Samuel Pakhatnak 3:1-21
-
Samuel cu profet a hung si (1-21)
3 Mah lioah ngakchiapa Samuel cu Eli kut tang ah Jehovah rian a ṭuan. Cu lio caan ah Jehovah bia cu theih a si tuk lo i langhnak zong hmuh a si tuk lo.
2 Eli cu a mit a maw i ṭha tein khua a hmu kho ti lo. Ni khat cu a khaan chung ah a it.
3 Pathian meiinn cu a mit rih lo. Samuel cu biakamnak kuang a umnak Jehovah biakinn* ah a it.
4 Jehovah nih Samuel kha a auh tikah “Ka um ko” tiah a leh.
5 Samuel cu Eli sinah a va tli i “Ka min auh thawng ka theih caah ka ra” tiah a ti. Asinain Eli nih “Kaan au lo, va it ṭhan ko” tiah a ti caah a va it ṭhan.
6 Jehovah nih “Samuel!” tiah a auh ṭhan tikah Samuel cu a tho i Eli sinah a va kal. “Ka min auh thawng ka theih caah ka ra” tiah a ti tikah Eli nih “Kaan au lo, ka fapa. Va it ṭhan ko” tiah a ti.
7 (Samuel nih Jehovah kha ṭha tein a hngal rih lo. Jehovah bia zong a sinah phuan a si rih lo.)
8 Jehovah nih “Samuel!” tiah a voithumnak a auh ṭhan. Mah tikah Eli sinah a kal i “Ka min auh thawng ka theih caah ka ra” tiah a ti.
Cu tikah Eli nih ngakchiapa a autu cu Jehovah a si ti kha a hun hngalh.
9 Samuel cu “Va it ṭhan ko. A hnuah aan auh ṭhan ahcun ‘Jehovah, chim ko. Na salpa nih ka ngaih ko’ tiah na va ti lai” tiin a cah. Cucaah Samuel cu a va it ṭhan.
10 Jehovah nih voidang bantuk in “Samuel! Samuel!” tiah a auh ṭhan. Cu tikah Samuel nih “Chim ko, na salpa nih ka ngaih ko” tiah a leh.
11 Jehovah nih Samuel cu hitin a ti: “Zoh hmanh! A theitu vialte a lautermi* thil pakhat Israel ram ah ka tuah lai.
12 Cu ni ah Eli chungkhar he aa tlaiin ka chimmi vialte pakhat hmanh bau loin ka tlinter lai.
13 A fapale nih Pathian chiat an serhmi kha a hngalh ko nain fakpi in a chimhrin hna lo. Eli chungkhar cu zungzal in dan ka tat hna lai tiah na chimh lai.
14 Cucaah raithawinak le pekchanhnak thawng in Eli chungkhar sualnak cu zeitik hmanh ah ngaihthiam a si lai lo tiah chiatserh in bia kaa kam cang.”
15 Samuel cu khuadei tiang a ih hnuah Jehovah inn i innka kha a hun hna. Asinain a hmuhmi langhnak kong kha Eli cu a chim ngam lo.
16 Eli nih “Samuel, ka fapa” tiah a auh tikah “Ka um ko” tiah a leh.
17 Cu tikah “Pathian nih zeidah aan chimh? Pakhat hmanh thup loin rak ka chim. Pakhat te na thuh ahcun Pathian nih dantatnak pakhat hnu pakhat in na cung ah tlunter ko seh” tiah Eli nih a ti.
18 Samuel nih pakhat hmanh thup loin a chimh dih tikah Eli nih “Mah cu Jehovah bia pei a si cu, a mithmuh ah a ṭha a ti ning paoh in tuah ko seh” tiah a ti.
19 Cuticun Samuel cu a ṭhang i Jehovah nih a umpi caah a chimmi bia vialte cu a tling dih.
20 Samuel cu Jehovah profet a si kha Dan in Beersheba tiang Israel mi vialte nih an hngalh dih.
21 Shiloh cu Jehovah a langh tawnnak hmun a si. Jehovah cu Shiloh khua i Samuel sinah a lang i a bia a chimhnak thawng in Jehovah nih a kong kha a hngalhter tawn.
