Samuel Pakhatnak 19:1-24
19 Saul nih a fapa Jonathan le a salle vialte kha David thah a duhnak kong a chimh hna.
2 Saul fapa Jonathan nih David cu a dawt tuk. Cucaah “Ka pa Saul nih thah aan duh. Thaizing zinglei in cun ralring tein um. A himnak hmun ah va kal law va i thup.
3 Naa thuhnak ramlak ah ka rak chuak ve lai i ka pa pawng ah ka dir lai. Ka pa kha nangmah kong cu ka ruah lai i ka hngalhmi pakhatkhat a um ahcun kaan chimh hrimhrim lai” tiah a ti.
4 Jonathan nih a pa Saul sinah David ṭhatnak kong kha a chim. Hitin a ti: “Siangpahrang, na sal David cung ah sualnak na tuah awk a si lo. Na cung ah zei sualnak hmanh a tuah lo i a tuahmi cu nangmah ṭhatnak caah a si.
5 A nunnak thap in Filistin mipa kha a thah. Cuticun Jehovah nih Israel mi cu teinak nganpi a hmuhter hna. Mah kha na hmuh i na rak i lawm tuk. Cu a si ah zeicah a ruang um loin David cu thah na timh i sualnak a ngei lomi thisen cu chuah na duh?”
6 Saul nih Jonathan bia kha a ngaih i “Jehovah a nun bang in David cu ka that hrimhrim lai lo” tiah chiat a ser.
7 Cucaah Jonathan nih David cu a auh. Mah kong vialte kha a chimh i Saul sinah a ratpi. David cu a hlan bantuk in Saul rian kha a ṭuan ṭhan.
8 A hnuah ral a tho ṭhan. David nih Filistin mi cu a va doh hna i mi tampi a thah hna caah a hmai in an zam dih.
9 Saul cu a fei i put buin a inn i a ṭhut lioah a lungput ṭhalo nih hnahnawhnak a pekmi kha Jehovah nih a awnh. Mah lioah David cu tingtang a tum.
10 Saul nih a fei in David kha vanpang ah bet lak in khawh a timh. Asinain aa phet i fei cu vanpang ah aa bunh. Cu zan ah David cu a zam i a luat.
11 Saul nih David inn va ngiat awkah mi a thlah hna i zinglei ah David kha thah ding in nawl a pek hna. Asinain a nupi Mikhal nih David cu “Tuzan ah na zam lo ahcun thaizing ah thah na si lai” tiah a ti.
12 Mikhal nih David cu thlalang awng in a ṭumter colh caah a zam i a luat.
13 Mikhal nih terafim milem* kha a lak i ihkhun cung ah a chiah, a lu zawn ah meheh hmul puan a chiah i angki fual in a khuh.
14 David tlaih awkah Saul nih a thlahmi hna kha Mikhal nih “A zaw” tiah a ti hna.
15 Saul nih mi a thlah ṭhan hna i “A ihkhun he rak ratpi u, ka thah lai” tiah a ti hna.
16 Saul nih a thlahmi hna cu innchung an luh tikah ihkhun cung ah terafim milem le a lu zawn ah meheh hmul puan kha an hmuh.
17 Saul nih Mikhal cu “Zeicah na ka hlen? Nangmah nih na thlah caah ka ral cu a luat cang” tiah a ti tikah Mikhal nih “‘Rak ka thlah, cu lo ahcun kaan thah lai’ a ka ti” tiin a leh.
18 David cu a zam i a luat. Ramah khua ah a ummi Samuel sinah a kal i Saul nih a cung ah a tuahmi vialte kha a chimh dih. Cun Samuel he an kal i Naioth ah an um.
19 A hnuah Saul kha “David cu Ramah khua i Naioth ah a um” tiah an chimh.
20 Cu tikah Saul nih David tlaih awkah mi a thlah colh hna. Annih nih profet a simi kum upa pawl profet bia an chim lioah Samuel nih dir buin a hruaimi hna kha an va hmuh. Cu lioah Pathian thlarau cu Saul thlahmi hna cung ah a tlung i profet bantuk in bia an chim ve.
21 Mah kong cu Saul an chimh tikah midang a thlah ṭhan colh hna i annih zong profet bantuk in bia an chim ve. Cucaah Saul nih a phu thumnak kha a thlah ṭhan hna. Asinain annih zong profet bantuk in bia an chim ve.
22 A donghnak ah Saul cu Ramah khua ah a kal ve i Seku ah a ummi tikhor nganpi pawng a phan. “Samuel le David cu khoika ah dah an um?” tiah a hal hna tikah “Ramah khua, Naioth ah an um” tiah an leh.
23 Cuka in Ramah khua, Naioth lei a kal lioah Pathian thlarau cu a cung ah a tlung i Naioth tiang lam thluangthluan profet bantuk in bia a chim ve.
24 A thilpuan kha aa phoih i Samuel hmaiah profet bantuk in a um. Chun nitlak, zan khuadei a angki chung he lawng* a it. Cucaah “Saul cu profet maw a si ve?” timi bia a hung um.
