Bann astrolog sorti dan les i vin Zerizalenm. En astrolog i en dimoun ki etidye pozisyon bann zetwal pour predir bann levennman ki arive dan lavi dimoun. (Izai 47:13) Ler zot ankor kot zot, sa bann zonm i vwar en “zetwal” e zot swiv li pour plizyer santenn kilomet. Sa zetwal pa anmenn zot Betleenm, me Zerizalenm.

Ler bann astrolog i ariv laba, zot demande: “Lerwa bann Zwif ki’n ne, kote i ete? Parski nou ti vwar son zetwal kan nou ti dan Les e nou’n vin onor li.”​—Matye 2:1, 2.

Ler Lerwa Erod, Zerizalenm, i tann sa, i pa kontan ditou. Alor i kriy bann sef pret ek lezot sef relizye Zwif e demann zot kote Kris i sipoze ne. Zot dir ki dapre Lekritir, i sipoze ne “Betleenm.” (Matye 2:5; Mika 5:2) Apre sa, Erod i kriy bann astrolog an sekre e dir zot: “Ale e rod byen partou sa pti garson e kan zot in trouv li, fer mwan konnen pour ki mwan osi mon a kapab al onor li.” (Matye 2:8) Me an realite, Erod i anvi trouv sa zanfan pour touy li.

Ler bann astrolog i ale, en keksoz enkrwayab i arive. Sa “zetwal” ki zot in vwar ler zot ti dan les i al par devan zot. I kler ki sa zetwal pa parey tou lezot zetwal, me i zis la pour gid zot. Bann astrolog i swiv sa zetwal ziska ki i aret zis par lao sa lakaz kot Zozef ek Mari pe reste avek zot pti garson.

Ler bann astrolog i antre dan lakaz, zot vwar Mari avek son pti garson Zezi. Bann astrolog i vwar Zezi e zot tonm azenou devan li. Zot fer li kado lor, lansan blan ek lamir. Letan zot pros pour retourn kot Erod, dan en rev, Bondye i averti zot pour pa fer sa. Alor zot pran en lot semen pour retourn dan zot pei.

Lekel ou krwar ti fer sa “zetwal” gid sa bann astrolog? Pa bliye ki sa zetwal pa ti gid zot direkteman kot Zezi, Betleenm. Plito, i ti gid zot Zerizalenm, kot zot ti zwenn Lerwa Erod ki ti anvi touy Zezi. Erod ti pou’n reisi fer sa si Bondye pa ti’n entervenir e demann bann astrolog pour pa dir Erod kote Zezi ti ete. I kler ki i ti Satan, lennmi Bondye ki ti pe esey touy Zezi dan sa fason.