Skip to content

Al lo konteni

 SAPIT 49

Zezi i prese Galile e form son bann zapot

Zezi i prese Galile e form son bann zapot

MATYE 9:35–10:15 MARK 6:6-11 LIK 9:1-5

  • ANKOR ENN FWA ZEZI I FER EN KANPANNY PREDIKASYON, GALILE

  • ZEZI I ANVOY BANN ZAPOT PRESE

Zezi in pres en kantite pandan sa de-z-an. Eski la aprezan i pou fer mwens e konmans repoz en pe? O kontrer, Zezi i fer plis e al ‘dan tou lavil ek vilaz [Galile], i ansenny zot dan bann sinagog, anons sa bon nouvel lo Rwayonm e i geri dimoun ki annan tou sort maladi ek tou sort problenm lasante.’ (Matye 9:35) Sa ki i vwar i fer li asire ki i bezwen fer plis ankor dan son minister. Be ki mannyer i pou fer sa?

Anmezir ki Zezi i vwayaze, i vwar ki bann dimoun i bezwen sa led ek rekonfor spirityel. Zot ganny maltrete e rezete parey bann mouton ki napa en berze. Zezi i pran pitye pour zot e i dir son bann disip: “Wi, rekolt i gran, me i annan en ptigin travayer. Pour sa rezon, sipliy Met rekolt pour anvoy plis travayer pour anmas son rekolt.”​—Matye 9:37, 38.

Zezi i konnen ki mannyer pour fer plis pour ed sa bann dimoun. I kriy son 12 zapot e i fer zot al prese de par de. Apre sa, i donn zot bann lenstriksyon kler: “Pa al kot lezot nasyon e pa antre dan okenn lavil Samariten, me plito, kontinyen al ver bann mouton perdi pep Izrael. Ler zot ale, prese e dir: ‘Rwayonm lesyel in aprose.’”​—Matye 10:5-7.

Zot pou pres lo sa Rwayonm ki Zezi ti koz lo la dan son lapriyer model. ‘Rwayonm in aprose’ dan sa sans ki sa Lerwa ki Bondye in swazir, setadir Zezi Kri i la avek zot. Me kwa ki pou montre ki bann disip Zezi i vreman bann  reprezantan sa Rwayonm? Zezi i donn zot pwisans pour geri bann malad e menm resisit bann ki’n mor e zot fer tousala pour nanryen. Si sa i leka, ki mannyer bann zapot pou kapab aste bann keksoz ki zot bezwen, parey zot manze pour sak zour?

Zezi i dir son bann disip ki zot pa devret pran okenn traka pour keksoz materyel dan sa kanpanny predikasyon. Zot pa devret anmenn lor, larzan oubyen kwiv dan zot portmonnen. Zot pa ni menm bezwen en sak manze oubyen de lenz, ni en lot per sandalet. Akoz? Zezi i asir zot: “En travayer i merit son manze.” (Matye 10:10) Bann dimoun ki zot zwenn ki apresye zot mesaz pou donn bann disip sa ki zot bezwen. Zezi i dir: “Dan nenport ki lakaz ki zot antre ladan, reste laba ziska ki zot kit sa landrwa.”​—Mark 6:10.

Zezi i osi donn lenstriksyon lo konman zot devret anons sa mesaz Rwayonm avek dimoun ki zot zwenn. I dir: “Ler ou antre dan lakaz, dir tou dimoun ki reste la, ‘Ki lape i avek zot.’ Si dimoun dan sa lakaz i merite, ki zot lape i reste avek sa bann dimoun, me si sa bann dimoun pa merite, ki sa lape i retourn avek zot. Partou kot dimoun pa resevwar zot oubyen pa ekout zot, ler zot pe kit sa lakaz oubyen sa lavil, tap zot lipye pour tir lapousyer.”​—Matye 10:12-14.

I menm kapab arive ki tou dimoun dan en lavil oubyen vilaz pa aksepte zot mesaz. Ki pou arive avek sa landrwa? Zezi i dir ki zot pou ganny zize. “Laverite mon dir zot, Zour Zizman, i pou pli sever pour sa lavil ki pour Sodonm ek Gomor.”​—Matye 10:15.