Samuel Pakhatnak 24:1-22
24 Saul cu Filistin mi a doh hnanak in a rak kir tikah “David cu Engedi ramcar ah aa thup” tiah a mi pawl nih an chimh.
2 Cucaah Saul nih Israel mi lakin pa 3,000 a thim hna i David le a mi pawl kawl awkah sathar an tlonnak lungpang ah an kal.
3 Saul cu lam pawng i lung in sermi tuukawm ah a rak phan. Cuka ah lungkua pakhat a um, zun awkah a chung ah a va lut. Mah lioah David le a mi pawl cu lungkua a chung bik ah an ṭhu.
4 A mi pawl nih David cu “Zoh hmanh! Nihin ah Jehovah nih na ral cu na kut chung ah aan pek cang. A ṭha na ti ning paoh in na tuah khawh” tiah an ti. Cucaah David cu a tho i Saul liangbah angki fual a par cu a thli tein a va tan.
5 Asinain Saul liangbah angki fual i a par kha a tan caah David cu a lungthin* nih sual a phawt peng.
6 Cucaah a mi pawl cu “Jehovah hmuhnak in zoh ahcun Jehovah chiti thuhmi siangpahrang cung ah cu bantuk thil tuah ding cu a ruah hmanh ka ruah awk a si lo. Amah cu Jehovah nih chiti a thuhmi a si caah harnak ka pek awk a si lo” tiah a ti hna.
7 Cuticun a mi pawl kha a thlauh hna i Saul harnak pek ding in nawl a awnh hna lo. Saul cu lungkua chung in a chuak i a khuallam kha a peh.
8 David zong lungkua chung in a chuak i “Siangpahrang ka bawipa!” tiah Saul cu a hei auh. Saul nih a hnulei a zoh tikah David cu vawlei ah a kun i a bawk.
9 Cun hitin a ti: “‘David nih harnak pek aan timh’ tiah mi nih an chimmi hi zeicah na zumh?
10 Nihin lungkua chung na um lioah Jehovah Pathian nih nangmah kha ka kut chung ah aan chanh ti kha na hngal maw? Nangmah thah awkah an ka forh nain kaan zaangfah caah ‘Siangpahrang cu Jehovah chiti thuhmi a si caah harnak ka pek awk a si lo’ tiah ka ti.
11 Ka pa, na angki par ka tanmi hi zoh hmanh! Na angki par ka tan lioah kaan rak thah khawh ko nain kaan that lo. Atu cu nangmah ralchanh in harnak pek awkah kaa zuam lo ti kha na hngalh awk a si cang. Keimah thah awkah na ka dawi nain kei nih cun na cung ah zei sualnak hmanh ka tuah lo.
12 Jehovah nih nangmah le keimah karah bia rak kan ceih ko seh. Jehovah nih ka caah phuhlam ko seh. Asinain keimah nih cun harnak kaan pe lai lo.
13 ‘Miṭhalo sinin ṭhatlonak a chuak tawn’ timi hlanlio phungthluk a um. Cucaah kei nih cun na cung ah thil ṭhalo ka tuah lai lo.
14 Israel siangpahrang nih ahodah a kawl? Ahodah a dawi? Uico a thimi le uihli bantuk men a simi keimah maw?
15 Biaceihtu Jehovah nih nangmah le keimah karah bia kan ceih ko seh. Ka sining hi a ka dothlatpiak lai, a ka runven lai, bia a ka ceihpiak lai i na kut chung in a ka khamh lai.”
16 David nih bia a chim dihle cangka Saul nih “Ka fapa David, nangmah aw maw a si?” tiah a ti i aw thangpi in a ṭap.
17 David kha hitin a ti: “Nang cu keimah nakin na ding deuh. Ka cung ah na ṭha nain kei tu nih cun ṭhatlonak in kaan lehrulh.
18 Nihin zong ah Jehovah nih na kut chung ah a ka chanh nain na ka that lo. Cuticun ka cung ah ṭhatnak na langhter.
19 A ral kha a hmu nain zeihmanh tuah loin a thlah ṭhanmi an um bal maw? Nihin ah ka cung i na langhtermi ṭhatnak caah Jehovah nih laksawng aan pek lai.
20 Nang cu siangpahrang na si hrimhrim lai i Israel pennak cu na kut chung ah a hmun lai ti kha ka hngalh.
21 Cucaah ka thih hnuah ka tefa kha hloh lo awk le ka min kha ka pa chungkhar in hloh lo awkah Jehovah min chalh in chiatser in bia i kam.”
22 Saul chimmi ning in David nih chiat a ser. Cu hnuah Saul cu a inn ah a kir. David zong a mi pawl he ralhruang ah an kal.
Footnotes
^ Asiloah “a chiaṭha thleidannak lungthin.”
