Samuel Pakhatnak 13:1-23
13 Saul cu kum . . .* a si ah siangpahrang a hung si. Israel ram kha kum hnih chung a uk hnuah,
2 Israel mi chung in mi 3,000 a thim hna; 2,000 kha Mikmash le Bethel tlangram ah amah sinah a umter hna. Mi 1,000 tu cu Benjamin ram Gibeah khua ah Jonathan sinah a chiah hna. A taangmi kha cu anmahle an thlam cio ah a kirter hna.
3 Jonathan nih Geba ah a ummi khuavengtu Filistin ralkapbu kha a doh hna i a tei hna, mah kha Filistin mi nih an theih. Saul nih “Hebru mi vialte nih thei hna seh!” tiah a ti i ram pumpi ah saki a tumter hna.
4 “Khuavengtu Filistin ralkapbu kha Saul nih a tei hna caah Filistin mi nih Israel mi cu an huat cang hna” timi thawng kha Israel mi vialte nih an theih. Israel mi cu Gilgal ah Saul sinah kal ding in auh an si.
5 Filistin mi zong Israel mi doh awkah hmunkhat ah an i pum ve. Raldohnak rangleng 30,000, rang cung ralkap 6,000 le rilikam thetse zat in a tammi ralkap hna cu an rak i thawh i Beth-aven nichuahlei Mikmash ah riahhmun an khuar.
6 Israel mi nih fakpi in doh kan si cang i harnak kan tong cang lai ti kha an hngalh tikah lungkua, khor, lungpang, vawlei tang khaan le tikhor hna ah an i thup.
7 Hebru mi cheukhat cu Jordan Tiva kha an tan i Gad ram le Gilead ram tiang hmanh an zam, Saul tu cu Gilgal ah a um rih. A hnu zultu ralkap pawl cu ṭihphang in an um.
8 Samuel nih bia a cahmi ning in ni sarih chung a hngah. Asinain Samuel cu Gilgal ah a rak phan lo i ralkap pawl zong a sinin an i ṭhenṭhek dih cang.
9 A donghnak ah Saul nih “Khangh thawinak le hawikomhnak thawinak kha rak pu u” tiah a ti i khangh thawinak cu a pekchanh.
10 Khangh thawinak a pek dihle cangka Samuel cu a rak phan. Saul cu Samuel don awkah a va chuak i a chawnh.
11 Samuel nih “Zei thil dah na tuah?” tiah a hal tikah Saul nih “Ka ralkap nih an ka zamtak dih cang, nang zong ri kan khiahmi caan ah na rak phan lo. Cun Filistin mi cu Mikmash ah riahhmun an khuar cang.
12 Cu tikah ‘Filistin mi cu keimah doh awkah Gilgal ah an rak ṭum cang lai. Jehovah mithmai ṭha hmuh awkah zeihmanh ka tuah rih fawn lo’ tiah ka ti. Khangh thawinak ka pek a hau cang lai tiah ka ruah i ka pekmi a si” tiah a leh.
13 Cu tikah Samuel nih Saul cu hitin a ti: “Hrut ngai in thil na tuah cang. Na Pathian Jehovah nawl peknak kha na ngai lo. Rak ngai law cu Jehovah nih Israel ram ah na pennak kha zungzal in a hmunhter hnga.
14 Asinain Jehovah nawl peknak kha na ngaih lo caah na pennak cu a hmun lai lo. Jehovah nih a lung duhmi phun a simi pa kha a thim lai. Amah cu a miphun hruaitu ding ah Jehovah nih rian a pek lai.”
15 Cun Samuel cu a tho i Gilgal in Benjamin ram Gibeah ah a kal. Saul nih a sinah a taangmi ralkap kha a rel hna tikah mi 600 hrawng an um rih.
16 Saul, a fapa Jonathan le an sinah a ummi ralkap hna cu Benjamin ram Geba khua ah an um. Filistin mi tu cu Mikmash ah riahhmun an khuar.
17 Filistin riahhmun in ralkap phu thum cu an hun chuak. Phu khat nih Shual ram lei Ofrah khua kalnak lam kha an zulh.
18 A dang phu khat cu Beth-horon khua kalnak lam ning in an kal. A phu thumnak nih Zeboim horkuang a langhnak, ramcar lei kalnak lam kha an zulh.
19 “Hebru mi nih fei pakhat le nam pakhat te hmanh ser hna hlah seh” tiah Filistin mi nih an ti caah mah lio caan ah Israel ram pumpi ah soser pakhat hmanh an um lo.
20 Israel mi cu lei thuannak ha, tuhmui, hreitlung le fa-ah ti bantuk taat awkah Filistin mi hna sinah an va ṭum tawn.
21 Lei thuannak ha, tuhmui, ha pathum a ngeimi fung zum le hreitlung taat man le caw khalhnak fung zum bunh man cu pim* khat a si.
22 Cucaah ral an doh tikah Saul le a fapa Jonathan dah ti lo cu fei le nam a ngeimi ralkap ahohmanh an um lo.
23 Mah lioah khuavengtu Filistin ralkap phu khat cu Mikmash horkuang lei ah an kal.
Footnotes
^ A hrampi Hebru Baibal ah a um lo.
^ Hlanlio thlainak. Pim khat cu shekel pakhat i cheu thum cheu hnih tluk a si. Thlaihhlei B14 ah zoh.
