Samuel Pakhatnak 14:1-52
14 Ni khat cu Saul fapa Jonathan nih a hriamnam putu a hnu zul kha “Khattalei ral ah a ummi Filistin ralvengtu sinah va kal u sih” tiah a ti. Asinain a pa kha cu a chim lo.
2 Saul cu Gibeah khua leng Migron hmun i taleti kung tang ah a um. A sinah ralkap 600 hrawng an um.
3 (Mah lio caan ah Ahijah nih tlangbawi ngan angki aa hruk. A pa cu Ikabod upa, Ahitub a si i a pu cu Finehas a si. Finehas cu Shiloh ah Jehovah tlangbawi a ṭuanmi Eli fapa a si.) Jonathan a kalmi kha mi nih an hngal lo.
4 Filistin ralvengtu sin phanh awkah Jonathan nih tan aa timhnak lam i khattalei veve ah ha he aa lomi lungpang an um. Pakhat cu Bozez a si i a dang pakhat cu Seneh a si.
5 Chaklei ah a ummi lungpang cu tungpi bantuk in Mikmash lei ah a hoih i thlanglei ah a ummi lungpang cu Geba lei ah a hoih.
6 Jonathan nih a hriamnam putu kha “Cuarpar tan lomi ralvengtu hna sinah va kal u sih! Jehovah nih a kan bawmh ko lai. Jehovah nih mi tampi hmang in siseh, mi tlawmte hmang in siseh a kan khamh khawh ko. Zeihmanh nih a dawn kho lo” tiah a ti.
7 A hriamnam putu nih “Na duhmi paoh tuah ko. Na duhnak hmun paoh ah kal ko. Na kalnak hmun paoh ah kaan zulh lai” tiah a ti.
8 Cu tikah Jonathan nih “An sinah kan va kal lai i kan va i langhter lai.
9 Annih nih ‘Dir u! Kanmah tu kan ra lai’ an ti ahcun cuka hmun ah kan dir lai. An sinah kan va kai ti lai lo.
10 Asinain ‘Kanmah doh awkah rak kai u!’ tiah an kan ti ahcun mah cu Jehovah nih kan kut chung ah a kan pek lai ti hmelchunhnak a si caah kan va kai lai” tiah a ti.
11 An pahnih in Filistin ralvengtu sin an i langhter tikah Filistin mi nih “Zoh hmanh u! Hebru mi cu an i thuhnak khor in an rak chuak cang” tiah an ti.
12 Ralvengtu hna nih Jonathan le a hriamnam putu cu “Nan ngamh ahcun rak kai u! Nan i hmuh lai!” tiah an ti hna. Cu tikah Jonathan nih a hriamnam putu cu “Rak ka zul, Jehovah nih Israel mi kut ah a pek hna lai” tiah a ti colh.
13 Cun a kut le a ke i bawm in lungpang ah a kai, a hriamnam putu zong nih a zulh ve. Jonathan nih Filistin mi cu a vun doh thluahmah hna i a hriamnam putu nih a hnulei in a thah hna.
14 Cutin a hmasa bik an doh hna lioah an thahmi hna cu eka cheu* tluk a simi hmun ah mi 20 hrawng an si.
15 Riahhmun ah a ummi le ral vennak ah a ummi ralkap pawl cu an ṭih tuk. Israel mi doh awkah thlahmi ralkap pawl hmanh therphang in an um. Cun li aa hnin i Pathian nih Filistin mi cu ṭihnak in a khahter hna.
16 Benjamin ram Gibeah khua ah a ummi Saul ralveng hna nih Filistin riahhmun ah ralkap pawl an i tuai-ur lenmi kha an hmuh.
17 Saul nih a mi hna cu “Ahodah a bau ti hngalh awkah mi rel u” tiah a ti hna. An rel hna tikah Jonathan le a hriamnam putu an um lomi kha an hmuh.
