Skip to content

Al lo konteni

 SAPIT 90

“Rezireksyon ek lavi”

“Rezireksyon ek lavi”

ZAN 11:17-37

  • ZEZI I ARIVE APRE KI LAZAR IN MOR

  • “REZIREKSYON EK LAVI”

Zezi i sorti Pere e la i ariv pre avek vilaz Betani ki apepre trwa kilomet avek les Zerizalenm. Mari ek Mart, i dan dey akoz zot frer Lazar fek mor pa tro lontan. I annan en kantite dimoun ki’n vin konsol zot.

Apre, en dimoun i dir Mart ki Zezi i pros pour arive e Mart i taye pour al zwenn li. Mart i dir Zezi sa ki li ek son ser ti pe probableman mazinen depi kat zour: “Senyer, si ou ti la, mon frer pa ti pou’n mor.” Par kont, i pa konmsi i napa okenn lespwar. Mart i dir: “Mon konnen ki nenport kwa ki ou pou demann Bondye, Bondye pou donn ou.” (Zan 11:21, 22) I santi ki petet Zezi i ankor kapab ed zot frer.

Zezi i dir: “Ou frer pou resisite.” Mart i krwar ki Zezi pe koz lo sa rezireksyon ki pou arive lo later a lavenir, sa menm lespwar ki Abraam ek lezot ti annan. Mart i osi dir ki i krwar ki sa pou definitivman arive: “Mon konnen i pou resisite dernyen zour.”​—Zan 11:23, 24.

Me eski Zezi i kapab soulaz zot deswit? I fer Mart rapel ki Bondye in donn li pouvwar lo lanmor ler i dir: “Sa enn ki demontre lafwa dan mwan, menm si i mor i pou reviv, tou sa ki viv e ki demontre lafwa dan mwan pa pou mor ditou.”​—Zan 11:25, 26.

Zezi pa pe dir ki son bann disip ki vivan sa letan pa pou zanmen mor. Menm li i bezwen mor, parey i’n deza dir son bann zapot. (Matye 16:21; 17:22, 23) Zezi pe montre ki si en dimoun i demontre lafwa dan li i kapab ganny lavi eternel. Bokou dimoun pou ganny lavi eternel ler zot resisite. Par kont, serten dimoun fidel ki pou viv dan letan lafen sa move lemonn pa pou zanmen mor. An tou ka, tou dimoun ki demontre lafwa dan Zezi i kapab asire ki zot pa pou mor pour touzour.

Zezi fek dir: “Mwan menm rezireksyon ek lavi.” Eski i kapab resisit Lazar ki’n mor depi detrwa zour? Zezi i demann Mart: “Eski ou krwar sa?” I reponn: “Wi Senyer, mon krwar ki ou menm Kris, Garson Bondye, sa enn ki pe vin dan lemonn.” Mart i annan lafwa ki Zezi i kapab fer en keksoz sa menm zour, alor i tay dan lakour e dir son ser an prive: “Ansenyan i la e i pe rod ou.” (Zan 11:25-28) Ler Mari i tann sa, i kit lakour. Pa tro bokou letan apre, lezot osi i swiv li an krwayan ki i pe al kot tonbo Lazar.

Plito, Mari i al kot Zezi, tonm azenou devan li e i konmans plere. I repet menm parol ki son ser ti’n dir pli boner: “Senyer si ou ti la, mon frer pa ti pou’n mor.” Ler Zezi i vwar Mari ek lafoul pe plere, i vin emosyonnel, son leker i fermal e i konmans plere. Sa i fer tou dimoun tris. Me serten i demande: ‘Si Zezi ti kapab geri en zonm ki’n ne aveg, pa i ti a kapab anpes sa enn mor?’​—Zan 11:32, 37.