Samuel Pakhatnak 30:1-31
30 A ni thumnak ni ah David le a mi hna cu Ziklag khua an rak phan. Cu tikah khua hrawh a simi le mei in khangh a simi kha an hmuh. Zeicahtiah Amalek mi nih thlanglei* le Ziklag khua kha ruahlopi in an rak doh hna.
2 Nu le khua chung ah a ummi vialte, a hme bik in a ngan bik tiang an tlaih hna. Pakhat hmanh an that hna lo i an i kalpi hna.
3 David le a mi pawl khua chung an luh tikah khua a kanghmi le an nupi le an fale zong kalpi dih an simi kha an hmuh.
4 Cu tikah an thazaang a dih tiang fakpi in an ṭap.
5 David nupi pahnih, Jezreel khuami Ahinoam le Nabal nupi a rak simi Karmel khuami Abigail zong an kalpi hna.
6 Mi cu an fale kalpi an si caah an lung a fak tuk i David kha lung in cheh an timh. Cucaah David cu a lungre a thei tuk. Asinain Jehovah Pathian thawng in thazaang a hmu ṭhan.
7 David nih Ahimelek fapa tlangbawi Abiathar cu “Tlangbawi angki kha rak pu” tiah a ti tikah Abiathar nih a rak put.
8 David nih “Damiah phu cu ka dawi hna lai maw? Ka phan hna lai maw?” tiah Jehovah sinah a hal tikah “Va dawi hna, na phanh hrimhrim hna lai i an firmi thil vialte cu na lak khawh ṭhan lai” tiah a ti.
9 David cu a mi 600 he an i thawh colh i Besor tivarek tiang an kal. Cuka ah mi cheukhat cu an taangta.
10 David le a mi 400 nih an dawi thluahmah hna. Asinain mi 200 cu an tha a ba tuk i Besor tivarek kha an tan khawh ti lo caah an taangta.
11 Ramlak ah Izipt mipa pakhat kha an hmuh i David sinah an ratpi. Cun ti le rawl an pek.
12 Theipi car nenmi thlar khat le mitsur car nenmi thlar hnih zong an pek. Mah kha a ei tikah a tha a um ṭhan. Cu pa cu ni thum le zan thum chung zei rawl hmanh a rak ei lo i ti zong a rak ding lo.
13 David nih “Aho sal dah na si? Khoika in dah na rat?” tiah a hal tikah “Kei cu Izipt mi ka si, Amalek mipa sal ka si. A luancia ni thum ah khan ka zawt caah ka bawipa nih a ka kaltak.
14 Khereth mi hna ram thlanglei, Judah ram le Kaleb ram thlanglei kha kan va doh i Ziklag khua kha mei in kan khangh” tiah a leh.
15 David nih “Mah damiah phu sinah na ka hruai lai maw?” tiah a ti tikah “Keimah thah lo awk le ka bawipa sin chanh ṭhan lo awkah Pathian min chalh in chiat na ser ahcun kaan hruai ko lai” tiah a leh.
16 Cucaah damiah pawl umnak ah cun a hruai hna. Mah lioah damiah pawl cu Filistin ram le Judah ram in an lakmi hranchaw tampi ruang ah an ei, an ding, puai an tuah i an rak i ṭhek dih.
17 David nih khuadei hlan in zanlei tiang a doh hna caah kalauk i cit in a zammi, mi 400 dah ti lo cu an thi dih.
18 Amalek mi nih an firmi thil vialte kha a lak ṭhan dih i a nupi pahnih zong a khamh hna.
19 An thilri zeihmanh a tlau lo. An firmi hranchaw vialte, a hme bik in a ngan bik tiang an lak ṭhan dih.
20 David nih Amalek mi hna tuurun le saṭil run zong kha a lak hna. A mi hna nih anmah saṭil run hmai in an khalh hna i “Mah hi David hranchaw a si” tiah an ti.
21 Cun an bat tuk caah David sinah a kal kho lo i Besor tivarek ah a taangtami, mi 200 sinah David cu a rak phan. Annih cu David le a sinah a kalmi hna don awkah an rak chuak. An i ton tikah David nih zeidah an lawh ti kha a hal hna.
22 Asinain David sinah a kal vemi lakin miṭhalo le mi zei ruaram lo pawl nih “Annih cu kan sinah an kal ve lo caah kan lakmi hranchaw zeihmanh kan pe hna lai lo. An nupile le an fale kha i lak hna sehlaw kal ko hna seh” tiah an ti.
23 Cu tikah David nih “Unau hna, Jehovah nih a kan pekmi thil cung ah cutin nan tuah awk a si lo. Pathian nih a kan huhphenh i a kan dotu damiah phu kha kan kut ah a kan pek cang.
24 Hitin nan chimmi hi ahohmanh an hna a tla lai lo. Raltuknak ah a kalmi hna covo le thilri a hngaktu hna covo cu aa khat lai. Kan dihlak in aa zat tein kan i cheu lai” tiah a ti.
25 David nih a sermi mah phunglam cu nihin ni tiang Israel ram ah an zulh.
26 David cu Ziklag khua a phanh tikah a hawile a simi Judah upa pawl kha hranchaw tlawmpal a kuat hna i “Jehovah ral pawl sinin kan lakmi hranchaw lakin laksawng kaan kuat hna” tiah a ti.
27 Bethel, Negeb ram* i Ramoth, Jattir,
28 Aroer, Siphmoth, Eshtemoa,
29 Rakal, Jerahmeel mi ta a simi khua hna, Ken mi ta a simi khua hna,
30 Hormah, Borashan, Athak,
31 Hebron ah a ummi hna sin le David le a mi pawl an kal lengmangnak khua hna ah laksawng cu a kuat hna.
