Olye retourn Nazaret, Zozef ek Mari i reste Betleenm. Ler Zezi i annan wit zour, i ganny sirkonsi parey Lalwa ki Bondye ti donn nasyon Izrael i demande. (Levitik 12:2, 3) I osi koutim pour donn sa pti baba son non sa zour. Zis parey lanz Gabriyel ti’n demann zot, zot apel zot pti garson Zezi.

Plis ki en mwan in pase, i fer 40 zour depi ki Zezi in ne. Kote son paran i anmenn li aprezan? Kot tanp Zerizalenm, ki pa tro lwen avek kot zot pe reste, zis detrwa kilomet. Dapre Lalwa, 40 zour apre ki en manman i ganny en pti garson i bezwen al kot tanp e fer en lofrann pour li kapab ganny pirifye.​—Levitik 12:4-8.

Sanmenm sa ki Mari i fer. I anmenn de pti zwazo konman son lofrann. Sa i montre nou ki Zozef ek Mari i pov. Dapre Lalwa, en manman i devret ofer en zenn mal mouton ek en zwazo. Me si i napa ase larzan pour ofer en mal mouton, i kapab ofer de tourtrel oubyen de pizon. Vi ki Mari napa ase larzan, sanmenm sa ki i ofer.

Ler Zozef ek Mari i kot tanp, en msye aze i apros zot. I apel Simeon. Bondye in revel avek li ki avan i mor, i pou vwar Kris, andotmo, sa Mesi ki Zeova in promet. Sa zour, lespri sen i gid Simeon pour li vwar Zozef, Mari ek zot pti baba dan tanp. Simeon i pran sa pti garson dan son lebra.

Avek sa pti baba dan son lebra, Simeon i remersye Bondye e dir: “Aprezan, Souvren Senyer, ou pe les ou lesklav al anpe dapre sa ki ou’n dir, parski mon’n vwar sa enn ki pou anmenn delivrans ki ou’n anvoye devan tou pep. I pou en lalimyer ki pou tir sa vwal ki anpes bann nasyon vwar kler e i pou en laglwar pour ou pep Izrael.”​—Lik 2:29-32.

Zozef ek Mari i etonnen ler zot tann sa. Simeon i beni zot e dir Mari ki gras a son garson “bokou dimoun Izrael pou tonbe e lezot pou releve.” I osi dir li ki a lavenir i pou dan en sitan gran sagrinasyon ki i pou konmsi en gran lepe pou’n pers li.​—Lik 2:34.

I annan en lot dimoun ki la sa zour. I apel Ann, en madanm profet ki annan 84 an. Anfet, i toultan dan tanp. Dan sa menm moman, i vin kot Zozef, Mari ek Zezi. Ann i konmans remersye Bondye e koz lo Zezi avek tou bann ki pare pour ekoute.

Pa Zozef ek Mari i vreman kontan ler zot vwar tousala! Definitivman tousala i fer zot asire ki zot garson i sa Enn ki Bondye in promet.