Samuel Pakhatnak 20:1-42
-
David cung ah Jonathan zumhawktlak in a um (1-42)
20 Cun David cu Ramah khua, Naioth in a zam. Jonathan sinah a kal i “Zeidah ka tuah? Zei palhnak dah ka tuah? Na pa cung ah zei sualnak dah ka tuah i thah a ka timh?” tiah a ti.
2 Cu tikah Jonathan nih “A si kho lo! Ahohmanh nih an in that lai lo. Ka pa nih keimah theihter loin thil hmete siseh, thil nganpi siseh zeihmanh a tuah lo. Mah kong zong hi ka sinin a thup lai lo. Na thi lai lo” tiah a ti.
3 Asinain David nih “Na mithmai ṭha ka hmuhmi hi na pa nih a hngalh caah ‘Jonathan cu theihter hlah u, a ngaih a chia sual lai’ tiah a ti i a si ko lai. Asinain Jehovah a nun bang in le nangmah na nun bang in keimah le thihnak karah kar khat lawng a um cang!” tiah a ti.
4 Cu tikah Jonathan nih “Na chimmi paoh kaan tuahpiak lai” tiah a ti.
5 David nih Jonathan cu “Thaizing cu thla thar a si caah siangpahrang he ka eidin a hau. Asinain kiptuh zanlei tiang ramlak ah kaa thup lai, ka kalter ko.
6 Na pa nih a ka hlam ahcun ‘David nih a khua Bethlehem ah chikkhat tlun ding in a ka nawl i ka kalter, zeicahtiah cuka ah kum fatin an chungkhar ning in raithawinak an pek tawn’ tiin na va leh lai.
7 ‘A ṭha ko’ a ti ahcun na salpa caah hin hnangam a si tinak a si lai. Asinain a thin a hun ahcun keimah harnak pek awkah bia a khiah cang tinak a si lai.
8 Na salpa he Jehovah hmaiah biakamnak na ser cang caah ka cung ah a fekmi dawtnak langhter ko. Asinain ka sual ahcun nangmah nih ka that ko. Na pa kut ah cun ka chaan sawh hlah” tiah a ti.
9 Cu tikah Jonathan nih “Cutin ruat hlah! Ka pa nih nangmah harnak pek ding in bia a khiah cang ti ka hngalh ahcun kaan theihter hrimhrim ko lai” tiah a leh.
10 “Na pa cu ka cung ah a thin a hun le hun lo aho nih dah a ka chimh lai?” tiah David nih a hal tikah,
11 Jonathan nih “Ra, ramlak ah va kal u sih” tiah a ti i an pahnih in ramlak ah cun an kal.
12 Jonathan nih David cu hitin a ti: “Israel Pathian Jehovah cu kan karah tehte si ko seh. Ka pa nih zeitindah aan hmuh ti hngalh awkah thaizing asiloah kiptuh atu bantuk caan ah hin bia ka va ruah lai. Na kong kha a ṭhatnaklei in a chim ahcun kaan hngalhter te ko lai.
13 Ka pa nih harnak pek aan timhmi ka hngalh ko nain kaan chimh lo ruang ah him tein na zam khawh lo ahcun Jehovah Pathian nih ka cung ah dantatnak pakhat hnu pakhat in tlunter ko seh. Jehovah cu ka pa sinah a rak um bantuk in nangmah sin zong ah um ve ko seh.
14 Ka nun lioah siseh, ka thih hnuah siseh Jehovah ngeihmi a fekmi dawtnak phun kha ka cung ah langhter ko.
15 Jehovah nih vawleicung pumpi in na ral vialte a hloh dih tik hna hmanh ah ka chungkhar cung ah a fekmi dawtnak langhter peng.”
16 Cun “Jehovah nih David ral kha dantat ko hna seh” tiah a ti i David innchungkhar he biakamnak a ser.
17 Jonathan nih David kha amah aa dawt tluk in a dawt caah a dawtnak chalh in chiat a ser ṭhan.
18 Jonathan nih David cu hitin a ti: “Thaizing cu thla thar a si. Na ṭhutnak cu a lawn lai caah an in hlam lai.
19 Kiptuh ah cun an in hlam chinchin cang lai. Cucaah a hmasa na rak i thuhnak hika hmun ah hin ra ṭhan law hi lung pawng ah hin rak um.
20 Hmuichon a kapmi bantuk in lung a sirlei ah thal pathum ka rak kah lai.
21 Ka hnu zultu kha ‘Thal cu va kawl hna’ tiah ka ti lai. Cun ‘Zoh hmanh! Thal cu na pawng ah a um, rak char’ tiah ka ti ahcun na rak kir ṭhan kho. Zeicahtiah Jehovah a nun bang in mah cu na caah hnangam a si i ṭih awk zeihmanh a um lo tinak a si lai.
