Samuel Pakhatnak 18:1-30
18 David le Saul bia an i ruah dih hnuah Jonathan le David cu hawikom ṭha an hung si i Jonathan nih David cu amah nunnak tluk in a dawt.
2 Cu ni thawk in Saul nih David cu a pa inn ah a kirter siang ti lo i a sinah a umter peng.
3 Jonathan nih David cu amah nunnak tluk in a dawt caah biakamnak an ser.
4 Jonathan nih a liangbah angki kha a phoih i David cu a pek. Cun a ralthuam, a vainam, a likuk le a taisawm zong a pek.
5 Cu caan thawk in David zong raltuknak ah a kal ve. Saul nih a thlahnak hmun paoh ah hlawhtlinnak a hmu.* Cucaah ralkap hna tlangtlatu in Saul nih rian a pek tikah mizapi le bawi pawl cu an i lawm tuk.
6 Filistin mi an doh hnanak in David le ralkap pawl an rak tlun tikah nu pawl cu siangpahrang Saul don awkah Israel khua kip in lunglawm thanuam in an rak chuak. Khuangte le hri thum sihmi ringawn tum pah in hla an sa i an laam.
7 Nu hna cu hitin hla an sa:
“Saul thahmi cu a thongthong,David thahmi cu a sangsang.”
8 Cutin hla an sakmi kha Saul nih a duh lo. A thin a hung tuk i “David cu a sangsang an hei ti, keimah tu cu a thongthong an hei ka ti. Hitihin cun siangpahrang sinak pek lawng pei a bau cang ko hi!” tiah a ti.
9 Cu ni thawk in Saul nih David cu lunghring ngai in a ngiat peng.
10 A thaizing ah Saul cu a lungput ṭhalo nih hnahnawhnak a pek tikah Pathian nih a awnh. Cucaah innchung ah mimolh bantuk in* thil a tuah. Mah tikah David nih a hlan bantuk in tingtang a tumpiak. Saul cu fei aa put,
11 ‘David cu vanpang ah bet lak in ka khawh chih lai!’ a ti i fei in a khawh. Asinain David nih voi hnih ning in aa phet manh.
12 Jehovah cu David sinah a um i Saul cu a kaltak cang. Cucaah Saul nih David cu a hun ṭih i,
13 a pawng ah a umter ti lo. Mi thong khat haotu ah a ser i David nih ralkap pawl kha raltuknak ah a hruai hna.
14 David cu Jehovah nih a umpi caah a tuahmi thil vialte ah hlawhtlinnak a hmu.
15 David a hlawh a tlinmi kha Saul nih a hmuh tikah a ṭih chinchin.
16 David nih raltuknak ah a hruai hna caah Israel mi le Judah mi vialte nih amah cu an dawt.
17 A hnuah Saul nih David cu “Ka fanu upa bik Merab hi nupi caah kaan pek lai. Ralṭha tein ka rian ṭuan peng law Jehovah caah ral do” tiah a ti. A tak ti ahcun Saul nih ‘Keimah kut in cun thi hlah seh, Filistin mi hna kut in thi seh’ tiah a lung chung in a ti.
18 David nih “Ka rualchan le ka pa chungkhar cu Israel mi lakah zeihmanh kan si ṭung lo. Kei cu siangpahrang tupa si awkah kaa tlak lo” tiah a leh.
19 Asinain Saul nih David kha a fanu Merab a pek caan a phanh tikah Meholath khuami Adriel kha nupi caah a rak pek diam cang.
20 Saul fanu Mikhal nih David cu a duh, mah kong kha Saul nih a theih tikah aa nuam ngai.
21 Saul nih “Mah hi David foih awkah caanṭha a si. Ka fanu hi ka pek ahcun Filistin mi kut in a thi ko lai” tiah a lung chung in a ti. Cucaah “Ka fanu hi ṭhi” tiah David cu a voihnihnak a ti.
22 Cun Saul nih a salle cu “David kha ‘Siangpahrang lung na ton ngai i a salle zong nih an in dawt. Cucaah a fanu kha na ṭhit ko lo’ tiah a thli tein nan va chimh lai” tiin nawl a pek hna.
23 Saul salle nih mah kong cu an chimh tikah David nih “Siangpahrang fanu ṭhit cu thil hmetuai ah maw nan ruah? Kei cu misifak le a biapi lomi pei ka si ko cu” tiah a leh hna.
24 David chimmi bia vialte kha Saul cu a salle nih an chimh.
25 Cu tikah “Siangpahrang nih ‘A ral Filistin mi phuhlamnak caah an cuarpar 100 dah ti lo cu a dang zei man hmanh a duh lo’ tiah David cu nan va chimh lai” tiin Saul nih a ti hna. Zeicahtiah Filistin mi hna kut in David a thih nakhnga Saul cu khua a khang.
26 Saul a salle nih mah bia kha an chimh tikah David nih siangpahrang fanu ṭhit kha a duh. Rikhiahmi caan a phanh hlanah,
27 David le a mi hna cu an kal i Filistin mi 200 kha an thah hna. Cun David nih siangpahrang fanu a ṭhit khawh nakhnga an cuarpar cu tling tein a rak put. Cucaah Saul nih a fanu Mikhal cu nupi caah a pek.
28 David cu Jehovah nih a umpi i a fanu Mikhal zong nih a dawt ti kha Saul nih a hun hngalh.
29 Cucaah David cu a ṭih chinchin i a nun chung vialte a ral in a hmuh.
30 Filistin bawi hna nih Israel mi cu an rak doh hna. Raltuknak kip ah David cu Saul salle nakin a hlawh a tlin deuh caah a min a thang chinchin.
