Samuel Pakhatnak 12:1-25
12 A donghnak ah Samuel nih Israel mi cu hitin a ti hna: “Nan ka halmi vialte kaan tuahpiak cang hna. Nanmah aan uktu ding ah siangpahrang kaan thimpiak cang hna.
2 Atu nan hruaitu ding siangpahrang cu amah hi a si. Kei tu cu ka tar cang i ka sam a par cang. Ka fapale zong nan lakah an um ve ko. Ka no lio tein atu tiang kaan ṭhithruai hna.
3 Atu hika ah ka um ko. Jehovah hmai le chiti a thuhmi pa hmaiah chim tuah u: Aho cawtum, aho laa dah ka lak bal? Ahodah ka hlen bal, ahodah ka namneh bal? Thil ṭhalo an tuahmi i hmuhter lo awkah aho sinin dah ziknawh ka lak bal? Ka chim u law kaan rulh ṭhan hna lai.”
4 Cu tikah annih nih “Na kan hleng lo, na kan namneh lo i kan sinin zeihmanh na la bal lo” tiah an ti.
5 Samuel nih “Ka cung ah sualphawt ding zeihmanh nan ngei lo timi kong ah nihin ah Jehovah cu tehte a si. Chiti a thuhmi pa zong tehte a si” tiah a ti. Annih nih “A si! Pathian* cu tehte a si” tiah an leh.
6 Cun Samuel nih mi cu hitin a ti hna: “Moses le Aaron hmang in nan pupa hna Izipt ram in a chuahpitu Jehovah cu tehte a si.
7 Atu ra u law hika ah rak dir u! Nanmah le nan pupa hna caah Jehovah nih a tuahmi, a dingmi tuahsernak vialte ruang ah Jehovah hmaiah bia kaan ceih hna lai.
8 “Jakob cu Izipt ram a phanh hnuah nan pupa hna cu Jehovah sinah bawmh hal in an au. Cu tikah Jehovah nih nan pupa hna cu Izipt ram in chuahpi awk le hika hmun ah umter awkah Moses le Aaron kha a thlah hna.
9 Asinain an Pathian Jehovah kha an philh caah Hazor ralbawi Sisera, Filistin mi hna le Moab siangpahrang kut ah a zuar hna i mah ral pawl nih cun an doh hna.
10 Cu tikah ‘Jehovah cu kan kaltak i Baal le Ashtoreth milem kha kan biak hna caah kan sual cang. Atu kan ral hna kut hin rak kan khamh law nangmah cu kan in biak lai’ tiah Jehovah sinah bawmh hal in an au.
11 Cu tikah Jehovah nih Jerubbaal, Bedan, Jefthah le Samuel kha a thlah hna i nan pawngkam ral hna kut in aan khamh hna caah him tein nan rak um kho.
12 Ammon siangpahrang Nahash cu nanmah doh awkah a ratmi nan hmuh tikah Jehovah Pathian cu nan siangpahrang a si ko nain ‘Zeiti a si zong ah kanmah a kan uktu ding siangpahrang ngeih kan duh ve ko’ tiah nan ti.
13 Atu nan i thimmi le nan halmi siangpahrang cu amah hi a si. Zoh hmanh u! Amah hi Jehovah nih siangpahrang ah a ser cang.
14 Jehovah cu nan ṭih, nan biak, a nawl nan ngaih i Jehovah nawl peknak kha nan ralchanh lo ahcun a ṭha ko. Cun nanmah he, nan siangpahrang he Jehovah Pathian hnu kha nan zulh ahcun a ṭha ko.
15 Asinain Jehovah bia nan ngaih lo i Jehovah nawl peknak kha nan ralchanh ahcun Jehovah nih nanmah he, nan pale he dan aan tat hna lai.
16 Atu dir rih u law Jehovah nih nan mithmuh ah a tuah laimi thil lianngan hi zoh u!
17 Atu hi changvut ṭuan caan a si. Asinain khua a rit i ruah a sur nakhnga Jehovah sinah thla ka cam lai. Cuticun nanmah caah siangpahrang nan halmi cu Jehovah mithmuh ah zeitluk in dah thil ṭhalo a si ti kha nan hngalhthiam lai.”
18 Cu hnuah Samuel nih Jehovah sinah thla a cam tikah Jehovah nih mah ni ah khua a ritter i ruah a surter. Cucaah mizapi nih Jehovah le Samuel cu an ṭih tuk hna.
19 Samuel cu “Thih kan duh lo. Na salle caah hin Jehovah sinah thla kan campiak ko. Zeicahtiah siangpahrang kan halnak thawng in kan sualnak cung ah sualnak dang kan chap chih cang” tiah an ti.
20 Cu tikah Samuel nih mizapi cu hitin a ti hna: “Nan thinphang hlah u! Hi thil ṭhalo vialte hi nan tuah taktak ko. Asinain Jehovah Pathian hnu nan zulhnak in cun pial hlah u. Jehovah Pathian kha nan lungthin dihlak in bia u.
21 Pakpalawng a simi thil hnu zulh awkah lam pial hlah u. Mah nih aan ṭhathnemh kho hna lo i a khamh zong aan khamh kho hna lo. Zeicahtiah mah cu pakpalawng an si.
22 Jehovah nih nanmah hi a miphun si awkah aan thim cang hna. Cucaah a liannganmi a min ruang ah Jehovah nih a miphun cu a hlaw lai lo.
23 Nan caah thlacam ka ngol ahcun Jehovah cung ah sualnak ka tuah a si lai caah mah cu a ruah hmanh ka ruat kho lo. Cun lam ding le lam hmaan kha kaan cawnpiak zungzal ko hna lai.
24 Jehovah kha a ṭih bel ṭih u law zumhfek tein le lungthin dihlak in bia u. Cun nan caah a tuahmi thil lianngan kha philh hlah u.
25 Asinain thil ṭhalo kha nan pah chih ahcun nanmah he, nan siangpahrang he hloh nan si lai.”
Footnotes
^ Asiloah “Pathian chiti thuhmi pa” ti zong a si kho.
