e è nɔ sà bɔ ye nɔ zɔ́n bɔ alokan, tablɛti, alǒ ɔdinatɛ́ɛ lɛ nɔ w’azɔ̌ é (les systèmes d’exploitation commerciaux pour les appereils numériques) jí wɛ wutu ɔ, mǐ ɖó na nɔ bló huzuhuzu lɛ dó JW Library ɔ jí hwebǐnu, bonu é na dó kpò ɖò azɔ̌ wà xá tuto gudogudo tɔn lɛ wɛ. Gɔ́ na ɔ, mǐ ɖó na nɔ kpé nukún dó tuto ɔdinatɛ́ɛ jí tɔn e ɖò mǐɖesunɔ gɔ́n é wu bo lɛ́ dó agbɔ̌n agbɔ̌n jí na, ɖó wema kpo xóyidókanji kpo e ɖò JW Library mɛ lɛ é ɖò kpɔ́ sú d’eji wɛ wutu.” Nú è lɛ́n gbè lɛ bǐ ɔ, wema mǐtɔn 200 000 mɔ̌, gɔ́ nú xóyidókanji kpo video kpo 600 000 jɛji wɛ ɖò JW Library mɛ alɔnu dìn!

 Bo na dó kpò ɖò nukún kpé dó JW Library ɔ wu wɛ ɔ, nǔ e sín hudo è ɖó é hugǎn tuto ɔdinatɛ́ɛ jí tɔn. È ɖó na lɛ́ xɔ tuto ɔdinatɛ́ɛ jí tɔn ɖé lɛ cobá sixu zán ye. Tuto ɔ ɖokpo géé nɔ xɔ ɖɔ̌la Amɛlika tɔn 1 500 ɖò xwewu xwewu. Gɔ́ na ɔ, Tuto MEPS tɔn nɔ zán ɖɔ̌la Amɛlika tɔn 10 000 mɔ̌ xwewu xwewu dó ɔdinatɛ́ɛ, tablɛti kpo alɔkan ee azɔ̌xwé vovo lɛ bló lɛ é takúnmɛ, bo na dó kúdeji ɖɔ JW Library ɔ na kpò ɖò azɔ̌ wà wɛ ganji ɖò ɔdinatɛ́ɛ, tablɛti kpo alokan kpo yɔyɔ̌ lɛ jí.

 JW Library zɔ́n bɔ akwɛ e è nɔ zán dó wema lɛ zinzín, biblá ye ɖó kpɔ́, kpo agban yetɔn bíbɛ́ sɛ́dó agun lɛ mɛ é kpo takúnmɛ lɛ é ɖekpo tawun. Ði kpɔ́ndéwú, kpɔ́n akpomɛwema Nɔ Kíjé Mawuxówema ɔ Gbè Bǐ Gbè. Nɔ Kíjé Mawuxówema Ɔ 2013 tɔn ɔ, ɖibla yì livi 12 wɛ mǐ zín. Amɔ̌, ɖò 2020 ɔ, livi atɔ́ɔ́n mɔ̌ kpowun wɛ mǐ zín, cobɔ kɛ́n wɛnjlatɔ́ e gbɔn gbɛ̀ ɔ bǐ mɛ lɛ é tɔn tlɛ jɛji yì 700 000 mɔ̌. Etɛwu nǔ lɛ ka huzu? Nɔví sunnu kpo nɔví nyɔnu kpo mǐtɔn lɛ gegě nɔ xà tɛ́si gbè bǐ gbè tɔn ɔ dìn ɖò JW Library jí. *

 JW Library nɔ lɛ́ d’alɔ mɛ e nɔ zán lɛ é ɖò ali maxamaxa nu. Geneviève e nɔ nɔ Canada é mɔ ɖɔ JW Library ɔ zɔ́n bɔ emi nɔ kplɔ́n nǔ ɖò gbesisɔmɛ hugǎn. É yí gbè ɖɔ: “Nú un na ɖɔ xó jɔ xó ɔ, enyi un ɖó na xò wema e sín hudo un ɖó bo na kplɔ́n nǔ lɛ é bǐ kplé ɔ, un lin ɖɔ un na sixu nɔ kplɔ́n nǔ zǎnzǎn tɛgbɛ ǎ. Amɔ̌, nú un sɔ́ tablɛti ce ɔ, un nɔ mɔ nǔ e sín hudo un ɖó lɛ é bǐ ɖò JW Library ɔ mɛ. Nǔkplɔnkplɔn ɖò gbesisɔmɛ gbɔn mɔ̌ na hlɔnhlɔn nǔɖiɖi ce bo lɛ́ dɔn mì sɛkpɔ́ Jehovah d’eji.”

