Samuel Pakhatnak 17:1-58
17 Filistin mi nih an ralkap kha raltuk awkah an pumh hna. Judah ram Soko khua ah an i pum i Soko le Azekah khua kar Efes-dammim ah riahhmun an khuar.
2 Saul le Israel mi cu Elah Nelrawn ah riahhmun an khuar i Filistin mi doh awkah timhcia tein hmun an la.
3 Filistin mi cu khattalei ral tlang ah an um, Israel mi zong a dang khattalei ral tlang ah an um ve i an karlak ah horkuang a um.
4 Filistin riahhmun in a ṭhawng ngaingaimi ralkap pakhat a hung chuak. Anih cu Gath khuami Goliath a si i dong ruk le khap khat* a sang.
5 Dar luchin aa chinh i dar in sermi nga phokphawher bantuk raltuknak angki aa hruk. Aa hrukmi dar angki cu shekel 5,000* a rit.
6 Dar in sermi ngal danh aa danh i a hnulei in dar fei tawi aa bei.
7 Aa putmi a fei fung thing cu thiam tlang tia a si, a feipar thir cu shekel 600* a rit. A phaw putu cu a hmai in a kal.
8 Goliath cu a dir i Israel ralkap kha hitin a hei au hnawh hna: “Zeicah raldoh ding in hmun nan lak? Kei cu Filistin miṭhawng ka si. Nannih cu Saul a salle nan si. Nan lakin mi pakhat thim u law keimah he i doh awkah rak chuak seh.
9 A ka doh i a ka thah khawh ahcun nan sal kan si lai. Asinain keimah nih ka tei i ka thah ahcun kan sal nan si lai i kan rian nan ṭuan lai.”
10 Cun “Nihin ah Israel ralkap cu kaan zuamcawh hna. Keimah he i doh awkah ralkap pakhat rak chuak seh” tiah a ti.
11 Saul le Israel mi vialte nih Filistin mipa bia kha an theih tikah an ṭih tuk i therphang in an um.
12 David cu Judah ram, Bethlehem tiah auhmi Efrathah khua i Jesse fapa a si. Saul siangpahrang a ṭuan lioah Jesse cu a kum a upa ngai cang. Jesse cu fapa pariat a ngei.
13 A fater Eliab, a changtu Abinadab le a pathumnak Shammah nih Saul cu raldohnak ah an zulh.
14 David cu a hniang bik a si, upa lei pathum nih Saul cu an zulh.
15 Saul sinah rian a ṭuanmi David cu a pa tuu khalh awkah Bethlehem ah a kir lengmang.
16 Goliath cu ni 40 chung zing fate, zanlei fate a hung chuak i Israel mi cu a zuamcawh hna.
17 Jesse nih David cu “Hi fangreu ephah pakhat* le changreu hlum 10 hi riahhmun ah a ummi na ule kha khulrang in va chaan hna.
18 Ralkap 1,000 haotu ralbawi caah cawhnuk khal tlang 10 hi va phor chih. Cun na ule an dam le dam lo va zoh law an dam ti hngalhnak caah thil pakhatkhat rak phor te” tiah bia a cah.
19 David a ule cu Saul le Israel ralkap hna he Filistin mi doh awkah Elah Nelrawn ah an um.
20 David cu zingka tein a tho i a tuu pawl kha tuukhal pakhat sinah a chiahta. Jesse nih a fialmi ning in a thil cu aa tim i a kal. Ralkap pawl cu raltuknak au thawng he raldoh ding in an i thawh lioah David cu riahhmun a va phan.
21 Israel mi le Filistin mi cu raldoh awkah hmaitonh in hmun an la.
22 David nih a thiltom cu thil zohkhenhtu sinah a rannak in a chiah i raltuknak hmun ah a va tli colh. A phanh tikah a ule cu an dam le dam lo a hal hna.
23 Cutin a hal hna lioah Gath khuami Filistin miṭhawng Goliath cu Filistin ralkap chung in a hung chuak i Israel mi kha a hlan bantuk in a zuamcawh ṭhan hna. Mah kha David nih a theih.
