Samuel Pakhatnak 6:1-21
-
Filistin mi nih Israel ram ah biakamnak kuang an chiah ṭhan (1-21)
6 Jehovah biakamnak kuang cu Filistin mi hna ram ah thla sarih chung a um.
2 Filistin mi nih tlangbawi hna le khuachia thiamnak a ngeimi kha an auh hna i “Jehovah biakamnak kuang hi zeitindah kan tuah awk a si? A umnak hmun ah zeitin kan chiah ṭhan ah dah a ṭhat lai?” tiah an hal hna.
3 Annih nih “Israel Pathian Jehovah biakamnak kuang kha nan chiah ṭhan ding a si ahcun laksawng tel loin chia ṭhan hlah u. Pathian sinah sual thawinak zong nan pek hrimhrim awk a si. Cu lawng ah nan dam lai i Pathian nih zeicah atu tiang dan a kan tat ti kha nan hngalh lai” tiah an ti hna.
4 “Cu Pathian caah zei bantuk sual thawinak dah kan pek lai?” tiah an hal hna tikah hitin an leh hna: “Filistin bawi milu zat in dula mui a kengmi sui zuk panga, zu mui a kengmi sui zuk panga nan ser lai. Zeicahtiah nanmah le nan bawile cung ah a tlungmi rai cu aa khat dih.
5 Dula mui a kengmi zuk le nan ram a hrawktu zu mui a kengmi zuk kha nan ser lai i Israel Pathian kha upatnak nan pek lai. Cutin nan tuah ahcun nanmah, nan pathian le nan ram dan aan tatmi hna kha a ngol zong a ngol khawh men.
6 Faraoh le Izipt mi hna bantuk in zeicah nan lung a khon? Pathian nih fakpi in dan a tat hna tikah Israel mi cu an rak thlah hna. Cucaah Israel mi cu Izipt ram in an rak chuak.
7 Atu cawleng thar pakhat ser u law hngawngkual khinh bal lomi, fano a ngeimi cawpi pahnih kha hnuhter hna u. Cawfa tu kha cu kawm ah khumh hna u.
8 Jehovah biakamnak kuang kha leng cung ah chia u. Pathian sin sual thawinak caah nan kuat dingmi sui zuk hna kha kuang pakhat ah sanh u law a pawng ah chia u. Cun leng kha kalter u law,
9 khoikalei ah dah a kal ti kha zoh u. Biakamnak kuang a rak umnak Beth-shemesh lei ah a kal ahcun kan cung ah hi thil ṭhalo a tluntertu cu Israel Pathian a si ti kha kan hngalh lai. Beth-shemesh lei ah a kal lo ahcun dan a kan tattu cu mah Pathian hi a si lo, a cang sualmi thil a si ti kha kan hngalh lai.”
10 Filistin mi nih mah ning tein an tuah. Fano a ngeimi cawpi pahnih kha leng cu an hnuhter hna i cawfa tete cu kawm chung ah an khumh hna.
11 Jehovah biakamnak kuang kha leng cung ah an chiah. Dula mui a kengmi zuk le zu mui a kengmi sui zuk sanhmi kuang zong kha an chiah ve.
12 Caw cu Beth-shemesh khua lei ah kehlei, orhlei pial loin ding tein an kal. Lampi cu an zulh i an paw pah lengmang. Filistin bawi hna nih Beth-shemesh khua pawng tiang an zulh.
13 Mah lioah Beth-shemesh khuami hna cu nelrawn ah changvut an ṭuan. Khua an hei zoh i biakamnak kuang kha an hmuh tikah an i lawm tuk.
14 Cawleng cu Beth-shemesh khuami Joshua lo ah a rak phan i lung nganpi pawng ah a dir. Khuami hna nih cawleng thing kha an tan i caw kha khangh thawinak in Jehovah sinah an pek.
15 Levi mi nih Jehovah biakamnak kuang le sui in sermi zuk hna sanhmi kuang kha an ṭhumh i lung nganpi cung ah an chiah. Beth-shemesh khuami hna nih mah ni ah Jehovah sinah khangh thawinak le raithawinak kha an pekchanh.
16 Filistin bawi panga nih mah kha an zoh hnuah Ekron khua ah cu ni ah cun an kir ṭhan.
17 Filistin mi nih Jehovah sinah sual thawinak caah an kuatmi dula mui a kengmi sui zuk panga cu Ashdod, Gaza, Ashkelon, Gath le Ekron khua caah a si.
18 Zu mui a kengmi sui zuk hna cu Filistin bawi panga nih an ukmi khua zat in an pek. Mah ah kulhnak a ngeimi khua hna le khuate hna aa tel.
Jehovah biakamnak kuang an chiahnak lung nganpi cu nihin ni tiang tehte caah Beth-shemesh khuami Joshua lo ah a um rih ko.
19 Beth-shemesh khuami hna nih Jehovah biakamnak kuang kha an zoh caah Pathian nih dan a tat hna i mi 50,070 an thi. Jehovah nih mi tampi a thah hna caah mi cu an ṭap.
20 Cucaah Beth-shemesh khuami nih “A thiangmi Pathian Jehovah hmaiah ahodah a dir kho lai? Pathian cu kan sinin hmun dang ah kal seh law a ṭha tuk hnga” tiah an ti.
21 Cucaah Kiriath-jearim khuami sinah lamkal an hei thlah hna i “Filistin mi nih Jehovah biakamnak kuang kha an rak chiah ṭhan cang. Rak ṭum u law rak la u” tiah an ti hna.
