Samuel Pakhatnak 28:1-25
-
Saul cu Endor i khuavang ngeimi sinah a kal (1-25)
28 Cu lio caan ah Filistin mi nih Israel mi doh awkah an ralkap kha an pumh hna. Akhish nih David cu “Nangmah le na ralkap pawl cu raltuknak ah keimah he nan kal ve lai” tiah a ti.
2 David nih “Zeidah ka tuah lai ti kha na hngalh ko cu ta” tiah a leh. Cu tikah Akhish nih “A ṭha, ka pum runvengtu si zungzal awkah rian kaan pek lai” tiah a ti.
3 Mah lioah Samuel cu a thi cang. Israel mi nih an ṭah i a khua Ramah ah an vui cang. Cun Saul nih khuavang ngei le hmailei kong chimthiammi hna kha Israel ram in a hloh cang hna.
4 Filistin mi cu an i thawh i Shunem ah riahhmun an khuar. Saul nih Israel mi cu a pumh hna i Gilboa ah riahhmun an khuar.
5 Saul nih Filistin ralkapbu kha a hmuh hna tikah a ṭih tuk i a therh dih.
6 Jehovah sinah bia a hal lengmang nain Jehovah nih mang in siseh, Urim in siseh, profet hna hmang in siseh a let ti lo.
7 A donghnak ah Saul nih a salle cu “Khuavang ngeimi nu pakhat in ka kawlpiak u. A sinah ka kal lai i ruahnak ka va hal lai” tiah a ti hna. Cu tikah a salle nih “Endor khua ah khuavang a ngeimi nu pakhat a um” tiah an leh.
8 Saul cu mi nih rak ka hngal hna hlah seh tiin a thil aa thleng i a salle pahnih he zan ah minu sinah cun an kal. Cun “Nang cu khuavang ngeimi na si caah na khuachia thiamnak kha hmang in ka chim laimi pa hi rak ka auhpiak” tiah a ti.
9 Minu nih “Khuavang a ngeimi le hmailei kong a chimthiammi vialte Saul nih ram chung in a hloh hna ti kha na hngalh ko ṭung, zeicah kei zong thah ka si nakhnga foih na ka timh?” tiah a ti.
10 Saul nih Jehovah min chalh in chiat a ser i “Jehovah a nun bang in hi kong ah zeihmanh sualphawt na si lai lo!” tiah a ti.
11 Minu nih “Ahodah kaan auhpiak lai?” tiah a hal tikah “Samuel rak ka auhpiak” tiah a leh.
12 Minu nih “Samuel”* kha a hmuh tikah thangpi in a ai i Saul cu “Zeicah na ka hlen? Saul pei na si ko hi!” tiah a ti.
13 Saul nih “Zeihmanh ṭih hlah, zeidah na hmuh?” tiah a hal tikah “Vawlei chung in pathian he aa lomi pa pakhat a rak chuahmi kha ka hmuh” tiah a ti.
14 “A muisam cu zeidah a lawh?” tiah a hal tikah “Liangbah angki fual aa hrukmi tarpa a si” tiah a leh. Cu tikah Saul nih “Samuel” a si tiah a ruah caah vawlei ah a kun i a bawk.
15 “Samuel” nih “Zeicah na ka auh, zeicah hnahnawhnak na ka pek?” tiah a hal tikah Saul nih “Fakpi in harnak ka tong cang. Filistin mi nih an rak ka doh. Pathian zong nih a ka kaltak cang i profet hna hmang in siseh, mang in siseh a ka let ti lo. Cucaah zeidah ka tuah awk a si ti a ka chimtu ding ah kaan auhmi a si” tiah a leh.
16 “Samuel” nih hitin a ti: “Jehovah nih aan kaltak i na ral a si cang ahcun keimah cu zeicah na ka hal?
17 Jehovah nih keimah hmang in a chimchungmi ning in a tuah lai. Jehovah nih pennak kha nangmah sinin a lak lai i na miphun hawi David cu a pek lai.
18 Jehovah bia na ngaih lo ca le a thin a linhtertu Amalek mi kha na hrawh dih cikcek hna lo caah Jehovah nih atu bantuk in aan tuahmi a si.
19 Jehovah nih Israel mi he, nangmah he Filistin mi kut ah aan chanh hna lai. Thaizing ah nangmah le na fapale cu ka umnak hmun ah nan rak phan ve lai. Jehovah nih Israel ralkap kha Filistin mi kut ah a pek hna lai.”
20 “Samuel” bia a theih tikah Saul cu a ṭih tuk i vawlei ah a tlu colh. Chun nitlak, zan khuadei zeihmanh a ei lo caah a tha a dih.
21 Khuavang a ngeimi nu nih Saul a lungre a theih tukmi kha a hmuh tikah “Na salnu nih hin na bia ka ngaih i ka nunnak thap in na chimmi ning in ka tuah cang.
22 Atu ka chimmi hi rak ka ngaihpiak ko. Ei awk tlawmpal kaan timhpiak lai i ei. Cu lawng ah na tha a um lai i na khuallam na peh khawh lai” tiah a ti.
23 Saul nih “Ka ei lai lo” tiah a ti i a al. Asinain a salle le minu nih an hnek chih caah a donghnak ah an bia cu a ngaih. Vawlei in a tho i ihkhun cung ah a ṭhu.
24 Minu nih a inn ah a thaumi cawfa pakhat a ngei. Khulrang in cawfa cu a thah,* changvut kha a nawn i thilnu phulh lo changreu a ser.
25 Cun Saul le a salle cu a hunh hna i an ei hnuah cu zan ah cun an kir.
