Skip to content

Al lo konteni

 SAPIT 91

Lazar i ganny resisite

Lazar i ganny resisite

ZAN 11:38-54

  • REZIREKSYON LAZAR

  • SANNEDREN I FER KONPLO POUR TOUY ZEZI

Apre ki Zezi i zwenn Mart e pli tar Mari o bor vilaz Betani, zot al kot latonm Lazar. Latonm Lazar i en kavern e en ros in ganny mete dan larantre. Zezi i dir zot: “Tir sa ros.” Mart i enkyet akoz i pa konnen ki Zezi pe mazin fer. I dir: “Senyer, i fer kat zour, son lekor i bezwen pi la.” Me Zezi i dir li: “Pa mon’n dir ou ki si ou krwar ou pou vwar laglwar Bondye?”​—Zan 11:39, 40.

Zot tir sa ros. Apre sa, Zezi i get anler ver lesyel e i priye: “Papa, mon remersye ou ki ou’n tann mwan. I vre, mon konnen ou touzour ekout mwan, me mon’n koze pour ki sa lafoul otour mwan i a krwar ki ou’n anvoy  mwan.” Sa lapriyer ki Zezi i fer an piblik i montre bann ki la ki sa ki i pe al fer i gras a pwisans Bondye. Apre Zezi i kriye: “Lazar, sorti!” Lazar i sorti avek son lipye ek son lanmen anvlope dan bann bout latwal e son figir i kouver avek en bout latwal. Zezi i dir: “Tir sa bann bout latwal lo li e les li ale.”​—Zan 11:41-44.

Bokou parmi bann Zwif ki’n vin rekonfort Mari ek Mart i vwar sa mirak e zot annan lafwa dan li. Me lezot i al rakont bann Farizyen sa ki Zezi in fer. Bann Farizyen ek sef pret i reini lakour siprenm Zwif ki apel Sannedren. Granpret Kaif osi i form parti Sannedren. Serten i konplent: “Ki nou pou fer, parski sa zonm pe fer en kantite mirak? Si nou les li, zot tou zot pou annan lafwa dan li e bann Romen pou vini e pran nou tanp ek nou nasyon.” (Zan 11:47, 48) Menm si sa bann zonm in tann temwannyaz bann dimoun ki’n vwar Zezi “pe fer en kantite mirak,” zot pa kontan sa ki Bondye pe akonpli gras a Zezi. Sa ki pli enportan pour zot i zot prop pozisyon ek lotorite.

Bann Sadiseen i vreman pa kontan ki Lazar in ganny resisite akoz zot pa krwar dan rezireksyon. Aprezan, Kaif, en Sadiseen i koze: “Zot pa konn nanryen, zot pa’n mazinen ki i ti a pli bon pour en zonm mor pour lepep ki en nasyon antye ganny detrir?”​—Zan 11:49, 50; Akt 5:17; 23:8.

Lefet ki Kaif i granpret, Bondye i servi li pour dir sa, me i pa’n “dir sa akoz i ti son prop lide.” Kaif pe dir ki Zezi i devret ganny touye akoz i per ki bann dimoun pou aret ekout bann sef relizye Zwif. Par kont, profesi Kaif i fer resorti ki ler Zezi i mor i pou pey en ranson, pa zis pour bann Zwif me pour tou “bann zanfan Bondye ki ti eparpiye partou.”​—Zan 11:51, 52.

Kaif i reisi fer bann manm Sannedren fer en konplo pour touy Zezi. Nikodenm ki en manm Sannedren ti ase pros avek Zezi, eski i posib ki i’n dir Zezi konsernan sa konplo pour touy li? An tou ka, Zezi i kit Zerizalenm pour ki i pa ganny touye avan ler fikse par Bondye.