Samuel Pakhatnak 8:1-22
8 Samuel cu a tar tikah a fapale kha Israel ram ah biaceihtu in rian a pek hna.
2 A fater cu Joel a si i a pahnihnak a fapa cu Abijah a si. Annih cu Beersheba ah biaceihtu an ṭuan.
3 Asinain an pa lam kha an zul lo; a ding loin a miak an kawl, ziknawh an ei i dinnak kha an merh.
4 Cucaah Israel upa hna cu hmunkhat ah an i pum i Ramah ah a ummi Samuel sinah an ra.
5 Annih nih “Zoh hmanh! Nang cu na tar cang. Na fapale zong nih nangmah lam kha an zul lo. Cucaah miphun dang hna bantuk in a kan uktu* ding ah siangpahrang pakhat rak kan thimpiak” tiah an ti.
6 “A kan uktu ding ah siangpahrang pakhat kan pe” tiah an halmi kha Samuel nih a duh lo caah Jehovah sinah thla a cam.
7 Jehovah nih Samuel cu hitin a ti: “An chimmi ning in tuahpiak ko hna. Zeicahtiah nangmah an in hlawtmi a si lo, an siangpahrang in keimah an ka hlawtmi a si.
8 Izipt ram in ka rak chuahpi hna lioin nihin ni tiang atu bantuk in an tuah; keimah kha an ka hlawt i pathian dang hna kha an biak lengmang. Nangmah zong cutin an in tuah ve.
9 Atu an chimmi ning in tuahpiak ko hna. Asinain ṭha tein ralrin pe hna; anmah a uktu ding siangpahrang nih zeidah halnak nawl a ngeih ti kha chim hna.”
10 Cucaah Samuel nih siangpahrang a haltu hna sinah Jehovah chimmi bia vialte kha a chim.
11 Hitin a ti: “Nanmah aan uktu siangpahrang nih halnak nawl a ngeihmi cu hihi a si: Nan fapale kha a rangleng a mawnghter hna lai, rang cung ralkap a ṭuanter hna lai i a cheu cu a rangleng hmaiah a tlikter hna lai.
12 Cheukhat cu ralkap thong khat haotu, sawm nga haotu in rian a pek hna lai, a cheu nih lei an thuanpiak lai i rawl an ṭuanpiak lai. Raltuknak hriamnam le rangleng thilri hna kha an serpiak lai.
13 Nan fanule kha zihmui a serter hna lai, rawl a chuanter hna lai i changreu a rawhter hna lai.
14 Nan lo, nan mitsur dum le nan oliv dum a ṭha bik kha a lak lai i a salle a pek hna lai.
15 Nan lo le nan mitsur dum in a chuakmi cheu hra cheu khat kha a lak lai i a bawi pawl le a salle kha a pek hna lai.
16 Nan salnu le nan salpa, a ṭha bikmi nan caw le nan laa hna kha aa lak lai i a rian a ṭuanter hna lai.
17 Nan tuurun chung in cheu hra cheu khat kha aa lak lai i nanmah theng zong a sal nan hung si lai.
18 Nan i thimmi siangpahrang ruang ah bawmh hal in nan au caan a phan te lai. Asinain mah caan ah Jehovah nih aan let hna lai lo.”
19 Asinain mi nih Samuel chimmi kha an ngai duh lo i “Zeiti a si zong ah kanmah a kan uktu siangpahrang ngeih kan duh ve ko.
20 Cuticun a dang miphun vialte he kan i lo lai. Kan siangpahrang nih a kan uk lai, a kan hruai lai i ral a kan dohpiak lai” tiah an ti.
21 Mi nih an chimmi vialte kha Samuel nih a ngaih dih hnuah Jehovah sinah a chim ṭhan.
22 Jehovah nih Samuel kha “An chimmi ning in tuah law anmah a uktu ding siangpahrang pakhat in thim” tiah a ti. Cun Samuel nih Israel mi cu “Nan khua cio ah va kir u” tiah a ti hna.
Footnotes
^ Asiloah “bia a kan ceihtu.”
