Samuel Pakhatnak 26:1-25
26 A hnuah Ziph khuami hna cu Gibeah khua ah a ummi Saul sinah an ra i “David cu Jeshimon* lei a hoihmi Hakhilah tlangbo ah aa thup” tiah an chimh.
2 Cucaah Saul cu Israel mi lakin thimmi ralkap 3,000 he David kawl awkah Ziph ramcar lei ah an i thawh.
3 Saul cu lam pawng i Jeshimon lei a hoihmi Hakhilah tlangbo ah riahhmun a khuar. Mah lioah David cu ramcar ah a um i Saul cu amah kawl awkah a rak phan cang ti kha a hngalh.
4 Cucaah Saul a ra taktak maw ti hngalh awkah David nih mi-ngiatu a thlah hna.
5 A hnuah David cu Saul riahhmun ah a va kal. David nih Saul le Ner fapa, ralbawi Abner an ihnak zawn kha a hmuh. Saul cu riahhmun laifang ah a it i ralkap pawl cu a velchum ah an riak.
6 David nih Hit mi Ahimelek le Zeruiah fapa, Joab a upa Abishai kha “Saul riahhmun ah ahodah a ka zul lai?” tiah a hal hna tikah Abishai nih “Keimah nih kaan zulh lai” tiah a ti.
7 Cucaah David le Abishai cu zan ah riahhmun ah cun an kal. Saul cu a lu hram vawlei ah a fei a bunh i a rak i hngilh ko kha an hmuh. Abner le ralkap pawl cu a velchum ah an rak it.
8 Mah tikah Abishai nih David cu “Nihin ah na ral hi Pathian nih na kut ah aan pek cang. Atu fei in voi khat te vawlei ah tleng lak in chun ko ning, voi hnih hmanh chunh a hau lai lo” tiah a ti.
9 Asinain David nih “A cung ah zeihmanh tuah hlah. Jehovah chiti thuhmi harnak a petu cu sualnak in a luat kho lai maw?” tiah a ti.
10 Cun hitin a ti chap: “Jehovah a nun bang in ka chim lai, Jehovah nih dan a tat te ko lai asiloah minung phung bang in a thi te ko lai asiloah raldohnak ah a kal lai i thah a si te ko lai.
11 Jehovah hmuhnak in zoh ahcun Jehovah chiti thuhmi harnak pek ding cu a ruah hmanh ka ruah awk a si lo! A lu hram i fei le ti-thawl kha la law kal u sih.”
12 Cucaah Saul lu hram i fei le ti-thawl kha an lak i an kal. Ahohmanh nih an hmu hna lo, an i ṭhang lo i an ratmi kha an hngal lo. Jehovah nih thu hluahmah in a hngilhter hna caah an dihlak in an i hngilh.
13 David cu horkuang khattalei ral ah a kal i aa hlatnak tlangpar ah a dir. An karlak cu aa hlat ngaingai.
14 David nih ralkap pawl le Ner fapa Abner kha a au hnawh hna i “Abner, ka aw na thei maw?” tiah a ti tikah Abner nih “Siangpahrang a au hnawhtu cu ahodah na si?” tiah a leh.
15 Mah tikah David nih “Pa na si lo maw? Israel ram ah nangmah bantuk ahodah a um? Cu a si ah na bawipa siangpahrang cu zeicah ṭha tein na zohkhenh lo? Siangpahrang thah awkah ralkap pakhat riahhmun ah a rak lut khah.
16 Na rian ṭha tein na ṭuan lo. Jehovah a nun bang in ka chim lai, Jehovah chiti thuhmi na bawipa kha ṭha tein na zohkhenh lo caah nang cu thih awkah naa tlak. Siangpahrang lu hram i fei le ti-thawl cu khoika ah dah a um? Zoh tuah!” tiah a ti.
17 Saul nih David aw kha a hun hngalh i “Ka fapa David, nangmah na si maw?” tiah a ti tikah David nih “Ka si ko, ka bawipa” tiah a leh.
18 Hitin a ti chap: “Ka bawipa, na salpa hi zeicah na ka dawi? Zeidah ka tuah sual i zei palhnak dah ka tuah?
19 Siangpahrang ka bawipa, zaangfahnak in na salpa bia hi ka ngaihpiak ko: Keimah doh awkah aan forhtu cu Jehovah a si ahcun changvut thawinak ka pek lai i rak ka cohlanpiak ko seh. Asinain minung nih an in forhmi a si ahcun Jehovah hmaiah chiatserh si ko hna seh. Zeicahtiah nihin ah an ka ṭhawl i Jehovah ro chung ah ka um kho ti lo. Mah cu ‘Va kal law pathian dang va bia!’ tiah an ka timi bantuk a si.
20 Jehovah hmaika in aa hlatnak ah ka thisen hi luanter sawh hlah. Israel siangpahrang cu tlang cung ah vaking kawl bantuk in uihli pakhat te kawl awkah a rak i thawh cang.”
21 Mah tikah Saul nih “Ka sual cang. Ka fapa David, rak kir ṭhan ko. Nihin ah ka nunnak hi na sunsak caah zei harnak hmanh kaan pe ti lai lo. Hrut ngai in thil ka tuah i ka palh tuk cang” tiah a ti.
22 David nih “Siangpahrang, hika ah na fei a um. Pakhatkhat rak thlah hna law rak la hna seh.
23 Jehovah nih mikip kha an dinnak le an zumhfehnak ning cio in a cham hna lai. Nihin ah Jehovah nih nangmah kha ka kut chung ah a ka pek nain Jehovah chiti thuhmi harnak pek kha ka duh lo.
24 Nihin ah na nunnak ka sunsak bantuk in Jehovah nih ka nunnak hi sunsak ve ko seh. Harnak vialte chung in ka khamh ko seh” tiah a ti.
25 Mah tikah Saul nih “Ka fapa David, Pathian nih thluachuah in pe ko seh. Thil lianngan kha na tuah khawh hna lai i teinak na hmu hrimhrim lai” tiah a ti. Cun David cu a kal i Saul zong a inn ah a tlung ve.
Footnotes
^ Asiloah “thetse ram; ramcar” ti zong a si kho.