24 Israel ralkap pawl nih Goliath kha an hmuh tikah an ṭih tuk i an zam dih.
25 Israel ralkap hna nih “Atu a rak chuakmi pa khi na hmu maw? Amah nih Israel ralkap pawl kha a kan zuamcawh. Mah mipa a that khotu cu siangpahrang nih laksawng tampi a pek lai i a fanu zong a pek lai. A pa innchungkhar cu Israel ram ah ngunkhuai le a dang rian hna in an luat lai” tiah an chimh.
26 David nih a pawng i a dirmi ralkap pawl kha “Mah Filistin mipa hi a that kho i Israel mi nehsawh an sinak a hlo khotu cu zei laksawng dah pek a si lai? A nungmi Pathian ralkap kha zuamcawh awkah mah cuarpar tan lomi Filistin mipa cu ahodah a si?” tiah a ti hna.
27 Cu tikah ralkap pawl nih “Amah a that khotu cu mah laksawng hna hi pek a si lai” tiin a hmasa bantuk khan an chimh ṭhan.
28 A ule lakah upa bik Eliab nih ralkap pawl le David bia an i ruahmi kha a theih tikah a thin a hung i “Kaa hin zeidah na rak tuah? Ramlak i tuu pawl tah aho sinah dah na chiahta? Na ninghngal le na lungput a ṭhat lo kha ka hngalh ko. Raldohnak zoh na duh caah na ratmi a si ko lai” tiah a ti.
29 Cu tikah David nih “Zeidah ka tuah? Bia ka hal sawhsawhmi hna pei a si ko cu!” tiah a leh.
30 Cu hnuah midang sinah a va kal ṭhan i a hmasa bantuk in a hal ṭhan hna. Annih zong nih a hmasa bantuk in an leh ṭhan.
31 David bia a theimi cheukhat nih Saul cu an va chimh chin. Cucaah Saul nih David cu a auhter hna.
32 David nih Saul cu “Hi Filistin mipa ruang ah ahohmanh ṭihnak ngei hlah u. Na salpa nih ka va chuah hnawh lai i ka va doh lai” tiah a ti.
33 Asinain Saul nih “Mah Filistin mipa hi na tei kho lai lo. Anih cu a no lio tein ral a domi a si cang i nang cu mino te lawng na si rih” tiah a ti.
34 David nih hitin a leh: “Na salpa hi ka pa tuurun a khaltu ka si. Chiandeih nih tuu pakhat a rak seh bal, vom zong nih a rak seh bal.
35 Cu tikah ka dawi i sahrang kaa chung in tuu cu ka chuah. A ka zuan hnawh tikah a hngawng in ka tlaih, ka tuk i ka thah.
36 Na salpa nih chiandeih he, vom he ka rak thah hna. Mah cuarpar tan lomi Filistin mipa zong hi a nungmi Pathian ralkapbu a zuamcawh caah mah sahrang hna lak i pakhat bantuk a si ve ko lai.”
37 Cun “Chiandeih le vom kut in a ka khamhtu Jehovah nih hi Filistin mipa kut chung zong in a ka khamh ko lai” tiah a ti tikah Saul nih “A si ahcun va kal ko. Jehovah nih in umpi ko seh” tiah a ti.
38 Saul nih amah thilpuan kha David cu a hrukter. Cun dar luchin a chinhter i raltuknak angki a hrukter.
39 David cu a thilthuam cung in nam aa thlaih i kal awkah aa tim. Asinain aa hruk tawnmi thil a si lo caah aa ziak lo i a kal kho lo. Cucaah “Kaa hruk tawnmi thil a si lo caah ka kal kho lo” tiah a ti i a ralthuam cu a phoih.
40 Cun a ṭhiangṭhunh kha aa lak, tivate in lungmil tete panga a thim i a tuu khalhnak zal chung ah a sanh. Cu hnuah lungherh chehnak kha aa lak i Filistin mipa cu a va naih.
