Skip to content

Al lo konteni

 SAPIT 11

Zan ki batize i prepar semen

Zan ki batize i prepar semen

MATYE 3:1-12 MARK 1:1-8 LIK 3:1-18 ZAN 1:6-8, 15-28

  • ZAN I PRESE E BATIZ DIMOUN

  • EN KANTITE DIMOUN I BATIZE, ME PA ZOT TOU

I fer 17 an depi ki Zezi ti kestyonn bann ansenyan kot tanp a laz 12 an. La i prentan lannen 29. I annan en kantite dimoun ki pe koz lo Zan, fanmir Zezi ki pe pres partou dan was Larivyer Zourden.

Laparans ek fason koze Zan i enpresyonan. Son lenz in ganny fer avek pwal samo e i met en sang lapo dan son leren. I manz sotrel ek dimyel maron. Ki mesaz i anonse? “Repantir, parski Rwayonm lesyel in aprose.”​—Matye 3:2.

Bann ki vin ekout mesaz Zan i vreman kontan pour tann li. En kantite dimoun i realize ki zot bezwen repantir, savedir ki zot bezwen sanz zot latitid ek fason fer par rezet zot vye fason viv ki pa bon. Bann dimoun ki vin vwar li i sorti “Zerizalenm e partou dan Zide ek rezyon Zourden.” (Matye 3:5) En kantite dimoun ki vin vwar Zan i vreman repantir. I batiz zot par plonz zot dan Larivyer Zourden. Akoz?

Bann dimoun ki ganny batize par Zan i montre ki zot in senserman repantir pour bann pese ki zot in fer kont lalyans Lalwa Bondye. (Akt 19:4) Me pa tou dimoun ki kalifye pour batize. Ler serten sef relizye, bann Farizyen ek bann Sadiseen i vin kot Zan, i dir zot: “Bann piti serpan, . . . fer bann aksyon ki montre ki zot in repantir. Pa krwar ki zot kapab zis dir, ‘Abraam i nou papa.’ Parski mon dir zot ki Bondye i kapab fer sa bann ros vin zanfan Abraam. Lars in fini pare pour koup rasin pye dibwa. Alor, tou pye dibwa ki pa raport bon fri pou ganny koupe e zete dan dife.”​—Matye 3:7-10.

Vi ki bokou dimoun i kontan Zan ek son mesaz e en kantite i batize, bann pret ek Levit i ganny anvoye pour demann li: “Lekel ou?”

Zan i admet: “Mon pa Kris.”

Zot demande: “Be alor, eski ou menm Eliya?”

I reponn zot: “Non.”

Zot demann li: “Eski ou sa Profet?” Zot pe koz konsernan sa Profet ki Moiz ti dir ti pou vini.​—Deterononm 18:15, 18.

Zan i reponn: “Non!”

Zot kontinyen ensiste: “Lekel ou? Dir nou pour ki nou kapab donn en larepons sa bann ki’n anvoy nou. Ki ou annan pour dir lo ou menm?” Zan i dir: “Zis parey profet Izai ti dir, Mwan menm sa dimoun ki pe kriye dan dezer, ‘Fer semen Zeova drwat.’”​—Zan 1:19-23.

Ankor enn fwa zot demann li: “Alor, akoz ou pe batiz dimoun si ou pa ni Kris, ni Eliya, ni sa Profet?” I donn zot en bon larepons: “Mwan mon batiz dimoun dan delo me i annan en dimoun parmi zot ki zot pa konnen, sa enn ki pe vin apre mwan, ki mon pa diny pour delarg lase son sandalet.”​—Zan 1:25-27.

Zan i la pour prepar semen Mesi par ed bann dimoun annan sa bon leta lespri pour aksepte sa Mesi ki ti’n ganny promet e ki pou vin Lerwa. Zan i dir sa lo li: “Sa enn ki pe vin apre mwan ki mon pa diny pour tir son sandalet i pli for ki mwan.” (Matye 3:11) Anfet, Zan i menm dir: “Sa enn ki pe vin apre mwan in depas mwan, parski i ti egziste avan mwan.”​—Zan 1:15.

Alor mesaz Zan i apropriye. I dir: “Repantir, parski Rwayonm lesyel in aprose.” (Matye 3:2) Sa mesaz i fer tou dimoun konnen ki Zezi Kri, sa Lerwa ki Zeova in anvoye, i pros pour konmans son minister.