Skip to content

Al lo konteni

 SAPIT 14

Zezi i konmans fer disip

Zezi i konmans fer disip

ZAN 1:29-51

  • BANN PREMYE DISIP ZEZI

Apre ki Zezi in fer 40 zour dan dezer i retourn kot Zan ki ti’n batiz li, avan i retourn Galile. Ler Zezi pe aprose, Zan i vwar li e i dir avek tou dimoun ki la: “Gete! la Pti Mouton Bondye ki tir pese lemonn! Li menm sa enn ki mon ti koz lo la: ‘Sa enn ki pe vin apre mwan in depas mwan, parski i ti egziste avan mwan.’” (Zan 1:29, 30) Menm si Zan i en pti pe pli vye ki Zezi, i konnen ki Zezi ti egziste avan li konman en lespri dan lesyel.

Detrwa semenn avan sa, ler Zezi ti’n vin kot li pour ganny batize, i pa paret ki Zan ti asire ki Zezi ti Mesi. Zan i dir: “Mwan osi mon pa ti konn li, me rezon akoz mon pe batiz dimoun dan delo se pour ki Izrael i kapab konnen lekel li.”​—Zan 1:31.

Apre sa, Zan i eksplike ki ti arive ler i ti batiz Zezi: “Mon ti vwar lespri sen, parey en kolonm, pe desann sorti dan lesyel e reste lo li. Mwan osi mon pa ti konn li, me sa Enn ki’n anvoy mwan batiz dimoun dan delo ti dir mwan: ‘Sa enn ki ou vwar lespri sen desann e reste lo li, li menm ki batiz avek lespri sen.’ Mwan mon’n vwar li e mon’n rann temwannyaz ki i Garson Bondye.”​—Zan 1:32-34.

Son lannmen, Zan i avek de son bann disip ler Zezi i vin kot li ankor enn fwa. Zan i dir: “Gete! la Pti Mouton Bondye!” (Zan 1:36) Ler sa de disip i tann Zan ki batize dir sa, zot swiv Zezi. Enn i apel Andre. I tre probab ki sa lot disip i sa menm dimoun ki’n ekri sa resi. Li osi i apel Zan. I paret ki Zan i kouzen Zezi akoz i garson Salome. I tre probab ki Salome i ser Mari e i madanm Zebede.

Ler Zezi i vire e vwar Andre ek Zan pe swiv li, Zezi i demande: “Ki zot pe rode?”

Zot demann li: “Rabi . . . , kote ou pe reste?”

Zezi i reponn zot: “Vini zot pou vwar.”​—Zan 1:37-39.

I apepre kat-r-er apremidi e Andre ek Zan i reste avek Zezi pour larestan lazournen. Andre i sitan eksite ki i al rod son frer Simon, ki osi ganny apele Pyer e dir li: “Nou’n trouv Mesi.” (Zan 1:41) Andre i anmenn Pyer kot Zezi. Sa ki arive pli tar, i donn lenpresyon ki Zan osi i al rod son frer Zak e anmenn li kot Zezi. Par kont, Zan pa koz lo la dan son resi.

Son lannmen, Zezi i zwenn Filip ki sorti Betsayda. Sa lavil i lo lakot nor Lanmer Galile. Sanmenm sa lavil kot Andre ek Pyer osi  i sorti. Zezi i dir Filip: “Vin mon disip.”​—Zan 1:43.

Apre sa, Filip i zwenn Natanael, ki osi ganny apele Bartelemi e dir li: “Nou’n trouv sa enn ki Lalwa Moiz ek lansennyman bann Profet ti koz lo la, Zezi, garson Zozef, sorti Nazaret.” Me Natanael i annan bann dout. I dir Filip: “Eski i kapab annan okenn bon keksoz sorti Nazaret?”

Filip i demann li pour “vin gete.” Ler Zezi i vwar Natanael pe vin kot li, i dir: “Gete, la en vre Izraelit ki napa okenn lipokrizi dan li.”

Natanael i demann Zezi: “Ki mannyer ou konn mwan?”

Zezi i reponn li: “Avan ki Filip ti vin kriy ou, mon ti vwar ou anba pye fig.”

Natanael i sirprann e i reponn: “Ansenyan, ou Garson Bondye, ou Lerwa Izrael.”

Zezi i demann li: “Eski ou krwar akoz mon’n dir ou ki mon ti vwar ou anba pye fig? Ou pou vwar bann pli gran keksoz ki sa.” Apre sa, Zezi i promet: “Vreman mon dir zot laverite, zot pou vwar lesyel ouver e bann lanz Bondye pe monte desann pour vin kot Garson zonm.”​—Zan 1:45-51.

Deswit apre sa, Zezi ansanm avek son bann nouvo disip i kit Vale Zourden e zot al Galile.