Skip to content

Al lo konteni

 SAPIT 99

Zezi i geri de zonm aveg e ed Zase

Zezi i geri de zonm aveg e ed Zase

MATYE 20:29-34 MARK 10:46-52 LIK 18:35–19:10

  • ZEZI I GERI DE ZONM AVEG ZERIKO

  • ZASE EN KOLEKTER TAKS I REPANTIR

Zezi ek bann ki pe vwayaz avek li i ariv Zeriko. I pran apepre en zournen pour marse sorti Zeriko pour al Zerizalenm. Anfet, Zeriko i de diferan lavil. I annan en zistans anviron 1.6 kilomet ki separ sa vye lavil avek sa nouvo lavil Romen. Ler Zezi ek lafoul pe kit enn ant sa de lavil pour al sa lot, de mandyan aveg i tann bann dimoun pe pase. Enn sa mandyan i apel Bartime.

Ler Bartime ek son zanmi i tande ki Zezi pe pase, zot konmans kriye: “Senyer, Garson David, pran pitye pour nou!” (Matye 20:30) Serten dan lafoul i koz severman avek sa bann mandyan e demann zot pour reste trankil, me zot kriy ankor pli for. Ler Zezi i tann sa ki pe arive, i arete. I demann bann ki avek li pour fer sa bann ki pe kriye vin kot li. Zot al kot bann mandyan e dir avek enn ant zot: “Pran kouraz! Leve, i pe apel ou.” (Mark 10:49) Sa zonm i byen kontan, deswit i zet son manto ater, leve e al kot Zezi.

Zezi i demande: “Ki zot oule mon fer pour zot?” Tou le de zonm i sipliye: “Senyer, fer nou vwar kler.” (Matye 20:32, 33) Leker Zezi i fermal, alor i tous zot lizye e avek enn sa bann zonm, i dir: “Ale. Ou lafwa in fer ou byen.” (Mark 10:52) Sa de mandyan aveg i vwar kler e san dout zot tou le de zot konmans glorifye Bondye. Ler bann dimoun i vwar sa ki’n arive, zot osi zot konmans loue Bondye. Sa de zonm ki ti aveg i konmans swiv Zezi.

I annan en gran lafoul otour Zezi anmezir ki i pas Zeriko. Tou dimoun i anvi vwar sa enn ki’n geri sa de zonm aveg e en kantite dimoun i antour li, me serten pa ni menm kapab vwar li. Parmi sa bann ki anvi vwar Zezi i annan en kolekter taks ki apel Zase. I sef bann kolekter taks Zeriko e dan zalantour. Vi ki i kourt, i pa kapab vwar sa ki pe arive. Alor Zase i tay par devan e mont lo en pye fig maron (oubyen pye sikomor) ki lo sa semen ki Zezi pe pran. Anler lo sa pye fig, Zase i kapab vwar byen tou sa ki pe pase. Anmezir ki Zezi i aprose e vwar Zase dan sa pye, i dir: “Zase, depese, desann parski ozordi mon bezwen reste kot ou.” (Lik 19:5) Zase i desann e tay kot li pour resevwar son viziter.

Ler bann dimoun i vwar sa ki pe arive, zot konmans konplent. Zot santi ki i mal pour Zezi al kot en zonm ki dapre zot i annan en move lavi. Zase in vin ris akoz i malonnet e i’n pran larzan dimoun ler i pe anmas taks.

Anmezir ki Zezi i antre dan lakaz Zase, bann dimoun i dir: “I’n aksepte lenvitasyon  kot lakaz en zonm ki annan en move lavi.” Par kont, Zezi i vwar Zase konman en dimoun ki kapab repantir e Zezi i annan rezon akoz Zase i debout e dir li: “Gete Senyer! Lanmwatye mon byen mon pe donn bann pov e sa ki mon’n vol avek lezot, mon pe al rann zot kat fwa plis.”​—Lik 19:7, 8.

Pa sa i en bon fason pour Zase montre ki i’n senserman repantir! I tre probab ki dapre son bann dokiman taks i kapab kalkile konbyen i’n gannyen avek bann Zwif e i promet pour rann zot kat fwa plis. Sa i menm plis ki lalwa Bondye i demande. (Egzod 22:1; Levitik 6:2-5) Deplis, Zase i promet ki i pou donn bann pov lanmwatye son bann byen.

Zezi i kontan pour vwar laprev ki Zase in repantir e i dir li: “Ozordi sa zonm ek son fanmir in ganny sove parski li osi i en desandans Abraam. Parski Garson zonm in vin rod e sov sa bann ki’n perdi.”​—Lik 19:9, 10.

Pa bokou letan pase, Zezi in servi legzanp garson “perdi” pour montre sityasyon bann dimoun ki’n kit Zeova. (Lik 15:11-24) Zase i en bon legzanp en dimoun ki ti’n preski perdi me ki’n ganny sove. Bann sef relizye ek lezot i konplent e kritik Zezi akoz i enterese avek bann dimoun parey Zase. Me kantmenm sa, Zezi i kontinyen rod sa bann garson Abraam ki’n perdi e ed zot retourn kot Bondye.