Samuel Pakhatnak 15:1-35
15 Samuel nih Saul kha hitin a ti: “Jehovah nih a miphun Israel mi caah siangpahrang in nangmah chiti thuh awkah a rak ka thlah. Atu Jehovah chimmi bia hi ngai hmanh.
2 Ralkapbu Bawipa Jehovah nih hitin a ti: ‘Israel mi Izipt ram in an rak chuah lioah lampi ah Amalek mi nih an rak doh hna. Mah an tuahsernak ruang ah dan ka tat hna lai.
3 Atu va kal law Amalek mi kha va do hna. Anmah he, an ngeihmi vialte he va hrawk cikcek hna. Pakhat hmanh ngaan hna hlah! Nu, pa, ngakchia, bawhte, cawtum, tuu, kalauk le laa vialte kha that dih hna.’”
4 Saul nih mi kha a pumh hna i Telaim ah a rel hna tikah ke ralkap 200,000 le Judah ralkap 10,000 an si.
5 Saul cu a ralkap hna he Amelek khua pawng tiang a kal i tivarek ah a thli tein a bawhtu ralkap kha a chiah hna.
6 Saul nih Ken mi kha “Amalek mi hna he kan in hrawh chih ve hna nakhnga lo an sinin chuak u. Zeicahtiah Israel mi Izipt ram in an rak chuah lioah an cung ah a fekmi dawtnak nan rak langhter” tiah a ti hna. Cucaah Ken mi cu Amalek mi hna sinin an chuak.
7 Cu hnuah Saul nih Havilah in Izipt ram pawng Shur tiang Amalek mi cu a doh hna i a tei hna.
8 Amalek siangpahrang Agag kha a nung in a tlaih, asinain midang vialte kha cu vainam in a thah dih hna.
9 Saul le a mi hna nih siangpahrang Agag kha an that lo. Tuurun le cawrun lakin a ṭha bikbik, a thaumi saṭil hna le tuukawng le thil mansung hna kha an nganhta, a dihlak in an hrawk duh lo. An duh lomi le man a ngei lomi thil lawng kha an hrawh.
10 Jehovah nih Samuel cu,
11 “Saul siangpahrang in ka rak sermi cu kaa ngaichih cang. Ka hnu zulh loin lam a pial cang i ka bia kha a ngai lo” tiah a ti. Cucaah Samuel cu a ngaih a chia tuk i zan khuadei Jehovah kha a nawl.
12 Samuel cu zingka tein Saul ton awkah a va kal tikah mi nih “Saul cu Karmel ah a kal i amah upatnak caah lung a phun. Cu hnuah aa mer i Gilgal ah a ṭum” tiah an chimh.
13 Samuel a sin i a rak phanh tikah Saul nih “Jehovah nih thluachuah in pe ko seh. Jehovah chim ning in ka tuah dih cang” tiah a ti.
14 Asinain Samuel nih “A si ahcun zeicah tuurun le cawrun aw cu ka theih kun?” tiah a ti.
15 Saul nih “Mah saṭil hna cu Amalek mi hna sinin an lakmi a si. Jehovah na Pathian sin raithawinak pek awkah ralkap pawl nih tuurun le cawrun lakin a ṭha bik kha an nganh. A taangmi kha cu kan hrawh dih cikcek ko hna” tiah a ti.
16 Samuel nih “Chim ti hlah! Zahan ah Jehovah nih zeidah a ka chimh ti kha kaan chimh lai” tiah a ti tikah Saul nih “Chim ko!” tiah a leh.
17 Samuel nih “Israel miphun hruaitu in thim na si lio le Jehovah nih Israel ram siangpahrang in chiti aan thuh lioah nangmahle nangmah zeihmanh ka si lo tiah naa rak i ruat, a si ko lo maw?
18 A hnuah Jehovah nih ‘Va kal law sualnak a tuahmi Amalek mi kha va hrawk cikcek hna. Va do hna law pakhat hmanh ngaan hna hlah’ tiah aan fial.
