Samuel Pakhatnak 16:1-23
16 Jehovah nih Samuel cu “Saul caah zei can tiang dah ngaihchia in na um lai? Amah cu Israel siangpahrang in ka hlawt cang. Atu saki ah chiti rawng law Bethlehem khuami Jesse sinah va kal. A fapa hna lakah pakhat kha siangpahrang ah ka thim cang” tiah a ti.
2 Asinain Samuel nih “Zeitindah ka kal ngam lai? Saul nih a theih ahcun a ka thah lai si” tiah a ti tikah Jehovah nih “Cawla pakhat in i kalpi law ‘Jehovah sin raithawinak pek awkah ka ra’ tiah va ti.
3 Jesse zong kha raithawinak ah sawm. Cun zeidah na tuah awk a si ti kha kaan chimh lai. Kaan hmuhsak laimi pa kha keimah aiawh in chiti na thuh lai” tiah a ti.
4 Samuel nih Jehovah chimmi ning in a tuah i Bethlehem khua ah a kal. Khua upa pawl nih an hmuh tikah an lau tuk i “Na ratmi cu daihnak in a si maw?” tiah an ti.
5 Cu tikah “Daihnak in a si ko. Jehovah sin raithawinak pek awkah ka ra. Nanmahle nanmah i thianter u law raithawinak ah ra ve u” tiah a ti hna. Cun Jesse le a fapale kha a thianter hna i raithawinak ah a sawm hna.
6 An rat tikah Eliab kha a hmuh i “Amah hi Jehovah chiti thuhmi a si hrimhrim lai” tiah a ti.
7 Asinain Jehovah nih “A muisam le a pumrua kha zoh hlah, amah cu ka thim lo. Minung hmuh ning cu Pathian hmuh ning he aa lo lo. Minung nih cun lenglang lawng an zoh nain Jehovah nih cun lungthin kha a zoh” tiah a ti.
8 Cun Jesse nih Abinadab kha a auh i a ratpi tikah Samuel nih “Amah zong hi Jehovah nih a thim lo” tiah a ti.
9 Cu hnuah Shammah kha a ratpi, asinain Samuel nih “Amah zong hi Jehovah nih a thim lo” tiah a ti.
10 Jesse nih a fapa pasarih a ratpi hna nain Samuel nih “An lakah pakhat hmanh hi Jehovah nih a thim hna lo” tiah a ti.
11 A donghnak ah Samuel nih “Na fapale cu mah vial hi maw an si?” tiah Jesse cu a hal. Jesse nih “A hniang bik pa a um rih, atu hi tuu a khalh lio a si” tiah a leh. Cu tikah Samuel nih “Amah cu va auhter hna, a phanh hlan tiang rawl ei awkah kan ṭhu lai lo” tiah a ti.
12 Jesse nih mi a thlah hna i a fa hniang cu a va auhter hna. Anih cu misen tirter te a si. A mit au aa dawh i a muisam zong aa dawh. Jehovah nih “Amah hi a si, tho law chiti thuh!” tiah a ti.
13 Cu tikah Samuel nih chiti rawnmi saki cu a lak i David cu a ule hmaiah chiti a thuh. Cu ni thawk in Jehovah thlarau nih David cu ṭhawnnak a pek. Cun Samuel cu Ramah khua ah a tlung.
14 Jehovah thlarau nih Saul cu a chuahtak. Cucaah a lungput ṭhalo nih hnahnawhnak a pekmi kha Jehovah nih a awnh.
15 A salle nih Saul cu “Na lungput ṭhalo nih hnahnawhnak aan pekmi kha Pathian nih a awnh cang.
16 Cucaah bawipa, tingtang tum a thiammi pakhat kha na salle kawlter hna. Na lungput ṭhalo nih hnahnawhnak aan pek tik paoh ah tingtang aan tumpiak lai i na um a nuam lai” tiah an ti.
17 Cucaah Saul nih “Tingtang tum thiammi pakhat in va kawl u law ka sinah ratpi u” tiah a salle cu nawl a pek hna.
18 A bultawltu pakhat nih “Bethlehem khuami Jesse nih tingtang tum a thiam ngaimi fapa pakhat a ngei. Anih cu a ral a ṭha i a ṭhawngmi ralkap a si. Biachim holhrel a thiam i a mui zong aa dawh. Cun Jehovah nih a umpi” tiah a ti.
19 Cu tikah Saul nih Jesse sinah lamkal a hei thlah hna i “Tuu a khalmi na fapa David kha ka sinah rak thlah” tiah bia a cah.
20 Jesse nih changreu le mitsur zu rawnmi saphaw thawl kha laa cung ah a khin. Meheh no te pakhat kha a lak, a fapa David kut ah a pek i Saul sinah a kalter.
21 David cu Saul sinah a phan i a rianṭuantu a hung si. Saul nih David kha a dawt tuk. David cu a hriamnam putu a hung si.
22 Saul nih Jesse cu “David nih ka lung a ka ton ngaingai caah ka sinah rian ṭuanter zungzal ko” tiah bia a cah.
23 Saul cu a lungput ṭhalo nih hnahnawhnak a pek fate David nih tingtang a tumpiak. Cu tikah a hna a ngam i a um a nuam ṭhan, lungput ṭhalo a ngei ti lo.
