Samuel Pakhatnak 23:1-29
23 A hnuah David cu “Filistin mi nih Keilah kha an doh i phuhri i rawl kha an chuh hna” tiah an chimh.
2 Cu tikah David nih Jehovah kha “Filistin mi cu ka do hna lai maw?” tiah a hal i Jehovah nih “Filistin mi cu va do hna law Keilah kha va khamh” tiah a ti.
3 Asinain a mi hna nih “Hika Judah ram i kan um lio hmanh ah kan ṭih tuk; Filistin mi hna doh awkah Keilah i kan kal ahcun zeitluk in dah kan ṭih chinchin lai!” tiah an ti.
4 Cucaah David nih Jehovah cu a hal ṭhan tikah Jehovah nih “Tho law Keilah khua ah va ṭum, Filistin mi cu na kut chung ah kaan pek lai” tiah a ti.
5 David cu a mi hna he Keilah khua ah cun an kal i Filistin mi cu an va doh hna. An saṭil kha a lak i Filistin mi tampi a thah hna. Cuticun Keilah khuami cu a khamh hna.
6 Ahimelek fapa Abiathar cu Keilah khua ah a ummi David sin a rak zam lioah tlangbawi angki kha a rak i put.
7 “David cu Keilah khua ah a phan” tiah Saul kha an chimh tikah “Pathian nih ka kut chung ah a ka pek cang. Hauka le a hrenhnak a ummi khua ah a lut i amahle amah aa foih cang” tiah a ti.
8 Cucaah Saul nih Keilah khua ah kal awk le David le a mi pawl kha va kulh in va doh awkah a mi vialte kha a kawh hna.
9 Saul cu keimah doh awkah khua a khang ti kha David nih a hngalh tikah tlangbawi Abiathar cu “Tlangbawi angki kha rak pu” tiah a ti.
10 Cun “Maw Israel Pathian Jehovah, keimah ruang ah Keilah khua hrawh ding in Saul cu rat aa tim timi thawng kha na salpa nih ka theih.
11 Keilah khua upa hna nih a kut chung ah an ka chaan lai maw? Na salpa nih ka theih bantuk in Saul cu a ra lai maw? Maw Israel Pathian Jehovah, zaangfahnak in na salpa hi rak ka chim ko” tiah a ti tikah Jehovah nih “A ra lai” tiah a leh.
12 Cun “Keilah khua upa hna nih keimah le ka mi pawl hi Saul kut ah an kan chaan lai maw?” tiah a hal ṭhan tikah Jehovah nih “An in chanh hna lai” tiah a leh.
13 Mah tikah David le a mi 600 hrawng cu Keilah khua in an chuak colh i a him lai an tinak paoh ah an kal. David cu Keilah khua in a zam cang timi thawng kha Saul nih a theih tikah a dawi ti lo.
14 David cu kal a harnak hmun hna le Ziph ramcar i tlangram hna ah aa thup. Saul nih a kawl peng nain Jehovah nih a kut ah a chaan lo.
15 Ziph ramcar, Horesh timi hmun i a um lioah Saul cu amah thah awkah a rak chuak cang ti kha a theih.*
16 Saul fapa Jonathan cu Horesh ah a ummi David sinah a va kal i Jehovah a zumhnak a feh chin nakhnga a bawmh.
17 “Na thinphang hlah, ka pa Saul nih aan hmu lai lo. Nang cu Israel siangpahrang na si lai i kei cu aan changtu ka si lai. Mah kha ka pa Saul zong nih a hngalh ko” tiah a ti.
18 An pahnih in Jehovah hmaiah biakamnak an ser. David cu Horesh ah a taangta i Jonathan cu a inn ah a tlung.
19 A hnuah Ziph khuami hna cu Gibeah ah a ummi Saul sinah an va kal i hitin an ti: “David cu Jeshimon thlanglei, Hakhilah tlangbo i kal a harnak Horesh ah aa thup. Mah hmun cu kan umnak he aa naih.
20 Siangpahrang, na duh tik paoh ah rak ra law amah cu na kut ah kan in chanh lai.”
21 Saul nih hitin a ti hna: “Ka cung ah zaangfahnak nan langhter caah Jehovah nih thluachuah in pe ko hna seh.
22 Va kal u law khoika set ah dah a um ti le cuka ah ahote nih dah an hmuh ti kha va dothlat u. Anih cu a fimzer ngai tiah an ka chimh.
23 Aa thuhnak hmun vialte kha ṭha tein va ngia u law nan i fian taktak tikah ka sinah ra ṭhan u. Cu tikah kei zong nan sinah ka kal ve lai i Judah mi a thongthong lak i aa thuh hmanh ah ka hmuh hlan lo ka kawl lai.”
24 Annih cu Saul hlanah Ziph khua ah an kal chung. Cu lioah David le a mi hna cu Jeshimon thlanglei, Arabah hmun, Maon ramcar ah an um.
25 Saul cu a mi pawl he David kawl awkah a ra. Mah kong kha a theih tikah David cu Maon ramcar ah a ummi lungpang lei ah a ṭum colh i cuka ah a um. Cu tikah Saul nih Maon ramcar lei ah cun a rak dawi.
26 Saul cu tlang khattalei kam a rak phanh tikah David le a mi pawl cu tlang khattalei kam ah an um. Saul le a mi hna nih David le a mi hna kha tlaih awkah an rak naih chin thluahmah hna caah David cu khulrang in a zam.
27 Mah lioah lamkal pakhat cu Saul sinah a ra i “Rak kir zokzok! Filistin mi nih ram cu an rak doh cang” tiah a ti.
28 Saul cu Filistin mi hna doh awkah a kir i David kha a dawi ti lo. Cucaah cuka hmun cu Lam I Ṭhennak Lungpang tiah auh a si.
29 Cun David cu cuka hmun in aa thawh i Engedi ramlak i kal a harnak hmun hna ah aa thup.
Footnotes
^ Asiloah “a rak chuah caah a ṭih” ti zong a si kho.
