Skip to content

Al lo konteni

 SAPIT 137

Plizyer santenn i vwar li avan lafet Lapannkot

Plizyer santenn i vwar li avan lafet Lapannkot

MATYE 28:16-20 LIK 24:50-52 AKT 1:1-12; 2:1-4

  • ZEZI I APARET AVEK BOKOU DIMOUN

  • I MONT DAN LESYEL

  • ZEZI I DONN 120 DISIP LESPRI SEN

Apre ki Zezi in ganny resisite, i fer laranzman pour son 11 zapot zwenn li lo en montanny Galile. I annan lezot disip osi ki la, apepre 500 zot. Parmi zot, i annan serten ki ti annan dout o konmansman. (Matye 28:17; 1 Korentyen 15:6) Me sa ki Zezi i dir i ed zot pour asire ki i vreman vivan.

Zezi i eksplike ki Bondye in donn li tou lotorite dan lesyel e lo later. Zezi i demann zot: “Al kot bann dimoun dan tou nasyon e fer zot vin mon disip, batiz zot o non Papa, o non Garson e o non lespri sen, ansenny zot pour obei tou sa ki mon’n donn zot lord pour fer.” (Matye 28:18-20) Zezi i vivan e i oule ki sa bon nouvel i ganny anonse.

Tou bann disip Zezi, zonm, fanm ek zanfan, i ganny sa menm lord pour fer disip. Bann ki opoz zot pou esey fer zot aret anons sa mesaz lo Rwayonm e ansenny bann dimoun, me Zezi i asir zot: “Mon’n ganny tou lotorite dan lesyel e lo later.” Ki sa i vedir pour son bann disip? I dir zot: “Mazinen! mon avek zot tou le zour ziska lafen sa lemonn.” Zezi pa pe dir ki tou dimoun ki anons sa bon nouvel pou kapab fer bann mirak. Me kantmenm sa, zot pou ganny lafors lespri sen.

An tou, apre ki Zezi in resisite, i aparet avek son bann disip “pandan 40 zour.” I aparet dan diferan lekor imen e i montre ‘zot ki i vivan atraver en kantite laprev konkret.’ I osi donn zot bann lenstriksyon “konsernan Rwayonm Bondye.”​—Akt 1:3; 1 Korentyen 15:7.

Aparaman ler bann zapot i ankor Galile, Zezi i demann zot pour retourn Zerizalenm. Ler i zwenn zot dan sa lavil, i dir: “Pa bezwen kit Zerizalenm, me kontinyen esper sa ki mon Papa in promet parey mon ti dir zot. Parski Zan ti batiz dimoun dan delo, me zot zot pou ganny batize avek lespri sen dan ankor detrwa zour.”​—Akt 1:4, 5.

Pli tar, Zezi i zwenn avek son bann zapot ankor enn fwa. I anmenn zot “ziska Betani” ki lo kote les Montanny Pye Zoliv. (Lik 24:50) Malgre tou sa ki Zezi in dir zot konsernan lefet ki i pe ale, zot ankor krwar ki dan en fason ou en lot son Rwayonm pou lo later.​—Lik 22:16, 18, 30; Zan 14:2, 3.

Bann zapot i demann Zezi: “Senyer, eski ou pe al retabli rwayonm Izrael la konmela?” I senpleman dir: “I pa neseser pour zot konn letan ek lepok ki zis mon Papa i annan drwa deside kan i pou arive.” Apre sa, i remet lanfaz lo sa travay ki zot bezwen fer e dir: “Zot pou ganny pwisans ler lespri sen pou desann lo zot. Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.”​—Akt 1:6-8.

Bann zapot i avek Zezi lo Montanny Pye Zoliv ler i konmans mont dan lesyel. Apre en nyaz i kouver li e zot nepli kapab vwar li. Apre son rezireksyon, Zezi in aparet dan diferan lekor imen. Me la Zezi i kit sa lekor ki i pe servi e i mont dan lesyel konman en lespri. (1 Korentyen 15:44, 50; 1 Pyer 3:18) Bann zapot fidel pe get Zezi ki pe mont dan lesyel e la “de zonm dan lenz blan” i aparet akote zot. Zot bann lanz ki’n pran lekor imen e zot demande: “Zonm sorti Galile, akoz zot la pe get dan lesyel? Sa Zezi ki ti avek zot e ki’n mont dan lesyel pou vini dan menm fason ki zot in vwar li al dan lesyel.”​—Akt 1:10, 11.

Ler Zezi ti kit later, pa tou dimoun ki ti vwar li me zis son bann disip fidel ki ti vwar li.  I pou retourn “dan menm fason,” parski zis son bann disip fidel ki pou rekonnet ki i la pe dirize dan Rwayonm.

Bann zapot i retourn Zerizalenm. Pandan bann zour ki swiv, zot zwenn ansanm avek lezot disip, enkli “Mari, manman Zezi ek bann frer Zezi.” (Akt 1:14) Ansanm zot priy en kantite. Zot priy Bondye pour ed zot swazir en disip ki pou ranplas Zida Iskaryot pour ki i annan 12 zapot ankor enn fwa. (Matye 19:28) Zot anvi swazir en disip ki’n vwar bann keksoz ki Zezi in fer e son rezireksyon. Zot tir osor pour zot konn lavolonte Bondye. Sa i dernyen fwa ki tir osor i ganny mansyonnen dan Labib. (Psonm 109:8; Proverb 16:33) Matyas ki petet i enn parmi sa 70 disip ki Zezi ti anvoy prese, i ganny swazir e i “ganny konte ansanm avek sa 11 zapot.”​—Akt 1:26.

Dis zour apre ki Zezi in mont dan lesyel, bann dimoun i selebre Lafet Lapannkot lannen 33. Sa i en lafet Zwif. I annan apepre 120 disip ki’n rasanble dan en lasanm anler, Zerizalenm. En sel kou, zot kapab tann en tapaz parey en gro divan partou dan lakaz. Zot vwar sa ki resanble bann lalang dife apoz lo latet sakenn antre zot ki la. Tou bann disip i konmans koz diferan langaz. Sa i sa lespri sen ki Zezi ti promet pour donn zot!​—Zan 14:26.