18 Saul nih Ahijah cu “A hmaanmi Pathian biakamnak kuang kha rak pu!” tiah a ti. (Mah lio caan ah a hmaanmi Pathian biakamnak kuang cu Israel mi hna sinah a um.)
19 Saul nih tlangbawi sin bia a chim lioah Filistin riahhmun i an i tuai-urnak cu a fak chinchin. Cu tikah tlangbawi cu “Chikkhat um rih!” tiah a ti.
20 Cun Saul le ralkap vialte cu an i pum i raltuknak hmun ah an kal. An va phanh tikah Filistin mi cu vainam in pakhat le pakhat an rak i thahmi kha an hmuh. Riahhmun cu a rak i tuai ngai.
21 A hmasa ah Filistin mi hna lei ah a ṭang i an riahhmun ah a riak vemi Hebru mi hna zong Saul le Jonathan kut tang i Israel mi hna sinah an rak ṭang ṭhan.
22 Efraim tlangram ah aa thupmi Israel mi zong nih Filistin mi cu an zam cang timi thawng an theih tikah raltuknak ah an hun i tel ve i an dawi ve hna.
23 Cu ni ah Jehovah nih Israel mi cu a khamh hna. Beth-aven khua tiang an i do.
24 Cu ni ah Israel mi cu an tha a dih tuk. Zeicahtiah Saul nih “Ka ral cung ah phu ka hlam dih hlan tiang zanlei a phanh hlanah rawl a eimi cu chiatserh si ko seh!” tiah ralkap pawl kha chiat a serter hna caah ahohmanh rawl an ei lo.
25 Cun ralkap pawl cu khuaihliti tampi a umnak tupi chung ah an rak phan.
26 Tupi chung ah khuaihliti a dordor in a tlakmi kha an hmuh ko nain chiatserhnak kha an ṭih caah ahohmanh nih an ei ngam lo.
27 Asinain Jonathan tu cu a pa nih chiat a sertermi hna kha a thei lo. Cucaah a ṭhiangṭhunh par in khuai thlar cu a hei sawh. Cun a lak i a ei tikah a tha a um ṭhan.*
28 Cu tikah ralkap pakhat nih “‘Nihin ah rawl a eimi cu chiatserh si ko seh!’ tiin na pa nih biatak tein ralkap pawl kha chiat a serter hna caah an bat tukmi a si” tiah a chimh.
29 Cu tikah Jonathan nih “Ka pa nih mi cung ah fakpi in harnak a tlunter cang. Khuaihliti tlawmte ka ei i ka tha a um ṭhanmi hi zoh hmanh u.
30 Ralkap pawl nih an ral hna sinin an lakmi hranchaw chung in an duh zat ei kho hna sehlaw a ṭha tuk hnga. Filistin mi cu hi nakin kan tei chinchin hna hnga” tiah a ti.
31 Cu ni ah Filistin mi kha Mikmash in Aijalon tiang an thah thluahmah hna caah ralkap pawl cu an buhri ngai cang.
32 Cucaah hranchaw kha an zuan hnawh i an i cuh. Tuu, caw le cawfa kha vawlei ah an thah hna i a thi ṭha tein chuah loin an ei.
33 “Zoh hmanh! Ralkap pawl cu a thi ṭha tein chuah lomi sa an ei i Jehovah cung ah an sual cang” tiah an rak chimh tikah Saul nih “Zumhawktlak loin nan um cang. Atu ka sinah lung nganpi pakhat in rak hrilh u!” tiah a ti hna.
34 Cun “‘Pakhat cio nih nan caw le nan tuu kha ratpi hna u, hi lung cung ah hin that u law ei u! A thi ṭha tein chuah lomi sa kha ei in Jehovah cung ah sualnak tuah hlah u’ tiah ralkap pawl kha va chim hna u” tiin nawl a pek hna. Cucaah mah zan ah pakhat cio nih anmahle an caw kha an rak put i cuka ah cun an thah.