19 Jehovah bia kha zeicah na ngaih lo? Hranchaw kha hakkau ngai in na lak i Jehovah mithmuh ah thil ṭhalo na tuah cang!” tiah a ti.
20 Asinain Saul nih Samuel cu “Jehovah bia ka ngaih ko! Jehovah nih a ka fial ning in ka tuah. Amalek siangpahrang Agag kha ka tlaih i Amalek mi kha ka hrawh cikcek hna.
21 Asinain hrawh dingmi hranchaw lakin a ṭha bikmi tuu le caw hna kha Gilgal i na Pathian Jehovah sin raithawinak pek awkah ralkap pawl nih an lak” tiah a leh.
22 Samuel nih hitin a ti: “Jehovah nih a bia ngaih nakin khangh thawinak le raithawinak kha a duh deuh lai maw? Jehovah nawlngaih cu raithawinak nakin a ṭha deuh. Lungthin pek in a bia ngaih cu tuukawng thau nakin a ṭha deuh;
23 ralchanh cu khuachia thiamnak he aa khatmi sualnak a si. Ruamkai cu camhthiam le siasal* biak bantuk a si. Jehovah bia kha na hlawt caah Pathian nih siangpahrang sinak in aan hlawt cang.”
24 Saul nih “Ka sual cang, Jehovah nawl peknak le nangmah bia kha ka buar cang. Mi kha ka ṭih hna caah an bia ka rak ngaih.
25 Atu zaangfahnak in ka sualnak hi ka ngaithiam law rak ka zul ṭhan ko. Jehovah mithmai ṭha hmuh awkah a hmaiah kun ka duh” tiah a ti.
26 Samuel nih “Kaan zul lai lo. Jehovah bia kha na hlawt caah Jehovah zong nih Israel siangpahrang sinak in aan hlawt cang” tiah a ti.
27 Samuel cu kal ding in aa mer tikah a liangbah angki par in Saul nih a hei tlaih i angki cu a tlek.
28 Cu tikah Samuel nih “Hi angki a tleh bantuk in nihin ah Jehovah nih Israel ram i siangpahrang nawlngeihnak kha na sinin a lak cang. Nangmah nakin a ṭha deuhmi pa kha a pek lai.
29 Israel mi hna i a Liannganmi Pathian nih lih a chim lai lo i a lung zong aa thleng lai lo,* a lung i thlen ding in anih cu minung a si ṭung lo” tiah a ti.
30 Saul nih “Ka sual cang. Asinain Israel upa hna le Israel mi hna hmaiah ka mual cu rak ka phoh sawh hlah. Ka sinah kir ṭhan ko, na Pathian Jehovah hmaiah ka kun lai” tiah a nawl.
31 Cucaah Samuel nih a zulh i Saul cu Jehovah hmaiah a kun.
32 Samuel nih “Amalek siangpahrang Agag cu ka sinah ratpi u” tiah a ti. Cu tikah Agag cu ngamh lo nawn in a ra,* zeicahtiah ‘Thihnak in ka luat cang’ tiin a rak ruah caah a si.
33 Samuel nih “Na vainam ruang ah nule cu an fale nih an thihtak hna bantuk in na nu zong a fa nih a thihtak ve lai” tiah a ti i Gilgal i Jehovah hmaiah Agag cu a sam cikcek.
34 Cu hnuah Samuel cu Ramah ah a tlung. Saul zong Gibeah khua i a inn ah a tlung ve.
35 Samuel cu Saul kong ah ngaihchia in a um caah a nun chung Saul kha a tong ti lo. Jehovah zong Saul kha Israel siangpahrang ah a rak ser caah aa ngaichih.
Footnotes
^ A hrampi, “terafim milem.” Biafang Fianternak ah zoh.
^ Asiloah “aa ngaichih lai lo.”
^ Asiloah “mahle mah i zumh ngai in a ra” ti zong a si kho.
