Samuel Pakhatnak 29:1-11
-
Filistin mi nih David an zum lo (1-11)
29 Filistin mi nih an ralkap vialte kha Aphek khua ah an pumh hna. Israel mi tu cu Jezreel khua i cerhti pawng ah riahhmun an khuar.
2 Filistin bawi hna cu ralkap za khat phu le thong khat phu hna he an kal tikah David le a mi hna zong Akhish he hnulei in an kal ve.
3 Filistin bawi hna nih “Hebru mi hna hi kaa hin zeidah an rak tuah ve?” tiah an ti tikah Akhish nih “Anih cu Israel siangpahrang Saul a sal David a si. Ka sinah kum khat leng a um cang. Ka sinah a rak zam ni thawk in nihin ni tiang a cung ah palhnak zeihmanh ka hmu lo” tiah a ti hna.
4 Asinain Filistin bawi hna cu a cung ah an thin a hung i “Hi pa hi na pekmi hmun ah khan kirter ṭhan ko. Raldohnak ah kanmah he kal hlah seh. Raldohnak chung ah kanmah tu a kan doh sual lai. Kan mi hna i an lu kha tan in a bawipa mithmai ṭha hmuh awkah aa zuam sual lai.
5 Mi nih an laam pah in,
‘Saul thahmi cu a thongthong,David thahmi cu a sangsang’ tiin hla an sak hnawhmi David kha a si lo maw?” tiah an ti.
6 Cucaah Akhish nih David cu a auh i “Jehovah a nun bang in ka chim lai, nang cu miding na si i ka ralkap hna he raldohnak ah kalter kaan duh ko. Ka sinah na rat ni thawk in nihin ni tiang na cung ah palhnak zeihmanh ka hmu lo. Asinain a dang bawi pawl nih an in zum lo.
7 Cucaah dai tein va kir ko. Filistin bawi pawl nih an duh lomi zei thil hmanh tuah hlah” tiah a ti.
8 Asinain David nih “Zeicah? Ka tuah sualmi zeidah a um? Na sin i ka rat ni thawk in nihin ni tiang ka cung ah zei palhnak dah na hmuh? Ka bawipa ral pawl doh ve awkah zeicah ka kal lai lo?” tiah a leh.
9 Akhish nih David cu “Keimah hmuhnak ahcun nang cu Pathian vancungmi tluk in na ṭha. Asinain Filistin bawi pawl nih ‘Raldohnak ah kanmah he kal ve hlah seh’ an in ti.
10 Cucaah na ratṭimi na bawipa salle he zingka tein tho u law khua a deile cangka va kal u” tiah a ti.
11 David le a mi pawl cu zingka tein an tho i Filistin ram ah cun an kir. Filistin ralkap pawl cu Jezreel khua ah an kal.
