Samuel Pakhatnak 21:1-15
21 A hnuah David cu Nob khua i tlangbawi Ahimelek sinah a phan. Ahimelek nih a hmuh tikah a lau tuk i “Zeicah nangmah lawng na rat? Ahohmanh nih an in zul lo maw?” tiah a ti.
2 David nih tlangbawi Ahimelek cu “Siangpahrang nih thil pakhat tuah a ka fial. Asinain ‘Zei caah dah kaan thlah ti le zei rian dah kaan fial ti kha ahohmanh hngalhter hna hlah’ tiah bia a ka cah. Ka mi pawl he hmun pakhat ah i ton ding in bia kan i tiam cang.
3 Zaangfahnak in changreu hlum nga na ngeih ahcun rak ka pe. Asiloah na ngeihmi zeipaoh rak ka pe ko” tiah a ti.
4 Cu tikah tlangbawi nih “Changreu sawhsawh cu a um lo. A thiangmi changreu lawng a um. Na mi pawl cu nu he an ihṭi lo paoh ahcun i lak ko” tiah a ti.
5 David nih “A hmasa raldohnak i kan rak kal lio bantuk in nu kongkau ah kan thiang ko. Rian sawhsawh ṭuan lio hmanh ah ka mi pawl cu an thiang. Atu bantuk a hleikhunmi rian ṭuan lioah cun an thiang chinchin” tiah a leh.
6 Pathian hmaiah hunhmi changreu dah ti lo cu a dang changreu a um lo caah a thiangmi changreu cu tlangbawi nih a pek. Mah cu, cu ni ah changreu thar in thlen awkah Jehovah hmai in an lak cangmi a si.
7 Cu ni ah Saul salpa pakhat cu Jehovah hmai taanta awkah rian a ngeih caah cuka ah a um ve. Anih cu Edom mi, Saul tuukhal haotu Doeg a si.
8 David nih Ahimelek cu “Fei siseh, vainam siseh na ngeihmi a um maw? Siangpahrang rian pekmi cu khulrang in tuah a herh caah ka vainam le hriamnam ka la manh lo” tiah a ti.
9 Cu tikah tlangbawi nih “Elah Nelrawn ah na thahmi Filistin mipa Goliath vainam cu a um. Puan in ka zual i tlangbawi ngan angki hnuah ka chiah ko. Mah vainam lawng a um. Na duh ahcun i lak ko” tiah a ti. David nih “Cu bantuk vainam cu a um ti lo. Rak ka pe” tiah a ti.
10 Cu ni ah David cu Saul sinin a zam thluahmah i a donghnak ah Gath siangpahrang Akhish sinah a phan.
11 Akhish a salle nih “Amah hi Israel ram siangpahrang David kha a si lo maw? Mi nih an laam pah in,‘Saul thahmi cu a thongthong,David thahmi cu a sangsang’ tiah hla an sak hnawhmi pa kha a si lo maw?” tiin siangpahrang cu an ti.
12 David nih cutin an chimmi kha a ruah tikah Gath siangpahrang Akhish kha a ṭih tuk.
13 Cucaah an hmaiah a hrutmi bantuk in aa umter. Khua hauka ah a rin thulhthalh, a cil khadi a tawhter i a khahmul ah a luanter.
14 A donghnak ah Akhish nih a salle cu “Mah pa hi mihrut pei a si hi! Zeicah ka sinah nan ratpi?
15 Ka sinah mihrut an tlawm tuk ruang ah maw hi mihrut pa hi nan ratpi? Hi bantuk mi hi ka inn ah nan luhter awk a si maw?” tiah a ti hna.