22 Asinain ‘Thal nih aan lonh cang’ tiah ka ti ahcun rak kir ti hlah. Zeicahtiah mah cu Jehovah nih lamhlat ah aan kalter cang tinak a si.
23 Kan rak sermi biakamnak he aa tlaiin Jehovah cu kan karah a zungzal in tehte si ko seh.”
24 Cucaah David cu ramlak ah aa thup. Thla thar a phanh tikah siangpahrang cu rawl ei awkah a ṭhutnak ah cun a ṭhu.
25 Siangpahrang cu a ṭhut tawnnak vanpang pawng ah cun a ṭhu, Jonathan cu hmaitonh in a ṭhu i Abner cu Saul pawng ah a ṭhu. Asinain David ṭhutnak tu cu a lawng.
26 Cu ni ah Saul nih zeihmanh a chim lo. Zeicahtiah a lung chung in ‘A kong pakhatkhat ruang ah a thiang lo i a si lai. A si, a thiang lo i a si lai’ tiah a ruah.
27 A thaizing zong ah David ṭhutnak cu a lawng ṭhiamṭhiam ko. Cucaah Saul nih a fapa Jonathan cu “Jesse fapa hi zeicah nizan he, nihin he rawl einak ah a rat lo?” tiah a hal.
28 Jonathan nih hitin a leh: “David nih Bethlehem ah tlun ding in nawl a ka hal.
29 ‘Khua ah chungkhar raithawinak puai a um, ka upa zong nih ratter a ka duh. Zaangfahnak in ka kalter ko. Na mithmai ṭha ka hmuh ahcun ka ule he i ton awkah chikkhat ka kirter ko’ tiah a ka nawl. Cucaah siangpahrang cabuai ah a rak ei khawh lomi a si.”
30 Cu tikah Saul cu Jonathan cung ah a thin a hung tuk i “Ralchanh a hmangmi nu fapa, Jesse fapa lei ah na ṭan hi a hngal lo tiin ma na ka ruah? Nangmah lila cung ah le na nu cung ah ningzahnak na tlunter cang.
31 Vawleicung ah Jesse fapa a nun chung paoh cu nangmah le na pennak hi a hmun lai lo. Cucaah atu mi hei thlah hna law ka sinah ratpi hna seh, a thih awk a si” tiah a ti.
32 Asinain Jonathan nih “Zei ruang ah dah a thih lai? Zei sualnak dah a tuah i?” tiah a pa cu a ti.
33 Cu tikah Saul nih Jonathan thah awkah fei in a hei khawh. Cu hnu lawng ah a pa nih David thah awkah bia a khiah cang ti kha Jonathan nih a hun hngalh.
34 Jonathan cu a thin a hung tuk i rawl einak in a tho colh. David kong ah a ngaih a chiat caah le a pa nih mual a phoh caah mah ni ah zeihmanh a ei kho lo.
35 A thaizing zing ah Jonathan cu David he i ton awkah a hnu zultu he ramlak ah an kal.
36 A hnu zultu cu “Tli law ka kahmi thal kha va kawl hna” tiah a ti. A hnu zultu a tlik tikah Jonathan nih thal cu a hnu zultu lonh in a hei kah.
37 Jonathan kahmi thal a tlaknak zawn a phanh tikah Jonathan nih a hnu zultu cu “Thal nih aan lonh cang” tiah a au hnawh.
38 Cun “Khulrang in char! Tli zokzok! I nuarh tuk hlah!” tiah a au. A hnu zultu nih thal cu a char hna i Jonathan sinah a rak kir ṭhan.
39 A hnu zultu nih cun thil sining kha a hngalthiam lo. Jonathan le David lawng nih an hngalh.
40 Cun Jonathan nih a li le a thal cu a hnu zultu kha a pek i “Khua chung ah va kirpi” tiah a ti.
41 A hnu zultu a kal tikah David cu thlanglei kam aa thuhnak in a hung chuak. Vawlei ah a bawk i voithum a kun. Cun pakhat le pakhat an i hnam i an i ṭah. David cu fak deuh in a ṭap.
42 Jonathan nih “‘Nangmah le keimah karah siseh, na tefa le ka tefa karah siseh Jehovah cu zungzal in tehte si ko seh’ tiah Jehovah min chalh in chiat kan rak ser cang caah lungdai tein va kal ko” tiah a ti.
Cu hnuah David cu a kal, Jonathan zong khua chung ah a lut ve.