 JW Library ɔ d’alɔ ɖò ali bǔnɔ ɖé nu ɖò jɛmɛji Covid-19 tɔn ɔ hwenu. Charlyn, ee nɔ nɔ États-Unis é tinmɛ ɖɔ: “Ðó Covid-19 e ɖò nǔ hɛn gblé wɛ gbɔn gbɛ̀ ɔ bǐ mɛ wɛ wutu ɔ, nú xwè ɖokpo jɛji ɔ, un mɔ wema mǐtɔn e è zín é ɖě bo yí ǎ. Amɔ̌, JW Library zɔ́n bɔ mǐ kpò ɖò nǔ ɖu wɛ ganji ɖò gbigbɔ lixo, bɔ un dókú nú Jehovah ɖó nǔnamɛ kpo wanyiyi kpo enɛ wu.”

 Faye, ee nɔ nɔ Philippines é sɛ̀ sìn xwè nú lee nǔ cí nú mɛ gegě é. É ɖɔ: “Gbɛzinzán ce blebu ɖò gbigbɔ lixo kpo nǔ e un nɔ wà gbè bǐ gbè lɛ é kpo wɛ è xokplé dó azɔ̌wanú agbɔ̌nɔ ɖokpo mɛ. É wɛ nyí nǔ e un nɔ xà jɛ nukɔn zǎnzǎn é. É wɛ nyí nǔ e un nɔ ɖótó hwenu e un ɖò xwégbezɔ́ wà wɛ é. É wɛ nyí nǔ e un nɔ zán dó sɔnǔ nú kplé lɛ é. É wɛ nyí nǔ e un nɔ zán dó sɔnǔ nú Bliblu kplɔnkplɔn ce é. Nú un mɔ vivo ɔ, un nɔ kpɔ́n video lɛ ɖ’eji. Un nɔ xà xóta ɖé lɛ alǒ Biblu ɖ’eji, hwenu e mɛ lɛ ɖò slɛ́dójí bɔ un ɖò te ɖò ye mɛ é. Akwɛ sixu xɔ ǎ kpowun.”

 JW Library ɔ lɛ́ xɔ akwɛ tawun ɖò sinsɛnzɔ́ ɔ mɛ bɔ è sixu jlɛ́ ǎ. Ði kpɔ́ndéwú ɔ, hwenu e nɔví nyɔnu e nɔ nɔ Cameroun é ɖé ɖò Mawuxó ɖɔ wɛ é ɔ, é jló na zán wemafɔ e é mɔ bɔ nɔví nyɔnu ɖevo ko zán ɖò aklunɔzán gbla yɔywɛ ɖé ɖíe é. Amɔ̌, é kpéwú bo flín fí e é na mɔ wemafɔ ɔ ɖè é ǎ. É tinmɛ ɖɔ: “É nyɔ́ tawun ɖɔ un flín nukɛgbe ɖokpo ɖ’emɛ. Un hun JW Library ɔ, yì Biblu mɛ, bo wlán nukɛgbe ɔ d’emɛ bo ba. Tlolo ɔ, un mɔ wemafɔ ɔ. JW Library ɔ zinzán zɔ́n bɔ un nɔ kpéwú bo nɔ mɔ wemafɔ ɖěɖee un nɔ wɔn hweɖelɛnu é gegě.”

Nǔ ɖěɖee a nɔ nyɔ́ xomɛ dó na gbɔn wlɛnwín e è tinmɛ ɖò donate.jw.org jí lɛ é zinzán gblamɛ é zɔ́n, bɔ mǐ kpéwú bo sɔnǔ nú JW Library ɔ, nɔ kpé nukún d’ewu, bó nɔ lɛ́ bló bɔ é nɔ kpɔ́n te d’eji nú nɔví sunnu kpo nɔví nyɔnu kpo mǐtɔn lɛ gbɔn gbɛ̀ ɔ bǐ mɛ. É na cɛ nú we nú alɔhundónanǔmɛ towe.

1. Octobre 2013: È ɖè JW Library ɔ tɔ́n bɔ Lẹdogbedevomẹ Aihọn Yọyọ Tọn e è vɔ́ jlaɖó é ɖ’emɛ

2. Janvier 2015: È bló bɔ wema mǐtɔn ɖevo lɛ tíìn dó Glɛnsigbe mɛ, lobɔ gbè kanweko mɔ̌kpan ɖevo lɛ jɛ gudo na

3. Novembre 2015: È gɔ́ nǔdindɔn gbɔn nǔwlanwlán lɛ sín nukúnmɛ (surligner) na

4. Mai 2016: È gɔ́ akpáxwé kplé lɛ (réunions) tɔn na

5. Mai 2017: È gɔ́ nǔwlanwlán ɖ’ayǐ (note) sín akpaxwé na

6. Décembre 2017: È gɔ́ nǔ e na d’alɔ bɔ Biblu Nǔkplɔnkplɔn Tɔn na nɔ jí é na

7. Mars 2019: È gɔ́ xóyidókanji lɛ yíyí, video kpínkpɔ́n tlɔlɔ, kpo Anademẹwe Dodinnanu Tọn sín alɔdlɛndónǔ lɛ mimɔ kpo sín nǔwukpíkpé na

8. Janvier 2021: È lɛ́ jlá ɖó d’eji bonu è na dó sixu ɖu Ðu Gbɛ̀ Víví Kaka Sɔyi! ɔ sín vivǐ ganji