Samuel Pakhatnak 1:1-28
1 Efraim tlangram i Ramathaim-zophim khua ah Elkanah timi pa pakhat a um. Anih cu Jeroham fapa a si, Jeroham cu Elihu fapa a si, Elihu cu Tohu fapa a si, Tohu cu Efraim mi Zuph fapa a si.
2 Elkanah cu nupi pahnih a ngei. Pakhat cu Hannah a si i a dang pakhat cu Peninnah a si. Peninnah cu fa a ngei nain Hannah cu fa a ngei lo.
3 Elkanah cu kum fatin ralkapbu Bawipa Jehovah biak awk le raithawinak pek awkah an khua in Shiloh khua ah a kal tawn. Cuka ah Eli fapa pahnih Hofni le Finehas cu Jehovah caah tlangbawi rian an ṭuan.
4 Elkanah nih raithawinak a pekchanh ni ah a nupi Peninnah le a fale vialte kha covo a phawt hna.
5 Hannah tu cu a dawt tuk caah a hleikhunmi covo a pek, asinain Jehovah nih fa ngeihnak nawl a pe lo.
6 Jehovah nih fa ngeihnak nawl a pek lo caah a va nupi dang a simi Peninnah nih a ngaihchiatter awkah fakpi in a serhsat i a ti hram lengmang.
7 Cutin kum fatin a tuah. Hannah cu Jehovah inn ah a kal fatin fakpi in a serhsat caah a ṭap i rawl hmanh a ei kho lo.
8 Asinain a vapa Elkanah nih “Hannah, zeicah na ṭah? Zeicah na ei lo? Zeicah na ngaih a chiat? Na caah keimah hi fapa pahra nakin ka ṭha deuh, a si ko lo maw?” tiah a ti.
9 Shiloh khua i an ei, an din hnuah Hannah cu a tho. Mah lioah tlangbawi Eli cu Jehovah biakinn* innka tung hram i ṭhutdan cung ah a ṭhu.
10 Hannah cu a ngaih a chiat tuk caah Jehovah sinah thla a cam i lunghno ngai in a ṭap.
11 Cun “Maw ralkapbu Bawipa Jehovah, na salnu intuarnak hi na hmuh, na ka cinken, na ka philh lo i fapate na ka pek ahcun a nun chung vialte nangmah Jehovah kha kaan pek lai. Zeitik hmanh ah a sam meh a si lai lo” tiah bia aa kam.
12 Hannah nih Jehovah hmaiah cutin saupi thla a cam lioah Eli nih a zoh.
13 Hannah cu a aw chuah loin a lung chung in thla a cam i a hmur lawng a cawl. Cucaah Eli nih zu a ri tiah a ruah i,
14 “Zei can tiang dah na rit lai? Mitsur zu ding ti hlah!” tiah a ti.
15 Hannah nih cun “A si lo, ka bawipa! A lungre a thei tukmi nu ka si. Mitsur zu siseh, a dang zu siseh ka ding lo. Jehovah sinah ka intuarnak vialte ka phuanmi a si.
16 Na salnu hi santlai lomi nu ah rak ka ruat hlah! Ka lungsi a vangh tuk caah le ka lungre a theih tuk caah atu tiang thla ka cammi a si” tiah a ti.
17 Mah tikah Eli nih “Lungdai tein va kal ko. Israel Pathian nih na halmi cu in pe ko seh” tiah a ti.
18 Hannah nih “Na salnu hi na mithmai ṭha hmu ko ning” tiah a ti i a kal. Cun rawl a ei i ngaihchia mithmai a pu ti lo.
19 Annih cu zingka tein an tho i Jehovah an biak hnuah Ramah khua i an inn ah an tlung. Elkanah nih a nupi Hannah kha a ihpi i Jehovah nih Hannah thlacamnak kha a leh.
20 Kum khat chung ah Hannah cu nau a pawi i fapate a hrin. “Jehovah sinah ka hal i a ka pekmi a si” a ti i Samuel* tiah min a sak.
21 Elkanah le a chungkhar dihlak cu Jehovah sinah kum fatin pekmi raithawinak le biakam thawinak pek awkah an kal ṭhan.
22 Asinain Hannah cu a kal lo. A vapa kha “Ngakchia hi hnuk ka thleile cangka Jehovah hmaiah ka ratpi lai i cuka ah a um zungzal lai” tiah a ti.
23 Elkanah nih “A ṭha na ti ning paoh in tuah ko. Hnuk na thlei hlan tiang inn ah rak um ko. Na chim ning in Jehovah nih in tuahpiak ko seh” tiah a ti. Cucaah Hannah cu inn ah a taangta i hnuk a thlei hlan tiang a fapate cu a zohkhenh.
24 Hnuk a thleile cangka ngakchia cu Shiloh khua ah a kalpi. Kum thum a simi cawtum, changvut ephah pakhat* le mitsur zu ralca ngan pakhat zong aa put i Shiloh khua i Jehovah inn ah cun an kal.
25 Cawtum cu an thah i ngakchiapa cu Eli sinah an ratpi.
26 Hannah nih “Ka bawipa! Na nunnak chalh in ka chim lai. Kei cu hika hmun ah na pawng ah dir in Jehovah sinah thla a rak cammi nu kha ka si.
27 Hi ngakchiapa hi ngeih awkah thla ka rak cammi a si. Ka halmi ning in Jehovah nih a ka pek.
28 Cucaah atu Jehovah sinah ka pekchanh* lai. A nun chung vialte Jehovah ta a si lai” tiah a ti.
Cuka ah Elkanah nih Jehovah kha a biak.
Footnotes
^ Mah cu puan biakinn a si.
^ A sullam “Pathian Min.”
^ 22 L hrawng. Thlaihhlei B14 ah zoh.
^ A hrampi, “ka hlanh lai.”