35 Saul nih Jehovah caah biakṭheng pakhat a ser. Mah cu Jehovah caah a ser hmasa bikmi biakṭheng a si.
36 A hnuah Saul nih “Zan ah Filistin mi hna sinah va kal u sih. Khuadei tiang va do hna u sih law an thil va chut hna u sih. A nung in pakhat hmanh kan ngaan hna lai lo” tiah a ti. Cu tikah ralkap pawl nih “A ṭha na timi paoh tuah ko” tiah an ti. Cun tlangbawi nih “Hika ah a hmaanmi Pathian kha hal ta u sih” tiah a ti.
37 Saul nih Pathian cu “Filistin mi kha ka va dawi hna lai maw? Israel mi hna kut ah na pe hna lai maw?” tiah a hal nain Pathian nih mah ni ah a let lo.
38 Cucaah Saul nih “Haotu hna, hika ah ra tuah u. Nihin ah kan lakah zei sualnak dah a um ti kha hlathlai tuah u.
39 Israel mi a khamhtu Jehovah a nun bang in sualnak a tuahtu cu ka fapa Jonathan a si hmanh ah a thi hrimhrim lai” tiah a ti. Cu tikah ahohmanh nih an let ngam lo.
40 Saul nih “Nan dihlak in khikalei ah um u! Kei le ka fapa Jonathan cu hikalei ah kan um lai” tiah a ti hna tikah Israel mi nih “A ṭha na ti ning paoh in tuah ko” tiah an ti.
41 Saul nih Jehovah cu “Israel Pathian, Thummim in rak kan let ko!” tiah a ti tikah Jonathan le Saul cu thim an si i mizapi cu sualphawtnak in an luat.
42 Saul nih “Keimah le ka fapa Jonathan caah camcawhfung zuk u” tiah a ti tikah Jonathan cung ah a tla.
43 Saul nih “Zeidah na tuah? Rak ka chim!” tiah a ti tikah Jonathan nih “Ka ṭhiangṭhunh par in khuaihliti tlawmte ka lak i ka ei. Mah ruang ah ka thih ding a si ahcun timhcia ka si ko!” tiah a ti.
44 Cu tikah Saul nih “Jonathan! Thihdan pek na si lo ahcun Pathian nih ka cung ah dantatnak pakhat hnu pakhat in tlunter ko seh” tiah a ti.
45 Asinain ralkap pawl nih Saul kha “Israel mi hna teinak nganpi a hmuhtertu Jonathan cu a thih awk a si maw? A si hrimhrim lo. Pathian nih a bawmh caah nihin ah hitin a tuah khawhmi a si. Jehovah a nun bang in a sam fa, fa khat hmanh vawlei ah a tla lai lo” tiah an ti. Mi nih an khamh caah Jonathan cu thihdan pek a si lo.
46 Saul nih Filistin mi cu a dawi ti hna lo. Filistin mi zong anmahle an hmun cio ah an kir.
47 Saul nih Israel ram ah siangpahrang a sinak kha a fehter i a pawngkam ral pawl a simi Moab mi, Ammon mi, Edom mi, Filistin mi le Zobah siangpahrang kha a tei hna. Raltuknak kip ah teinak a hmu.
48 Ralṭha tein ral a do. Amalek mi zong kha a tei hna. Israel mi kha an ral hna kut in a khamh hna.
49 Saul fapale cu Jonathan, Ishvi le Malkhishua an si. Fanu pahnih a ngei. Upa deuh cu Merab a si i ngakchia deuh cu Mikhal a si.
50 Saul nupi cu Ahimaaz fanu Ahinoam a si. A ralbawi cu Ner fapa, a pate Abner a si.
51 A pa cu Kish a si. Abner pa cu Ner a si i Ner pa cu Abiel a si.
52 Saul cu a chan chung vialte Filistin mi he fakpi in an i do. Saul nih pa ṭhawng le pa ralṭha a hmuh hna tik paoh ah a ralkap ah a tlakter hna.
