Samuel Pakhatnak 2:1-36
2 Cun Hannah cu hitin thla a cam:
“Jehovah thawng in ka lung aa lawm;Jehovah nih ka ki* kha a cawisan.
Ka ral hna kha ralṭha tein ka leh ngam hna,Na khamhnak nih a ka lawmhter.
2 Jehovah bantuk in a thiangmi ahohmanh an um lo,Nangmah bantuk ahohmanh an um lo,Kan Pathian bantuk lungpi an um lo.
3 Jehovah cu zeizong vialte a hngaltu Pathian a si;Minung tuahsernak kha ding tein bia a ceihtu a si,Cucaah porhlaw ngai in bia chim ti hlah u,Ruamkainak cu nan kaa in chuahter ti hlah u.
4 A ṭhawngmi hna i an likuk cu a kiak dih,Asinain a derthawmmi* cu thazaang pek an si.
5 Khim tein a rak eimi cu rawl hmuh awkah kuli a ṭuan,A paw a rak ṭammi cu a ṭam ti lo.
A cingmi nu nih fa pasarih a hrin,Asinain fa tampi a rak ngeimi nu cu a li a leng.
6 Jehovah nih a thihter khawh, a nunter khawh;Thlan* ah a phanhter khawh, a thawhter khawh.
7 Jehovah nih a si a fahter khawh, a rumter khawh;A ṭhumh khawh, a hlorh khawh.
8 Nautami kha leidip in a thawh hna;Sifakmi kha vutcam pon in a cawi hna,Bawi hna lakah a ṭhutter hna i,Upatnak ṭhutdan a pek hna.
Vawlei tung hna cu Jehovah ta a si i,An cung ah vawlei cu a khin.
9 Zumhfekmi hna an kehlan kha a ven,Miṭhalo tu cu mui lakah dai ṭhup in an um lai,Minung cu amah ṭhawnnak in teinak a hmu kho lo.
10 Jehovah nih amah a dotu cu a den cikcek hna lai;*An cung ah van in khua a ritter lai.
Jehovah nih vawleicung pumpi bia a ceih lai,A siangpahrang cu ṭhawnnak a pek lai iChiti a thuhmi pa i a ki* cu a cawisan lai.”
11 Cu hnuah Elkanah cu Ramah khua i an inn ah a tlung. Ngakchiapa tu cu tlangbawi Eli kut tang ah Jehovah rianṭuantu a hung si.
12 Eli fapale cu miṭhalo an si i Jehovah zei a rel lomi an si.
13 Mi sinin tlangbawi nih hmuhnak nawl a ngeihmi covo he aa tlaiin hitin an tuah tawn: Mi pakhat nih rai a thawi i sa cu an chuan cuahmah lioah tlangbawi sinum cu ṭe thum a ngeimi keu zum i put in a ra.
14 Um chung ah an chuanmi sa kha a hei sawh i keu zum in a thur khawhmi paoh cu tlangbawi caah a lak. Shiloh ah a rami Israel mi vialte cung ah cutin an tuah.
15 Mah leng ah raithawinak a petu nih a thau a khangh hlan hmanh in tlangbawi sinum cu a ra i “Tlangbawi caah em awk sa hring rak ka pe. Chuan ciami cu a duh lai lo” tiah a ti tawn.
16 Raithawinak a petu nih “A thau ka khangh hmasa ta lai. Mah hnuah na duhmi paoh i lak te ko” tiah a ti tikah “Ka duh lo, atu rak ka pe. Na ka pek lo ahcun kaan chuh lai” tiah a ti tawn.
17 Sinum hna sualnak cu Jehovah hmaiah a ngan tuk. Zeicahtiah Jehovah sin pekchanhmi raithawinak kha an* upat lo.
18 Samuel cu ngakchiate a si rih nain khiangraang tlangbawi angki kha aa hruk i Jehovah hmaiah rian a ṭuan.
19 A nu nih liangbah angki hmete a ṭhitpiak i a vapa he raithawi awkah kum fatin an kal tikah a phorh tawn.
20 Eli nih Elkanah le a nupi cu thluachuah a pek hna i Elkanah kha “Jehovah nan pekchanhmi hi fapa canah Jehovah nih mah na nupi hmang in fa pakhat in pe ṭhan ko seh” tiah a ti. Cun inn ah an tlung.
21 Jehovah nih Hannah cu a philh lo caah fa a pawi i fapa pathum le fanu pahnih a ngei chap. Ngakchiapa Samuel cu Jehovah hmaiah a hung ṭhang.
