Skip to content

Al lo konteni

 SAPIT 10

Fanmir Zezi i al Zerizalenm

Fanmir Zezi i al Zerizalenm

LIK 2:40-52

  • ZEZI I DEMANN BANN ANSENYAN BANN KESTYON A LAZ DOUZ AN

  • ZEZI I APEL ZEOVA “MON PAPA”

Nou dan sezon prentan e i ler pour fanmir Zozef, ansanm avek zot zanmi ek fanmir al Zerizalenm. Zot fer sa vwayaz tou le-z-an pour zot selebre Lapak parey Lalwa i demande. (Deterononm 16:16) Ant Nazaret ek Zerizalenm, i annan en zistans apepre 120 kilomet. Tou dimoun i okipe e byen eksite ler zot pe met zot pare. Zezi, ki’n ganny 12 an, i byen kontan pour al selebre sa lafet e pour li ganny sans vwar tanp ankor enn fwa.

Pour Zezi ek son fanmir, Lapak pa en levennman ki dire zis pour en zour. Sa zour apre Lapak, i annan en lot lafet ki konmanse ki dire pour set zour. Sa i Lafet Dipen san Lelven. (Mark 14:1) Sa lafet i form parti sezon Lapak. An tou, i pran apepre de semenn pour zot vwayaze sorti Nazaret, reste Zerizalenm e retourn kot zot. Me sa lannen i pran plis letan ki labitid akoz en pti lensidan ki’n arive avek Zezi ler zot pe retournen sorti Zerizalenm.

Ler zot pe vwayaze, Zozef ek Mari i krwar ki Zezi i avek bann fanmir ek zanmi ki pe al dan direksyon Nazaret. Me ler tou dimoun i arete pour repoze aswar, zot pa vwar li. Alor zot rod li partou parmi bann zanmi ek fanmir me i pa la. Zot pa vwar zot garson okenn par! Zozef ek Mari i retourn Zerizalenm pour rod li.

Zot rod li en lazournen antye me zot pa vwar li. Son lannmen, zot kontinyen rod li me zot pa vwar li menm. Finalman, trwazyenm zour zot vwar zot garson dan tanp, kot i annan en kantite lasal. Zot vwar Zezi pe asize parmi bann ansenyan Zwif. I pe ekoute, demann kestyon e tou dimoun i etonnen avek son lentelizans.

Mari i demann li: “Mon garson, akoz ou’n fer sa avek nou? Nou de ou papa nou ti vreman enkyet pe rod ou.”​—Lik 2:48.

Zezi i sirprann ki zot pa ti konnen kote i ete. I demann zot: “Akoz zot ti pe rod mwan? Eski zot pa ti konnen ki mon bezwen dan lakaz mon Papa?”​—Lik 2:49.

La ki zot in retrouv kanmarad, Zezi i retourn kot li Nazaret avek Zozef ek Mari e i kontinyen obei zot. Zezi i kontinyen grandi e i vin deplizanpli saz. Menm si i ankor zenn, i fer plezir Bondye ek zonm. Nou vwar ki depi byen zenn, Zezi i kit en bon legzanp konman en dimoun ki enterese avek keksoz spirityel e ki demontre respe pour son paran.