Samuel Pakhatnak 4:1-22
4 Samuel bia cu Israel mi vialte sinah a phan.
Israel mi cu Filistin mi doh awkah an i thawh i Ebenezer pawng ah riahhmun an khuar. Filistin mi tu cu Aphek khua ah riahhmun an khuar.
2 Filistin mi cu Israel mi doh awkah timhcia tein hmun an la. Asinain Israel mi cu an sung i Filistin mi nih an tei hna. Raltuknak hmun ah Israel mi 4,000 hrawng an thah hna.
3 Ralkap pawl cu riahhmun ah an kir ṭhan tikah Israel upa hna nih “Nihin ah Filistin mi hna hmaiah Jehovah nih zeicah a kan sunghter hnga? Jehovah biakamnak kuang kha Shiloh in hika ah ratpi u sih. Biakamnak kuang kan sinah a um ahcun kan ral pawl kut in Pathian nih a kan khamh ko lai” tiah an ti.
4 Cucaah Shiloh khua ah mi an thlah hna i cherubim hna cung* ah a ṭhumi ralkapbu Bawipa Jehovah biakamnak kuang cu an va lak. A hmaanmi Pathian biakamnak kuang kha Eli fapa pahnih Hofni le Finehas zong nih an rak zulh ve.
5 Jehovah biakamnak kuang cu riahhmun a phanhle cangka Israel mi vialte cu aw thangpi in an au i vawlei zong a tlerh dih.
6 An au thawng kha Filistin mi nih an theih tikah “Hebru mi hna riahhmun ah zeicah cu tluk cun an au hnga?” tiah an ti. A hnuah Jehovah biakamnak kuang cu riahhmun ah a phan ti kha an hun hngalh.
7 Filistin mi nih an ṭih tuk i “Pathian cu riahhmun ah a phan cang! Kan lo ko, hi bantuk thil hi hlanah a um bal lo!
8 Kan lo cang! A liannganmi Pathian kut in aho nih dah a kan khamh lai? Anih cu ramcar ah rai a phunphun in Izipt mi a thattu Pathian a si.
9 Filistin mi hna, pasal bantuk in nan ralṭha u. Hebru mi nih nan rian an rak ṭuan bantuk in an rian nan ṭuan ve nakhnga lo pasal bantuk in do hna u!” tiah an ti.
10 Cucaah Filistin mi nih an doh hna tikah Israel mi cu an sung i an thlam cio ah an zam. Israel mi tampi an thah hna i ke ralkap 30,000 an thi.
11 Pathian biakamnak kuang kha an lak. Eli fapa pahnih Hofni le Finehas zong an thi.
12 Raldohnak hmun in Benjamin mipa pakhat cu a zam i mah ni ah Shiloh ah a rak phan. A angki kha a thleh i a lu ah leidip aa phulh.
13 Mah lioah Eli cu a hmaanmi Pathian biakamnak kuang kong ah a lungre a theih caah lam pawng i ṭhutdan cung ah a ṭhu i zeidah a cang lai ti kha a hngak ko. Benjamin mipa cu khua chung ah a lut i thawngpang kha a chimh hna tikah an khuapi ning in an ngaih a chia dih.
14 Eli nih an ai thawng kha a theih tikah “Mah ai thawng cu zeidah a si?” tiah a ti. Benjamin mipa cu Eli sinah a rak tli i thawngpang cu a chimh.
15 (Eli cu kum 98 a si cang i a mit khua a hmu ti lo.)
16 Mipa nih “Kei cu raltuknak hmun in a zammi ka si! Nihin bak ah ka rak zam” tiah a ti tikah Eli nih “Ka fapa, zeidah a cang?” tiah a hal.
17 Thawngpang phortu nih cun “Filistin mi hna hmaiah Israel mi cu an sung cikcek i an zam dih cang; na fapa pahnih Hofni le Finehas zong an thi. A hmaanmi Pathian biakamnak kuang zong an kalpi cang” tiah a ti.
18 Mipa nih a hmaanmi Pathian biakamnak kuang kong a chimle cangka Eli cu kutka pawng i a ṭhutnak in hnulei ah a ngal, a hngawng a kiak i a thi. Zeicahtiah a tar tuk cang i a khing zong a rit fawn. Eli nih Israel mi kha kum 40 chung bia a ceih hna.
19 A monu, Finehas nupi cu fa a pawi i aa ṭhen deng cang. A hmaanmi Pathian biakamnak kuang an kalpinak kong le a va i a pa he, a va he an thihnak kong kha a theih tikah ruahlopi in a nau ngan a fak i fa a hring.
20 A thih dengmang tikah a pawng i a dirmi nu nih “Na thinphang hlah, fapate na hrin cang” tiah a ti. Asinain a bia kha a ngaihpiak lo i zeihmanh a let lo.
21 “Sunparnak nih Israel mi cu a kaltak cang hna” tiah a ti i a fapate cu Ikabod* tiah min a sak. Zeicahtiah a hmaanmi Pathian biakamnak kuang kalpi a si ca le a va i a pa he, a va he an thih caah a si.
22 “A hmaanmi Pathian biakamnak kuang cu kalpi a si cang caah sunparnak nih Israel mi cu a kaltak cang hna” tiah a ti.