22 Eli cu a tar tuk cang, Israel mi hna cung ah a fapale nih an tuahmi le tonnak thlam luhnak ah rian a ṭuanmi nu pawl an ihpimi hna kong kha a theih dih.
23 Eli nih a fapale cu “Zeicah hi bantuk thil hi nan tuah lengmang? Nan kong he aa tlaiin mi sinin ka theihmi thawngpang hi a ṭhalo ngai.
24 Cutin nan tuah awk a si lo, ka fale. Jehovah miphun lakah a thangmi nan thawngpang hi a ṭhami a si lo.
25 Mi pakhat nih a minunghawi cung ah sualnak a tuah ahcun pakhatkhat nih Jehovah an nawlpiak khawh.* Asinain Jehovah cung ah sualnak a tuah ahcun aho nih dah a nawlpiak khawh ti lai?” tiah a ti hna. Asinain an pa bia cu an ngai duh lo. Jehovah nih anmah kha thah awkah bia a khiah cang.
26 Cu lio caan ah ngakchiapa Samuel cu a ṭhang thluahmah i Jehovah le minung hmaiah mithmai ṭha a hmu.
27 Pathian thlahmi pa pakhat cu Eli sinah a ra i hitin a ti: “Jehovah chimmi cu hihi a si: ‘Izipt ram Faraoh inn ah sal in an um lioah na pupa le a chungkhar sinah ahodah ka si kha fiang tein ka rak i langhter.
28 Na pupa cu ka tlangbawi ṭuan awk, ka biakṭheng ah raithawinak pek awk, rimhmui thawinak pek awk* le tlangbawi ngan angki i hruk awkah Israel phun vialte chung in ka thim. Cun Israel mi nih mei in an khanghmi thawinak kha na pupa le a tefa cu ka pek hna.
29 Ka umnak hmun ah ratpi ding in nawl ka pekmi hna raithawinak le pekchanhnak kha zeicah zei rel loin nan um? Ka miphun Israel mi nih an pekmi raithawinak kip ah a ṭhat biknak kha nan ei i nan i thauter. Zeicah na fapale cu keimah nakin na upat deuh hna?
30 “‘Cucaah Israel Pathian Jehovah nih “Na chungkhar le na pupa chungkhar cu ka rian an ṭuan zungzal lai* tiin ka rak chim taktak ko” tiah a ti. Asinain atu cu Jehovah nih “Cutin a si hrimhrim ti lai lo, zeicahtiah a ka upatmi cu ka upat ve hna lai i zei a ka rel lomi cu zei ah ka rel ve hna lai lo” tiah a ti.
31 Na thazaang le na pa chungkhar thazaang ka hloh lai ni cu a ra lio. Cucaah nan chungkhar chung in pa ahohmanh chan tlung in nan nung lai lo.
32 Israel mi nih thilṭha an co lioah nang cu ka umnak hmun ah ral lawng na hmuh lai. Na innchungkhar ah chan tlung in a nungmi pa ahohmanh an um bal lai lo.
33 Ka biakṭheng i rianṭuan awkah na tefa lakin ka nganhmi nih na mit tha a dihter lai i na ngaih aan chiatter lai. Na tefa lakin mi tam deuh cu vainam in an thi lai.
34 Hi hmelchunhnak hi kaan pek lai: Na fapa pahnih, Hofni le Finehas cu ni khat te ah an thi lai.
35 Mah hnuah keimah caah zumhfekmi tlangbawi pakhat ka chuahter lai i ka lung duh ning tein a tuah lai. A tefa cu zungzal in tlangbawi rian ka ṭuanter hna lai. Anih nih chiti ka thuhmi pa rian kha a ṭuan zungzal lai.
36 Na tefa chung in a taang rihmi hna cu tlangbawi sinah an ra lai. Rianṭuan man le changreu hlumkhat hmuh awkah a hmaiah an kun lai i “Changreu tlawmte tal ka hmuh nakhnga tlangbawi rian rak ka ṭuanter ko” tiah an ti lai.’”
Footnotes
^ Asiloah “ka thazaang.” Biafang Fianternak ah zoh.
^ Asiloah “a tlurilmi.”
^ Biafang Fianternak ah zoh.
^ Asiloah “Jehovah a zuamcawhtu cu therphang in an um lai” ti zong a si kho.
^ Asiloah “a thazaang.” Biafang Fianternak ah zoh.
^ Eli fapa pahnih an si kho men. Asinain an sinum hna zong an i tel kho men.
^ Asiloah “Pathian nih remnak a serpiak khawh” ti zong a si kho.
^ Asiloah “rimhmui khu kaiter awk” ti zong a si kho.
^ A hrampi, “ka hmaiah an kal zungzal lai.”
