Samuel Pakhatnak 11:1-15
11 Ammon siangpahrang Nahash cu Gilead ram Jabesh khua doh awkah aa thawh i riahhmun a khuar. Jabesh khuami hna nih “Kanmah he biakamnak ser law na rian kan ṭuan lai” tiah an ti.
2 Nahash nih “Nan orhlei mit kaan khoih hna lawng ah nanmah he biakamnak ka ser lai, cuticun Israel mi vialte cung ah ningzahnak ka tlunter lai” tiah a ti hna.
3 Jabesh khua upa hna nih “A caan ni sarih in rak kan pe. Israel ram pumpi ah lamkal kan thlah hna lai. A kan khamhtu an um lo ahcun na kut ah kan i pe ko lai” tiah an ti.
4 Lamkal hna cu Saul a umnak Gibeah khua ah an kal i mah kong kha an chimh hna tikah mi cu aw thangpi in an ṭap.
5 Cu lioah Saul cu saṭil run he lo in a rak tlung. “Zeidah a cang? Zeicah mi cu an ṭah?” tiah a hal hna tikah Jabesh khuami hna bia kha an chimh.
6 Cu bia a theih tikah Pathian thlarau cu a cung ah a tlung i Saul cu a thin a linh in a lin.
7 Cawtum pahnih kha a lak, a can a can i lamkal hna sinin Israel ram pumpi ah a kuat hna. “Saul le Samuel hnu a zul lomi paoh i an caw cu hitin tuah a si lai!” tiah bia a cah hna. Jehovah nih mi kha ṭihnak a ngeihter hna caah lungthin khat tein an rak chuak.
8 Bezek ah mi a rel hna tikah Israel mi cu 300,000 an si i Judah mi cu 30,000 an si.
9 Saul le a mi pawl nih lamkal hna kha “‘Thaizing chun ah kan in khamh hna lai’ tiah Gilead ram Jabesh khuami kha nan va chimh hna lai” tiin bia an cah hna. Lamkal hna nih mah bia kha an chimh hna tikah Jabesh khuami cu an i lawm tuk.
10 Cucaah “Thaizing ah na kut ah kan i pe lai. Na duh ning paoh in tuah ko” tiah siangpahrang Nahash cu bia an cah.
11 A thaizing ah Saul nih mi kha phu thum ah a ṭhen hna. Khua a dei hlanah* riahhmun ah an va lut i chun tiang Ammon mi cu an thah hna. A luatmi cu an i ṭhenṭhek dih i a dangdang in an zam dih.
12 Cu tikah mi nih “‘Saul nih cun maw a kan uk lai’ tiah a titu cu ahote dah an si? Rak chuahpi hna, kan thah hna lai” tiah Samuel cu an ti.
13 Asinain Saul nih “Nihin cu Jehovah nih Israel mi a khamh hna ni a si caah ahohmanh thah an si lai lo” tiah a ti.
14 Cu hnuah Samuel nih “Gilgal ah kal hna u sih law Saul cu siangpahrang a si cang ti kha cuka ah thanh ṭhan u sih” tiah mi kha a ti hna.
15 Cucaah mi vialte cu Gilgal ah an kal i Saul cu Jehovah hmaiah siangpahrang ah an ser. Jehovah sinah hawikomhnak thawinak an pek i Saul le Israel mi vialte cu lunglawm tein puai an tuah.
Footnotes
^ Mah cu zinglei suimilam 2 in 6 kar a si.
