I vre ki Zezi pe al Zerizalenm, me i paret ki i ankor kot lakour Zase avek son bann disip. Zot krwar ki tre byento “Rwayonm Bondye” pou ganny etablir e ki Zezi pou vin Lerwa. (Lik 19:11) Zot osi pa arive konpran ki Zezi i bezwen mor. Alor i servi en lot legzanp pour ed zot vwar ki bokou letan i bezwen pase avan ki Rwayonm i ganny etablir.

I dir: “En zonm ki ti ne dan en fanmir rwayal ti al dan en pei byen lwen pour li vin lerwa e apre retournen.” (Lik 19:12) I ti pou pran letan pour fer sa. I kler ki Zezi i sa “zonm ki ti ne dan en fanmir rwayal” ki al “dan en pei byen lwen,” setadir lesyel, kot son Papa pou fer li vin lerwa.

Dan sa legzanp, avan ki sa “zonm ki ti ne dan en fanmir rwayal” i ale, i kriy dis parmi son bann lesklav e donn sakenn en bon sonm larzan e dir zot: “Fer profi avek sa larzan ziska ki mon retournen.” (Lik 19:13) Sa zonm ti donn sak lesklav en min. Sa i apepre lapey en dimoun ki travay lo laferm pour trwa mwan.

I posib ki bann disip i konnen ki zot parey sa dis lesklav dan sa legzanp, akoz Zezi in deza konpar zot avek bann travayer rekolt. (Matye 9:35-38) Byensir i pa’n demann zot pour partisip dan en vre rekolt. Plito, zot bezwen partisip dan en rekolt senbolik pour rasanble lezot disip ki kapab ganny en plas dan Rwayonm Bondye. Bann disip i servi tou zot letan, lafors, lenerzi ek byen materyel pour ed lezot antre dan sa Rwayonm.

Kwa ankor ki Zezi i dir dan sa legzanp? I dir ki bann sitwayen sa pei “ti ay [sa zonm ki ti ne dan en fanmir rwayal] e zot ti anvoy bann anbasader pour dir, ‘Nou pa oule sa zonm vin nou lerwa.’” (Lik 19:14) Bann disip i konnen ki bann Zwif pa aksepte Zezi e serten i menm anvi touy li. Apre ki Zezi i mor e al dan lesyel, bann Zwif an zeneral pou persekit son bann disip e sa i montre ki mannyer zot konsider Zezi. Sa bann ki opoz Zezi i fer li kler ki zot pa anvi ki Zezi i vin zot Lerwa.​—Zan 19:15, 16; Akt 4:13-18; 5:40.

Me ki mannyer sa dis lesklav i servi zot larzan ziska ki sa “zonm ki ti ne dan en fanmir rwayal” i “vin lerwa” e apre retournen? Zezi i dir: “Ler i ti finalman retournen apre ki i ti’n vin lerwa, i ti apel sa bann lesklav pour vwar ki profi zot ti’n fer avek son larzan. Alor premye ti vini e dir, ‘Senyer, mon’n ganny ankor dis avek sa ki ou ti donn mwan.’ I ti dir li, ‘Ou’n byen fer, ou en bon lesklav. Vi ki ou’n montre ou fidel dan en pti keksoz, mon pou donn ou lotorite lo dis lavil.’ Dezyenm ti vini e dir, ‘Senyer, mon’n ganny ankor senk avek sa ki ou ti donn mwan.’ I ti dir sa enn osi, ‘Ou osi ou pou ansarz senk lavil.’”​—Lik 19:15-19.

Si bann disip i konpran ki zot parey sa bann lesklav ki byen servi tou sa ki zot annan pour fer plis disip, zot kapab asire ki Zezi pou kontan. Zot osi kapab asire ki i pou rekonpans zot pour zot travay dir. Byensir, pa tou bann disip Zezi ki annan menm sirkonstans lavi, loportinite ek abilite. Pourtan, Zezi ki’n “vin lerwa” pou vwar e beni zot zefor senser pour fer disip.​—Matye 28:19, 20.

Me ekout sa ki Zezi i dir a lafen son legzanp: “Me en lot [lesklav] ti vini e dir, ‘Senyer, la ou larzan ki mon ti’n kasyet dan en sifon. Ou konnen, mon ti per ou, akoz ou en dimoun dir, ou pran larzan ki ou pa’n met labank e ou rekolte sa ki ou pa’n senmen.’ I ti dir li, ‘Move lesklav, par ou prop parol mon ziz ou. Ou ti konnen ki  mon en dimoun dir, ki mon pran larzan ki mon pa’n met labank e mon rekolte sa ki mon pa’n senmen. Alor, akoz ou pa ti met mon larzan labank? Ler mon retournen mon ti a’n kapab ganny mon larzan avek lentere.’ Alor i ti dir sa bann ki ti pe debout la, ‘Pran sa larzan avek li e donn sa enn ki’n ganny dis an plis.’”​—Lik 19:20-24.

Vi ki sa lesklav pa’n travay pour ogmant larises son met, sa lesklav i perdi sa ki i annan. Bann zapot pe esper sa letan kot Zezi pou dirize dan Rwayonm Bondye. Alor dapre sa ki Zezi i dir konsernan sa dernyen lesklav, i tre probab ki zot konpran ki si zot pa travay dir, zot pa pou ganny en plas dan sa Rwayonm.

Parol Zezi i devret pous son bann disip fidel pour fer plis zefor. I dir: “Mon dir zot, sa ki annan pou ganny plis ankor, me sa ki napa, menm sa ptigin ki i annan pou ganny pran avek li.” I azoute ki son bann lennmi ki pa oule ki i “vin zot lerwa,” pou ganny met amor. Apre sa, Zezi i kontinyen son larout ver Zerizalenm.​—Lik 19:26-28.