Samuel Pakhatnak 27:1-12
-
Filistin mi nih Ziklag kha David an pek (1-12)
27 David nih a lung chung in “Ni khatkhat cu Saul kut in ka thi te ko lai. Ka caah a ṭha bikmi cu Filistin ram ah zam hi a si. Cutin ka zam ahcun Saul cu a lung a dong lai i Israel ram ah a ka kawl ti lai lo. A kut chung in ka luat lai” tiah a ti.
2 Cucaah David cu a sinah a ummi pa 600 he aa thawh i Maok fapa, Gath siangpahrang Akhish sinah a zam.
3 David le a mi pawl cu Gath khua, siangpahrang Akhish sinah an chungkhar ning cio in khua an sa. David cu nupi pahnih a ngei; Jezreel khuami Ahinoam le a thi cangmi Nabal nupi, Karmel khuami Abigail an si.
4 David cu Gath khua ah a zam cang timi thawng kha Saul nih a theih tikah a kawl ti lo.
5 David nih Akhish cu “Na mithmai ṭha ka hmuh ahcun na ram chung i khuate pakhat ah ka umter ko. Na salpa cu siangpahrang umnak khua i nangmah he um awkah kaa tlak lo” tiah a ti.
6 Mah ni ah Akhish nih Ziklag khua kha David cu a pek. Cucaah Ziklag cu nihin ni tiang Judah siangpahrang hna ta a si.
7 David cu Filistin ram, khuate ah kum khat le thla li chung a um.
8 David le a mi pawl cu Geshur mi, Girzi mi le Amalek mi hna sinah an kal i an va doh hna. Mah mi hna cu Telam in Shur tiang, Izipt ram lei tiang khua a sami an si.
9 David nih a doh hna tikah nu siseh, pa siseh pakhat hmanh a ngaan hna lo. Asinain tuu, caw, laa, kalauk le thilpuan hna kha cu a lak. Cun siangpahrang Akhish sinah a rak kir ṭhan.
10 Akhish nih “Nihin khoika ah dah ral na doh?” tiah a hal tikah “Judah ram thlanglei* ah” asiloah “Jerahmeel mi hna ram thlanglei ah” asiloah “Ken mi hna ram thlanglei ah” tiin a leh tawn.
11 “‘David nih a tuahmi a si’ tiin kan kong a kan phuangtu ahohmanh um hna hlah seh” tiah a ti i Gath khua ah nu siseh, pa siseh ahohmanh a ratpi hna lo, a thah dih hna. (Cuticun Filistin ram, khuate i a um chung vialte a tuah.)
12 Cucaah Akhish nih David cu a zumh tuk i ‘A miphun Israel mi nih an huat tuk cang lai i ka sal a si zungzal cang ko lai’ tiah a ruah.
Footnotes
^ Asiloah “Negeb ram.”
