Samuel Pakhatnak 5:1-12
5 Filistin mi nih a hmaanmi Pathian biakamnak kuang kha an lak i Ebenezer in Ashdod ah an kalpi.
2 Biakamnak kuang cu Dagon biakinn ah an luhpi i Dagon milem pawng ah an chiah.
3 A thaizing zingka ah Ashdod khuami hna nih Dagon cu Jehovah biakamnak kuang hmaiah a bawktakhup in a rak tluk ko kha an hmuh. Cu tikah Dagon cu a umnak hmun ah an chiah ṭhan.
4 A thaizing zingka ah Dagon cu Jehovah biakamnak kuang hmaiah a hmasa bantuk in a bawktakhup in a rak tluk ko kha an hmuh ṭhan. Dagon lu le a kut zapei pahnih cu a kiak i innka hram ah a rak um ko. Nga he aa lomi a pum lawng a taang.
5 Cucaah Dagon tlangbawi hna le Dagon biakinn ah a lutmi paoh nih Ashdod ah a ummi Dagon biakinn i innka hram kha nihin ni tiang an laam lo.
6 Jehovah nih Ashdod khuami kha dan a tat hna. Ashdod khua le a pawngkam khua ah a ummi hna cung ah dula zawtnak a tlunter i a hrawh cikcek hna.
7 A cangmi thil kha Ashdod khuami nih an hmuh tikah “Israel Pathian nih kanmah le kan pathian Dagon kha fakpi in dan a kan tat cang caah biakamnak kuang cu kan sinah a um awk a si ti lo” tiah an ti.
8 Cucaah Filistin bawi vialte kha an auh hna i “Israel Pathian biakamnak kuang hi zeitindah kan tuah lai?” tiah an hal hna. Annih nih “Israel Pathian biakamnak kuang cu Gath khua ah ṭhial u” tiah an ti hna caah cuka ah an ṭhial.
9 Biakamnak kuang cu Gath khua a phanh tikah Jehovah nih khuami kha dan a tat hna caah thinphan thlalau in an um dih. Khuami dihlak upa he, ngakchia he dula zawtnak in dan a tat hna.
10 Cucaah a hmaanmi Pathian biakamnak kuang kha Ekron khua ah an kalpi. Ekron khua ah biakamnak kuang a phanhle cangka khuami cu “Israel Pathian biakamnak kuang cu kan sinah an ratpi cang. Kanmah he, kan miphun he kan thi dih cang lai!” tiah an au.
11 Cucaah Filistin bawi vialte kha an auh hna i “Israel Pathian biakamnak kuang hi a umnak hmun ah chiah ṭhan ding a si. Cu lo ahcun kanmah he, kan miphun he kan thi dih sual lai” tiah an ti. Khuami dihlak cu thih lai kha an ṭih tuk. Zeicahtiah a hmaanmi Pathian nih fakpi in dan a tat hna.
12 Cu lioah a thi lomi cu dula zawtnak nih a tlunh hna. Cucaah khuami hna bawmh hal in an aunak cu van tiang a phan.