41 Filistin mipa nih David cu a hun naih. A phaw putu cu a hmaiah a um.
42 Misen tirter te le midawh ngai a simi mino te David kha a hmuh tikah Filistin mipa nih a nihsawh.
43 Cun David cu “Funghreu he na rak ka rat hnawh cu uico ah ma na ka rel?” tiah a ti i a pathian min chalh in chiat a serh.
44 Cun “Rak ra tuah, na sa kha va le sahrang ka dangh hna lai” tiah a ti.
45 David nih hitin a ti: “Nang nih cun vainam, fei le fei tawi he na rak ka rat hnawh. Asinain kei nih cun na serhsatmi* Israel ralkap hna i an Pathian ralkapbu Bawipa Jehovah min in kaan rat hnawh.
46 Nihin hrimhrim ah Jehovah nih nangmah cu ka kut chung ah a ka pek lai. Kaan thah lai i na lu kaan tan lai; nihin ah Filistin ralkap pawl an ruak cu va le sahrang ka dangh hna lai. Cu tikah vawleicung mi vialte nih Israel mi hna sinah Pathian a um ti kha an hngalh lai.
47 Jehovah nih a miphun khamh awkah fei le nam a herh lo ti kha hika i a ummi vialte nih an hngalh lai. Teinak cu Jehovah sinin a rami a si. Pathian nih nan dihlak in kan kut chung ah a kan pek lai.”
48 Cu tikah Filistin mipa nih David cu a rat hnawh. David zong Filistin mipa doh awkah khulrang in a va tli.
49 Cun a zal aa purh i lung pakhat a chuah, Filistin mipa cu lungherh in a hei cheh tikah a cal ah a khen i lung cu a pil. Mipa cu a bawktakhup in a tlu.
50 David kut chung ah vainam a um lo nain lungherh chehnak pakhat le lung pakhat in Filistin mipa cu a doh, a tei i a thah.
51 David cu Filistin mipa sinah a va tli i a ke in a lamh. Cun mipa a vainam kha a kawng in a zuh i a thi taktak ti aa fian nakhnga a lu a tan. Filistin ralkap pawl nih an miṭhawng pa a thi cang ti kha an hmuh tikah an zam dih.
52 Cu tikah Israel ralkap le Judah ralkap pawl cu thangpi in an au i Filistin mi kha horkuang in Ekron khua hauka tiang an dawi hna. Cucaah Shaaraim in Gath khua le Ekron khua tiang lam thluangthluan ah Filistin ralkap tampi an thi.
53 Israel ralkap hna cu Filistin ralkap fakpi in an dawi hnanak in an rak kir i Filistin mi hna riahhmun kha an lak.
54 David nih Filistin mipa lu kha Jerusalem ah a rak phorh. Asinain Filistin mipa hriamnam tu cu a thlam ah a chiah.
55 Filistin mipa doh awkah David a kalmi kha Saul nih a hmuh tikah a ralbawi Abner kha “Mah pate khi aho fa dah a si?” tiah a hal. Abner nih “Siangpahrang, na nunnak chalh in ka chim lai, ka hngal lo!” tiah a leh.
56 “Mah tlangval pa khi aho fa dah a si ti kha hlat” tiah siangpahrang nih a ti.
57 Filistin mipa kha a thah i mipa a lu i put in a rak kirmi David kha Abner nih Saul sinah cun a kalpi colh.
58 Saul nih “Tlangval pa, aho fa dah na si?” tiah a hal tikah David nih “Bethlehem khuami, na salpa Jesse fapa ka si” tiah a leh.
Footnotes
^ Pe kua le a cheu dengmang (2.9 m). Thlaihhlei B14 ah zoh.
^ Pound 125 hrawng (57 kg). Thlaihhlei B14 ah zoh.
^ Pound 15 hrawng (6.48 kg). Thlaihhlei B14 ah zoh.
^ 22 L hrawng. Thlaihhlei B14 ah zoh.
^ Asiloah “na zuamcawhmi.”
