Skip to content

Al lo konteni

 SAPIT 52

Zezi i donn manze plizyer milye dimoun avek zis detrwa dipen ek pwason

Zezi i donn manze plizyer milye dimoun avek zis detrwa dipen ek pwason

MATYE 14:13-21 MARK 6:30-44 LIK 9:10-17 ZAN 6:1-13

  • ZEZI I DONN 5,000 ZONM MANZE

Bann zapot in pas en bon moman dan zot kanpanny predikasyon Galile e zot rakont Zezi “tou bann keksoz ki zot ti’n fer e ansennyen.” I fer sans alor ki zot fatige. Par kont, zot pa ni menm annan letan pour manze akoz i telman annan en kantite dimoun pe ale vini. Alor Zezi i dir: “Vini, annou al dan en landrwa kot nou pou tousel e repoz en pe.”​—Mark 6:30, 31.

Zot anbark dan en kannot, tre probab pre avek Kapernaoum e zot depas Betsayda e al ver en landrwa trankil, dan les Larivyer Zourden. Par kont, en kantite dimoun i vwar zot ler zot pe ale e lezot osi i tann sa nouvel. Zot tou zot taye lo lans e zot ariv sa landrwa avan ki kannot i arive.

Ler Zezi pe debarke dan kannot, i vwar sa lafoul e son leker i fermal akoz zot parey bann mouton ki napa berze. Alor i konmans “ansenny zot en kantite keksoz” lo Rwayonm. (Mark 6:34) I osi geri “bann malad.” (Lik 9:11) Letan i pas vit e bann disip i vin kot li e dir: “Sa landrwa i izole e tar pe fer, fer lafoul ale pour zot kapab aste manze dan bann vilaz.”​—Matye 14:15.

Zezi i reponn: “Sa bann dimoun pa bezwen ale, zot, donn zot en keksoz pour manze.” (Matye 14:16) Zezi i deza konnen ki i pe al fer, me kantmenm, sa i demann Filip en kestyon pour teste li: “Kot nou pou aste dipen pour donn sa gran lafoul?” Zezi i annan rezon demann Filip sa kestyon akoz i sorti Betsayda ki pa tro lwen. Toudmenm, aste dipen pa pou rezourd sa problenm akoz i annan apepre 5,000 zonm. I menm kapab annan de fwa plis dimoun si nou azout bann madanm ek zanfan. Filip i reponn: “Lavaler 200 denye dipen pa pou ase pour tou dimoun ganny menm en pti morso.”​—Zan 6:5-7.

Petet pour montre ki i enposib pour donn tou dimoun manze, Andre i dir: “I annan en pti garson la ki annan senk dipen lorz ek de pti pwason. Me sa pou ase pour tou sa dimoun?”​—Zan 6:9.

I sezon prentan, zis avan Lapak lannen 32 e sa landrwa i kouver avek zerb. Zezi i demann son bann disip pour dir bann dimoun asiz lo zerb par group 50 ek 100. I pran sa senk dipen ek sa de pwason e remersye Bondye. Apre sa, i kas bann dipen an morso e partaz sa de pwason. Zezi i donn sa dipen ek pwason son bann disip pour zot partaz avek bann dimoun. Sa ki etonan, se ki tou dimoun i manze vant plen!

Pli tar, Zezi i dir son bann disip: “Anmas tou bann restan pour ki nanryen pa ganny gaspiye.” (Zan 6:12) Zot ranpli 12 pannyen avek bann morso ki reste!