Samuel Pakhatnak 9:1-27

  • Samuel le Saul an i tong (1-27)

9  Kish tiah auhmi a rum ngaingaimi Benjamin mipa pakhat a um. Anih cu Abiel fapa a si, Abiel cu Zeror fapa a si, Zeror cu Bekorath fapa a si, Bekorath cu Aphiah fapa a si. 2  Kish cu Saul timi fapa pakhat a ngei. Saul cu tlangval chuakthiam ngai a si. Israel pa lakah amah nakin aa dawh deuhmi ahohmanh an um lo. Hawi hleiin a sang i midang vialte cu a liang can lawng an si. 3  Ni khat cu Kish i a laa pawl an tlau. Cucaah a fapa Saul kha “Zultu pakhat in i kalpi law laa kha va kawl hna u” tiah a ti. 4  Efraim tlangram le Shalishah ram vialte ah an kawl i an hmu lo. Shaalim ram pumpi zong ah an kawl nain an hmu lo. Cun Benjamin ram a kenkip ah an kawl nain an hmu hlei lo. 5  Zuph ram an phanh tikah Saul nih a zultu cu “Kir u sih! Cu lo ahcun ka pa cu laa kong ah si loin kanmah kong tu ah a lungre a thei sual lai” tiah a ti. 6  Asinain a zultu nih “Um rih hmanh! Hika khua ah Pathian mipa pakhat a um. Mi nih an upat ngaimi a si i a chimmi vialte cu a tling dih. A sinah va kal u sih law kan kalnak ding lam cu a kan chimh khawh ko lai” tiah a ti. 7  Cu tikah Saul nih “A hmaanmi Pathian mipa sin kan kal ahcun zeidah kan phorh lai? Kan zal chung ah changreu a um ti lo. Laksawng pek ding zeihmanh a um lo. Zeidah kan ngeih rih?” tiah a ti. 8  A zultu nih “Kaa hin ngun tangka* pakhat ka ngei. A hmaanmi Pathian mipa cu mah hi ka pek lai i kan kalnak ding lam cu a kan chimh lai” tiah a ti. 9  (Hlanlio ah Israel ram ah Pathian lamhruainak hal ding in an kal tikah “Hmutu sinah kal u sih” tiin an chim tawn. Tuchan ah profet tiah auhmi hna cu hlanlio chan ah hmutu tiah an rak auh hna.) 10  Saul nih a zultu cu “Na chimmi cu a ṭha, kal u sih” tiah a ti i a hmaanmi Pathian mipa a umnak khua ah cun an kal. 11  Khualei i an kai lioah ti than ding in a rami nu pawl he an i tong i “Hika khua ah hmutu a um maw?” tiah an hal hna. 12  Nu pawl nih hitin an leh hna: “A um ko, nan hmai te ah a kal. Atu khulrang in va kal u. Nihin cu biaknak hmunsang ah mi nih raithawinak an pek lai caah anih zong khua chung ah a ra. 13  Khua chung nan luhle cangka amah cu nan hmuh lai. Rawl ei awkah biaknak hmunsang i a kal hlanah va kal zokzok u. Amah nih raithawinak caah thla a cam lai, a phanh hlan cu ahohmanh an ei lai lo. Thla a cam hnu lawng ah sawmmi hna nih an ei lai. Atu va kal zokzok u law nan hmuh ko lai.” 14  Cucaah khualei ah cun an kai. Khua chung an luh tikah Samuel cu anmah don awk le biaknak hmunsang i kai awkah a rak chuak. 15  Saul a rat hlan ni khat ah Jehovah nih Samuel cu hitin a ti: 16  “Thaizing atu bantuk caan ah Benjamin ram i mipa pakhat kha na sinah ka rak thlah lai. Ka miphun Israel mi hna hruai awkah amah cu chiti na thuh lai. Amah nih Filistin mi hna kut in ka mi cu a khamh hna lai. Zeicahtiah ka miphun temhinnak cu ka hmuh i an ṭahhramnak kha ka theih.” 17  Samuel nih Saul a hmuh tikah “‘Ka miphun a uk hna lai’ tiin kaan rak chimhmi pa cu amah hi a si” tiah Jehovah nih a ti. 18  Saul cu hauka pawng ah a ummi Samuel sinah a va kal i “Zaangfahnak in hmutu inn kha na ka chim kho lai maw?” tiah a hal. 19  Samuel nih Saul kha hitin a leh: “Keimah hi hmutu cu ka si. Biaknak hmunsang ah ka hmai in kal law nihin cu keimah he rawl kan eiṭi lai. Hngalh na duhmi vialte kha kaan chimh lai i thaizing zing ah na kir te lai. 20  A luancia ni thum ah a tlaumi laa hna kong ah na lungrethei hlah, an hmuh cang hna. Israel ram i thil mansung vialte cu aho ta dah a si? Nangmah le na pa chungkhar ta a si lo maw?” 21  Cu tikah Saul nih “Kei cu Israel phun lakah a hme bikmi Benjamin phun ka si i ka chungkhar cu Benjamin phun chungkhar vialte lakah a biapi lo bikmi kan si. Cu a si ah zeicah ka sinah hitin na chim?” tiah a leh. 22  Cun Samuel nih Saul le a zultu kha rawl einak khaan ah a luhpi hna i a ṭhat biknak zawn ah a ṭhutter hna. Sawmmi cu mi 30 hrawng an si. 23  Samuel nih rawl chuangtu cu “‘A dang tein chia’ kaan timi sa kha rak pu” tiah a ti. 24  Rawl chuangtu nih a phei cu a lak i Saul cu a hunh. Cun Samuel nih “A dang tein chiahmi cu hunh na si cang, ei tuah! ‘Khual ka ngei lai’ tiah ka ti caah hi a sunglawimi ni i na ei awkah a dang tein an in chiahpiakmi a si” tiah a ti. Cu ni ah Saul le Samuel cu rawl an eiṭi. 25  Mah hnuah biaknak hmunsang in khua chung ah an ṭum. Samuel le Saul cu inncung ah bia an i ruah chap. 26  A thaizing zingkate ah Samuel cu a tho i inncung ah a itmi Saul kha a va auh, “Kal awkah i tim! Kaan thlah lai” tiah a ti. Cucaah Saul cu aa tim i an pahnih in leng ah an chuak. 27  Khua leng chuk zuannak an phanh tikah Samuel nih Saul cu “Na zultu kha kalter chung, nang tu cu um rih law Pathian bia kaan chimh lai” tiah a ti. Cucaah a zultu cu a kal chung.

Footnotes

^ A hrampi, “ngun shekel pakhat i cheu li cheu khat.” Shekel pakhat cu 11.4 g he aa tluk. Thlaihhlei B14 ah zoh.

Hi cauk i Copyrights