Samuel Pakhatnak 22:1-23
22 David cu cuka in aa thawh i Adullam lungkua ah aa thup. Mah kha a ule le a pa chungkhar nih an theih tikah a sinah an ra.
2 Harnak a tongmi, leiba a ngeimi le an nunnak cung ah a lung a fakmi hna cu a sinah an ra. David cu an haotu a hung si. A sinah mi 400 hrawng an um.
3 A hnuah David cu Moab ram Mizpah khua ah a kal i Moab siangpahrang cu “Pathian nih ka caah zeidah a tuah lai timi ka hngalh hlan tiang ka nu le ka pa hi na sinah umter ko hna” tiah a nawl.
4 Cuticun Moab siangpahrang sinah a chiahta hna. David ralhruang chung i a um chung vialte a nu le a pa cu Moab siangpahrang sinah an um.
5 Caan tlawmpal hnuah profet Gad nih David cu “Ralhruang ah um ti hlah. Judah ram ah va kal” tiah a ti. Cucaah David cu Hereth ramlak ah a kal.
6 David le a mi pawl cu an hmuh cang hna timi thawng kha Saul nih a theih. Mah lioah Saul cu Gibeah khua hmunsang i tamarisk thingkung* tang ah a fei i put in a ṭhu. A salle zong a velchum ah an um.
7 Saul nih a velchum ah a ummi a salle cu hitin a ti hna: “Benjamin mi hna, ngai tuah u! Jesse fapa nih cun keimah bantuk in lo le mitsur dum aan pe hna lai maw? Mi thong khat haotu le za khat haotu ah aan ser hna lai maw?
8 Nan dihlak in nan ka rawi cang. Ka fapa lila nih Jesse fapa he biakamnak a sermi kha ahohmanh nih nan ka chim lo. Atu bantuk in keimah ralchanh awkah a thli tein khuakhan ding in ka fapa lila nih ka salpa a forhmi kha nan ka chim lo i ka cung ah zaangfahnak nan ngei lo.”
9 Cu tikah Saul a salle haotu, Edom mipa Doeg nih “Jesse fapa cu Nob khua i Ahitub fapa Ahimelek sin a rat kha ka hmuh.
10 Ahimelek nih Jehovah sinah bia a halpiak i ei awk zong a pek. Filistin mipa Goliath vainam hmanh kha a pek” tiah a ti.
11 Siangpahrang nih Nob khua ah a ummi tlangbawi Ahitub fapa Ahimelek le a pa chungkhar tlangbawi vialte kha a auhter hna caah an dihlak in an ra.
12 Saul nih “Ahitub fapa, ka chimmi hi ngai tuah!” tiah a ti tikah “Ka ngaih ko, ka bawipa” tiah a leh.
13 Saul nih “Nangmah he, Jesse fapa he zeicah nan ka rawi i amah cu changreu le vainam na hei pek? Cun Pathian sinah bia na halpiak rih. Atu keimah ralchanh awkah a thli tein khua a khaan cang hih!” tiah a ti.
14 Cu tikah Ahimelek nih hitin a ti: “Na salle lakah David tluk in zumhawk a tlakmi ahodah a um? Anih cu na tupa, na pum runvengtu bawi le na inn ah upat ngaimi a si.
15 Atu hi a voikhatnak Pathian sinah bia ka halpiakmi a si lo. Nangmah rawi ding cu a ruah hmanh ka ruat kho lo. Na salpa le ka pa chungkhar nih na cung ah thil ṭhalo an tuah lai tiah ruat hlah. Mah kong hi na salpa nih zeihmanh ka hngal lo.”
16 Asinain siangpahrang nih “Ahimelek, nangmah le na pa chungkhar dihlak cu nan thi hrimhrim lai” tiah a ti.
17 Cun a pawng ah a ummi runvengtu ralkap hna kha “Jehovah tlangbawi kha that hna u! David lei ah an ṭang i ka sinin a zammi a si kha an hngalh ko nain thawng an ka thanh lo” tiah a ti. Asinain siangpahrang salle nih Jehovah tlangbawi cu an that duh hna lo.
18 Cu tikah siangpahrang nih Doeg cu “Nangmah nih tlangbawi pawl kha that hna!” tiah a ti. Edom mipa Doeg cu a tho i tlangbawi pawl kha a thah colh hna. Cu ni ah khiangraang tlangbawi angki aa hrukmi 85 a thah hna.
19 Tlangbawi hna an khua Nob zong kha a doh i pa, nu, ngakchia, bawhte, caw, laa le tuu kha vainam in a thah hna.
20 Asinain Ahitub fapa, Ahimelek fapa hna lakah pakhat Abiathar cu a luat i David sinah a va zam.
21 “Saul nih Jehovah tlangbawi kha a thah hna” tiah Abiathar nih David cu a chimh.
22 Cu tikah David nih hitin a ti: “Edom mipa Doeg zong Nob khua ah a rak um ve caah Saul a chimh hrimhrim te lai ti kha mah ni tein ka rak ruahcia cang. Na pa chungkhar an thihnak kong ah keimah hi rian ka ngei.
23 Ka sinah hin um ko, ṭih hlah. Nangmah thah aan timmi cu keimah thah a ka timmi an si. Kaan huhphenh ko lai.”
Footnotes
^ Mah kung cu a hnah a dip i a par cu sendaang asiloah a raangmi rong a si.
