Samuel Pakhatnak 7:1-17
7 Kiriath-jearim khuami hna nih Jehovah biakamnak kuang kha an lak i tlangbo cung ah a ummi Abinadab inn ah an chiah. Cun Jehovah biakamnak kuang zohkhenh awkah a fapa Eleazar kha rian an pek.*
2 Kiriath-jearim khua ah biakamnak kuang a phanhnak hi kum 20 a si cang. Cu tikah Israel mi vialte cu bawmhnak hmuh awkah Jehovah sinah an i mer.
3 Samuel nih Israel mi vialte kha “Jehovah sinah lungthin dihlak in kir nan duh ahcun ramdang mi hna pathian le Ashtoreth* milem hna kha nan lakin hlo u! Jehovah cu nan lungthin a dih umnak in pe u law amah lawnglawng kha bia u. Cutin nan tuah ahcun Filistin mi hna kut in aan khamh hna lai” tiah a ti hna.
4 Cu tikah Israel mi nih Baal le Ashtoreth milem hna cu an hlonh i Jehovah lawnglawng kha an biak.
5 Cun Samuel nih “Israel mi vialte kha Mizpah ah pum hna u law Jehovah sinah thla kaan campiak hna lai” tiah a ti.
6 Cucaah Israel mi cu Mizpah ah an i pum. Cu ni ah tikhor ti kha an than i Jehovah hmaiah an thlet. Cun rawl an ul i “Jehovah cung ah kan sual cang” tiah an ti. Samuel cu Mizpah ah Israel mi hna caah biaceihtu in rian a ṭuan.
7 Israel mi cu Mizpah ah an i pum timi thawng kha Filistin mi nih an theih. Cucaah Israel mi doh awkah Filistin bawi pawl cu an i thawh. Mah kha Israel mi nih an theih tikah an ṭih tuk i,
8 “Kanmah bawmh awk le Filistin mi hna kut in khamh awkah Jehovah Pathian sinah ngol loin thla kan campiak ko” tiah Samuel kha an nawl.
9 Samuel nih hnuk thlei rih lomi tuufa kha khangh thawinak caah a pum ning in Jehovah sinah a pek. Cun Israel mi caah bawmh hal in Jehovah sinah thla a cam i Jehovah zong nih a leh.
10 Samuel nih khangh thawinak a pek lioah Filistin ralkap nih Israel mi cu doh awkah an rak naih hna. Cu ni ah Jehovah nih fakpi in khua a ritter i Filistin mi cu a tuai-urter hna caah Israel mi hna hmaiah an sung.
11 Israel mi cu Mizpah khua in an chuak i Bethkar thlanglei tiang Filistin mi cu an dawi hna i an thah hna.
12 Cun Samuel nih lung nganpi pakhat a lak i Mizpah le Jeshanah karah a phun. “Jehovah nih atu tiang a kan bawmh rih” tiah a ti i Ebenezer* tiin min a pek.
13 Cuticun Filistin mi cu an sung i Israel ram kha an luh hnawh ṭhan ti lo. Samuel a nun chung vialte Jehovah nih Filistin mi cu a ralchanh hna.
14 Mah leng ah Filistin mi nih Ekron in Gath tiang Israel mi sinin an rak lakmi khua le ram hna kha Israel mi cu an pek ṭhan hna.
Israel mi le Amor mi karlak zong ah daihnak a um.
15 Samuel nih a nun chung vialte Israel mi cu bia a ceih hna.
16 Bethel, Gilgal le Mizpah ah kum fatin khual a tlawng i Israel mi cu bia a ceih hna.
17 Asinain a inn a umnak Ramah ah a rak kir ṭhan lengmang i cuka zong ah Israel mi cu bia a ceih hna. Cun Ramah ah Jehovah caah biakṭheng pakhat a ser.
